KAN RAM SUM DINHMUN A CHHE TAKZET TIH HI I PAWM NGAM LUL TEH ANG U (Sri Lanka hre reng rawh)
Mizoram sawrkar chuan sum leh paiah hun khirh tak a tawng chho mek a, chutih laiin kan dinhmun chhiatzia haider a, kan sum enkawltuber CM ni bawk chu "Sum enkawl thiam" lo ti duh tawkte kan la awm tlat mai hi a manganthlak a ni.
Hmanni mai khan Economics & Statistics Department chuan Mizoram Statistical Abstract, 2021 an tlangzarh a. Chuta a lan dan chuan kan sum dinhmun a chhe zawngin kum 3 chhung chu a kal mek tih chiang takin a lang.
Kum 2014-2015 hnuah a ṭum khatna atan 2021-2022 ah kan sum hmuh aiin ka hman a tam zawk a, Revenue Deficit kan nei tihna a ni. Kum 2010-11 hnu lamah kum 2019-20 aṭangin Mizoram sorkar Opening Balance a Minus leh ṭan a, chumi awmzia chu, sawrkar kumbul (April) kan hman tirh aṭangin a bain kan kal. 2020-21 leh 2021-22 pawh a Minus leh a ni. Heti chung hian state hausa chetin kan che a, motor thar lei kan huai pap pap viau lawi si.
Reserve Bank of India (RBI) kamkhat kan tawk a, min hrek zui hnuah a pung awma pawisa puk tur kan dap a. Open Market Borrowing (OMB) kaltlangin kan puk hmiah hmiah a, inthlahrunna nei miah loin Press Conference te koin "chumi te pawhin bill an la ve tho" te kan ti mai mai a. Khua hi a var mawlh lo.
Covid vang tiin chhuanlam siam ṭhin mah ula mipui hian kan pawmpui hleithei lo che u. Covid vanga sum in dawn tamzia te pawh kan hre ve nelnual asin. Pamphlet (ṭul lo) man to te, Walkie Talkie man to te pawh kan hre ve. RTPCR chungchang te phei chu sawi lang lo law law ang. Covid laia mipui min tihduhdahzia pawh kan hria e.
In awmna Party ai khan he ram hi hmangaih ngam tur leh in hriatna leh thiamna te pawh he ram tana hmang ngam a, huai taka ṭawng chhuak ngam turin rorel lai MLA rualte ka ngen a che u. Zahawmna te hi nihna vang ni loin hnathawh leh thiltih aṭanga teha neih tur a ni zawk asin.
Kan ram hruaitu, CM aṭanga MLA zawng zawng, kan pu te u. Khawngaih takin in mipuite hmakhua ngaiin, kan dinhmun hi hriain inrenchem tak chungin he ram hi hruai ula. Nangmahni pawhin hamṭhatna in dawn, in mamawh lem lohte pawh ram tan dawng lo ngam ve turin ka ngen tak meuh a che u.
In mipuite hi min bum tum loin thu dik, thil nihna dik tak min hrilh ngam lul teh u khai.
- Madawnga Khiangte