Lirthei intlan chhawk hi

Ṭum khat chu two wheeler showroom pakhatah hian ka leng lut a, an hotupa nen kan titinaah lirthei intlan chhawk vang hian lirthei an hralh tam phah em tih ka zawt a. Ani chuan an hralh tam phah thu a sawi bakah fiamthuin, 'Kar khatah hian vawi hnih chiahte hi tlan phal se kan ti a nia,' a ti a, kan nui liam mai a.

Kan khawpui chhung tawt lutuk tihziaawmna turin sorkarin lirthei intlan chhawkna dan mumal takin a duang a, mipui lam pawhin kan zawm ṭha viau. Mahse, chu chuan awmzia a la nei reng em tih erawh sorkar pawh hian ngaihtuah nawn leh se a ṭhat ka ring hle mai.

An ruahman tirh kha chuan awmzia pawh a nei ngei e, tunah erawh awmzia a awm ta lutuk lo niin a lang.

Scooty/ Scooter man pakhat a lo to lo bawk nen, second hand lei tur a lo tam bawk nen, chhungkaw tam tak chuan tlan loh nia khalh chhuah tur lirthei an nei tel fur mai. Mi retheite bawkin tlan loh ni awm hi an tuar chho leh ta niin a lang a, chuvang chuan kawngpui tawt tiziaawmna tur kawng dang hi sorkar hian a dap a ngai a ni.

Lirthei intlan chhawk hi titawp ta thut pawh nise tun ai hian Aizawl khaw chhung kawng hi a tawt phah vak tawh lo mai thei a ni.

Lirthei intlan chhawk aia veiawm zawk leh traffic ti-jam nasatu zawk chu, kawngsira lirthei dah hi a ni. Chaltlang Dawrkawn- Bawng­kawn kawngpui sirahte pawh hian lirthei dah hi an tam ṭhin khawp mai. Hengte pawh hi traffice ti-jamtu zinga mi a ni.

Hei chu entirna pakhat chauh a la ni a, hmun dangah pawh kawngpui lun laia kawngsira lirthei dah an tam ang tih a rinawm.

PAHOSS kha a hmanna tur dik tak, hman dan tur dik takin hmang se chuan awmzia a awmin a rinawm. Veng kilkhawrah a scheme hmu an tam nen, beisei aiin kawngpui lun dunga awm zingah hmu an tam ta si lo (An dil lo pawh a ni mai thei). Lirthei dahna mumal tak hi kawngpui dungah hian awm ṭeuh se, chu chu traffic jam tiziaawmtu pakhat pawh a ni ngei ang.

Tun dinhmunah hi chuan lirthei intlan chhawk dan hi ennawn leh a ngai tawh niin a lang. Khawpui kawngpui tihthawlna leh traffic jam tihziaawmna kawngah awmzia a nei lutuk tawh lo mai thei a ni.

- Lalpuipuia