NEDA boruak

Inhnialna a tam si a, MNF hi BJP nen a ruka a inzawm leh inzawm loh lam hi sawi neuh neuh a tam. Ka thiam ve danin google hmangin ka han zawng pawp mai a, hman nia New Delhi-a BJP-in North East Democratic Alliancem (NEDA) an koh khawma Pu Zoramthanga hova an zuk kalna khan ngaih a tiṭha lo tawlh tawlh a ni.

“The MNF leader was here with a few party colleagues to participate in the day-long confe­rence of North East Democratic Alliance, an off shot of BJP-led NDA” tih hi UNI lamin an lo ziak kuau mai a, MNF leh BJP hi thawk dun lo an nihna reng reng ka hmu phak lo.

He mi ṭuma Pu Zoramthanga hova an zin hi an thiam ve khawp mai a, Mizoram lam hriatah chuan Union Minister of State for Home Kiren Rijiju hn muh thu leh 1986 Peace Acord lama tihfel loh an bawhzui thu daih mai kha Mizo mipui min hriattir chu a ni ta daih a ni.

Ṭhenawm tlang­val Rijiju hi chu a rawn zin zeuh zeuh a, kan MNF hotute hian MNF leh India sorkar inremnaa thil la tih famkim loh hrilhna hun remchang chu an ngah a, tun ṭuma NEDA hmanga BJP President Amit Shah-in Delhi zin tura a sawmna hi an kal chhan a ni a, he thu reng reng hi tlangzarh duh si lovin Rijiju an hmuh thu hlir mai an tlangaupui a, an nihna angin an lang chhuak lo a ang ka ti zo ta.

Politics thiam titi khawchangah chuan MNF president-in Chakma candidate an neih loh tur thu a sawi khan an dinna a chiang tawh a, Chakma tamna bialah hi chuan BJP hi an kian mai dawn a, BJP chuan MNF chu sorkar siampui turin a support dawn a, sorkar laipui lamah Narendra Modi hnuaiah tluk luh an duh bawk si avangin remchang an zawng tawh a ni.

Inthlan hma kum khata, “Kan mal din dawn” tia au lauh lauh mai pawh hi mal din lam an tumna ngawr ngawr aiin, “Hei, BJP kan ni lo, BJP nen kan thawkho dawn lo,” ti anga lan an tumna a ang zawk a, BJP pawisa leh puihna duh si, BJP anga lanin vote a kiam hlau bawk si, hun khirh takah an ding mek niin kei chuan ka ngai.

Congress an lo khi vur vur mai thei a, Congress hi tun hma Congress central lama thiltithei tak kha an ni ta lova, zawmpui nei lo ang mai an ni.

- C. Lalṭhakima