SUAL MAN

Hmanni chu Set Free Minisṭy hian Cenṭal Women’s Jail an tlawhna turah min rawn sawm ve mial a. Jail chu misual rual awmna nia ka ngaih a vangin ka phur em em lo. Mahse kan chhungkuain kan zuk kal ve a, ka ngaih­dan hi a insawn deuh dawrh mai nia maw le!

Misual chuan a sual man chu a tel tur a ni tih hi ka thurolum ve a ni a, kei pawh ka sual chuan chu chu ka awrh tur a ni, tih hi.

Jail chhung kan han lut a, an rawn kalkhawm ṭak ṭak a, sual hmel viau pawh chu ka hmu lem ta hlei lova (hmeichhe cell a nih vang nge phei chu ka hre lo). Inkhawm kan han ṭan a, ka kohhran lawina aiin kan zai tui zawk daih nghal pang mai a. Kan hruaituin a zir bawk a, a hlimawm ṭan riau. Sermon te kan ngaithla a, hun hlimawm tak kan hmang tlat lawi si!

Ngaihtuahna a vak thui duh hle mai. Mihring hi tisual thei kan ni a, tisual deuh vek tawh pawh kan nih a rinawm. Man loh vanga zalen ta mai hi kan tam awm mange te ka tia. Pathian thu tuipui vak mi leh Halleluiah han ti chi ka ni lem lo nain ka thil tawn khan ka rilru-ah sawi thui deuh mai a nei.

Tang zinga pakhat sawi, chhungkaw nu ber kan awm nual a, kan duh vanga tang kan ni bik lo ti ila, thil sual kan tih vanga tang chu kan ni. Chhungkaw ngaihtuah hi a na ve em em ṭhin, a tihte kha ngaihtuah zui tlak a ni. A nihna a sawi ngam a, a huai ka ti.

Tha viaua kan inngaih lai hian Jail tang mekte pawh hi kan lo tluk lo thei awm mange aw tih rilrute ka pu chho a. Tluk loh chu sawi loh an ne pawh kan lo ek pha lo thei dawn nite hian ka hre ta deuh reuh a.

Mizoram mutan chu hlemhletna a ni a. Ka mi ngaihsan Pu Manzuala’n Mizoram hi corruption kairualna ber a ni, a tih hi thu dik a ni tlat. Man ni ve si lovin sawrkar hnathawk kan hausa viau hlawm mai bawk si a. Chhui tawkte pawh court-ah kan insawi fihlim thei deuh zel a. Ka zeldin a, kan tlawh nia tang tam zawk kha ukil ṭha rawihna tur pawisa neih zawh loh vanga tang an nih hi ka ring ta tlat pek a. Khawngaihna rilru a lo lut a, ka luangliam viau mai.

Eng ang pawhin inveng­in inthup mah ila kan sual man hi kan la awrh nawlh dawn. Kawngpui ṭha deuh tur chhe deuha siam pawmpuitu hian a la tuar dawn. Mi rethei chawikanna tur lo paipawntu pawhin a la awrh nawlh dawn, tunah a nih loh pawhin nakinah (this life or the next).

Man loh vang leh chhui chhuah loh vanga jail bang zut lote hian bang zut nuam lo tak hi kan la zut dawn ngei dawn.

Jail tang ka zuk hmuhte kha mi fel an ni ka ti lo, mahse nang leh kei hi anni tluk zet leh anni aiin kan lo sual zawk daih thei tlat.

Tawngṭaipuina an mamawh a ni, khawngaih an ngai. Ram dangah chuan jail hi hming dang dang an vuah a, siamṭhatna lam hawi a ni deuh vek. Sual sim hi Bible hian a ngaipawimawh em em a, kan mi tangte hi misual ti mai lovin an sim theihna turin ṭan la ang u hmiang.

Kan sual man hi kan la phur/ chawi vek dawn.

- Dr Para