PASTOR LEH TIRHKOH

“Hnathawktu chu hlawh hmu tlak a ni” (Luka 10:7). “Mahni hnaa dawngdah ching chu tichhetua unaupa a ni (Thufingte 17:9) “ Hna thawk peih lo tawh phawt chuan ei pawh ei suh se”(2Thesolonika 3:10).

A leitu (Consumer) te tan chuan in chhung mamawh rate a inang vek. Kan Pastor leh Kohhrana kan chhawrte hlawh hi sorkara thawkte hlawh nen a inthlau ta hle. Chhiatni ṭhatniah te mi zinga han tel ve changa inralna/lawmpuina/damlo enna a lo ngai ṭhin. An Kohhran mite thil tihnaah phei chuan tel makmawh a ni. Khaw ṭhenkhatah te chuan paltlang ngei ngei ngaihna hmunah table-ah ziaktu lo awmin petu hming, khua leh pek zat an lo ziak ṭhin. Heng niah te hian lo lang ve ta lo se “khaw nge” tih an ni ṭhin bawk si. Sum lama harsatna vangin fel leh bengvar an hlawh lo chang a awm. Mizoramah chuan mithi ruang awm laiin râlna an inpe lo tlangpui. Hmun ṭhenkhatah chuan Y.M.A. in bawm an dah a,an thlak zat midang hriat kher lovin ralna an thlak thin, a tlangpuiin vuina programe a tel hmanlo ten an thlak. Lawm na ni ah te pawh lawmpuina an pek zah an record ngai kher lo. Mithi ral duhtu te chuan ruang kal hnuah an chhungte hnenah chibai pahin an pe a, tin ni hrana ralte pawh an awm.

Ka sawi rual hian kan Pastor te pawh full time worker an ni tih an inhriat a ṭul. Sorkar/Company/mimal hnuaia thawktute hi a tlangpuiin nikhatah darkar 8 hna an thawk ṭhin. Tun hma deuh kha chuan Pastor te kha khaw eng emaw zat an bial ṭhin vangin an hun tam zawk daih kha an Kohhrante tlawh leh rawngbawl nan an hmang ṭhin a, a tlangpuiin kea zin an nih ṭhin avangin an hah thei hle. Tun lai hi chuan an bial a zim tawh bakah lirthei hmangin an zin a, kohhran pakhat chuah enkawlte pawh an awm tawh. Pastor ṭhenkat (an vai chuan ka ti lo) hi chu Inneihtir, baptisma, nau hlan, sakramen sem leh mitthi vui bâk an hnaah an ngai vak loin a lang. Programme an siam a, thu an va sawi (hril) a, inkhawm banah an haw leh mai a. Camping, Crusade, Councelling te lah Evangilist-at-large leh Rivival speaker team te hnaah an ngaite pawh a ang. An hna (duty) an thawk chiah hi chu a darkar bia hisap chuan an hlawh a tlem kan tih rual rualin Sorkara thawktute aiin a tam zawk mai thei.

Manipura kan awm lai khan Kosom Kholen Village (Tangkhul Naga Khua) a kan zin ṭumin, fur khawchhiaa lui len vangin kar khat lai kan cham a. He khua hi Baptist Kohharan, khaw lian vak lo, Biak in pakhata lawi leh tlang lo nei mi deuh vek an ni. An khua nena inphu loin an Biakin a changkang. An ngaihdan chuan Pathian Biakin chu a khuaa In ṭha leh changkang ber a ni tur a ni. Kan cham chhungin an Pastor chu ka kawm ber a ni a, a hnathawk leh ni tin hun hman dan chu ka thlithlai a. A hmel hlimsur leh a chet dan te chu a Pastor hliah hliahin ka hmu. A quarter ah chuan pindan teruhte felfai deuh hi a nei a, chu chu a ṭawngṭaina room ani. Table, Chair pakhat bakah a Library ah chuan Bible, hla bu, sakhawlam lekhabu, chanchinbu leh journal an awm a. Zingah hma deuhin a tho a, bathroom-a a tih tur te a tih zawh ah thingpui a in a, a in zawhah a roomah a lut a, tu m'a tihbuai a duh lo. Roomah chuan eng nge a tih ṭhin tih ka zawh chuan - “A hmasa berah Bible ka chhiar a, Pathian hnenah ṭawngṭaia inhlanna ka nei a, kei leh ka Kohhrante tan ka ṭawngṭai a, chumi zawhah Bible hrilfiahna leh chanchinbute ka chhiar a. Tin, ka sermon tur ka buatsaih ṭhin,” a ti. Zing chaw ei khamah kawtchhuahah a lo awm a, a khawmite lo feh tur thlah pahin ding chungin ṭawngṭaina hun tawi te a lo hmang ṭhin. Lo leh ram kal tur te a thlah zawhah khaw lama damlo leh tar upa ho a kan kualin Pathian thua pawlna anei ṭhin. Tin Biakin chhung leh a Compound te a tifai ṭhin. Tlai chaw ei khamah mi rawn kal hmain Biakin a thleng a, inkhawma lo kalte chu a lo welcome a. Inkhawm ṭan hunah a lut a, inkhawm kaihruaiin sermon a thlâk ṭhin. Bânna ṭawngṭai zawhah rang deuh in a chhuak a, inkawm lo kalte chu chibaiin hlim deuhin a thlah ṭhin. Mi an haw vek hnuah tukverh leh kawngkhar a khar a, hnu a dawl ṭhin. Pathian ni chawhnu ah chuan inkhawm a lo kal lo te a kan kuala,chu mi zawh ah a Kohhran mi te kha tlawh kualin inchhung hrasatna an neih chuan a sawipui a, ṭawngṭaina a neipui ṭhin. Hei hi a ni tin hun hman dan a ni a, full time tak meuh a ni.

Kan Pastor te tehna tura ka ngaih chu - Sakramen, mi inneihtir, nau hlan, baptisma chantir, mitthi vui leh thlarau lama a kohhrante chawm bâkah a kohhran enkawlte an hlim em, a thusawi leh a rawngbawlnaah mi eng zat nge inhmuchhuak leh tharna nei, a kohhran member-ten mimal harsatna leh chhungkaw hrasatna an neih changin thlenna leh rawn tlakah an ngai em, Pathian thuin a chawm ṭha em, a kohhran enkawlte zinga mi eng zat nge kohhran danga insawn, intih nek nekna leh groupism a awm em, inrem lo mi eng zat nge a tihrem, inkhawm ngai lo eng zat nge rawn inkhawm, mi neinung leh a chhawr theih tur leh mi hnuaihnung leh khawsak harsa deuhte a kan kual dan a inang em, thawhlawm a pung em, tihte hi a ni.

Pastor an kohhran chhungah groupism awm fo, member pun aia kiam, ramthar tirkoh ringthar la mumal lo te phei hi chu an kuang lo tur nawrah ngai ila, an hlawh hi kohhran member mi harsa te tein an thawhkhawm aṭang a ni tih hriain insaseng mai se a âwm. Pastor ṭhenkhat an awmna apianga pawisa tichingpen ching leh, a hnua an hlawha in-adjust ngaite phei hi chu penson pawh ni lova ban (dismiss) tawp mai hi a âwm. Kohhran ṭhenkhatte phei hi chu District an nei duah a, member eng tham ni mang lo, la junior te te Superintendent ah an dah a, kohhran lian leh hausate elin Motor, Clerk, Peon an beisei a, a buaithlak. Sapram leh ram changkangah te chuan an Pastor te hi qualified tak tak, engkima rawn tlak niin an spiritual Guru an ni.

Pastor kan ruai ta rau rau chuan an chhungkaw khawsak theihna tawk hlawh pe ila, anni pawh an hna thawk turah ngai ila, hlawh kan pek theih chin chauh ruai ila.Pawngpaw tam aiin a thawk thei (quantity aiin quality) hi ngaihtuah ila. Ramthar field a kan tirhah ṭhenkhatte phei hi chu kan pawisa sen leh ringthar dik tak an lak hi a inphu lo, ringthar dik tak pakhat zel laknaa sum sen hi a rate a sang duh viau ang.

- Lala Khobung M: 9862356088