Mi ṭha zawn kawngah Kan in thurual leh kan huaisen a ngai ta

Tun hnai USA a ka zuk zin ṭum khan ka ṭhianpa pakhat chuan, "Mizoram mipuite khian ngati nge Pu Hawla leh Pu Zorama chauh khi in thlak kual reng mai le. Khi mite bak khi mi ṭha dang awm miah loah in ngai em ni?! ...mi fing leh mi ṭha nei tlem ber hnam te pawh in ang alawm le?" a lo ti phawng mai a. Ka rilru a kal thui hle.

Ni e, anni pahnih hi an sual ka ti lova, chutih lai erawh chuan anni pahnihin ram an hruai danna lungawi lo a in sawh nghawng nghawng hlawm si hian, "Min han fiah teh u" ti lawm lawm heti zat mi thiam leh fing kan neih te lam reng reng kan hawi ngam leh si lo hi eng nge a chhan kan tih chuan, ‘kan dawih zep vang leh party kan ruih chilh vang a ni.’ “Buana hmaa kherh’ an tih ang deuh hian thil hi kan ni.

Kei ngei pawh hi khaw ṭhenkhat, rawngbawl tura min sawm duh em em, mah se an khua a tet avanga ka kal duh rih loh vanga min sawm ngam lo te, tin ka hman an rin loh avanga min sawm ta lo te an lo awm fur mai a lo ni a! aw... min han be hmasa phawt se chuan a chiang zawk tur asin le ka ṭhin. Kohhranin camp an buatsaih a, team lar lo ve tak, an speaker hming pawh Upa te bakin an la hriat loh te an ruai a, kohhran mipui tam zawk an han tui lo nghal ringawt mai te hi kan ze nghet neih ṭha lo tak a ni.

Ni e, kan ram pawh hian he zia hi kan kalpui tlat mai nia. Party dang leh pawl dang rawn ding thar, ram siam ṭhat duh tak tak nia lang leh chumi avang chauha inthlan hmachhawn tura lo pen chhuak inti, ‘la test loh’ mimal tak pawha mi ṭha tia sawi kai ve ṭhiau tho te kan va ngah em. Nimahsela chutiang pawl ding thar leh ‘la lal ve lo’ te pawh chu an ṭhat kan ring lo nghal tlat fo zu nia! Anmahni siamtu ni awm ang fahrana hre chiang intiin, an ṭhatlohna lai tur kan han sawi fiah thiam nghal em em te hi ‘Van lam ngaihdan a ni ang em?’

Hetiang rilru hrisel lo kan put fo avang hian kan phu tawk ‘lal’ pekin kan awm zawk niah ka ngai hial a ni. Hawh u, hei hi i hre thar teh ang u, ‘Lal ten mipui an siam lova, mipuiten Lal kan siam zawk asin’ tih hi. Hindu-in an pathian lim an siam a, a ṭul an tih tawh loh hnuah an zawn a, tuia an paih leh zel ṭhin ang hian.

Kan ram hi kan hmangaih ve tak tak a nih chuan mi ṭha zawngin ṭangrual tawh ila, mi ṭha lo chu i paih ngam tawh ang u. Ka hmangaih Mizoram tan.

- Vanlalsailova