MIZO KRISTIANTE POLITICS

Mizo Kristiante hi inkhawm tam leh Sunday Sikul kai kimah Kristian tha ber pawl kan ni mai thei. Kan inkhawm zin leh Kohhran 'actitvities' a kan chet dan ngaihtuah hi chuan kan ram 'politics' hi zaah za a dik thei lo a nih pawhin zaa sawmsarih tal hi chu dik tura beisei a nih lai hian, a lehlinga vuttui thlawr bel an sawi ang hi kan ni hlauh thung a.

Kan ram roreltute dikna (justice) keng­kawh thei lo a siamtu hi keimahni kan ni em? Dik tak leh ṭha taka thiltih tum mah se mipuite hian kan rilruah kan hamṭhatna tur chauha thawk tura kan beisei vanga thlang tling kan ni em? Lal reng duh rilru pu tan chuan dik taka thiltih aiin tlin leh zelna tura rorel hi a fuh ber a ni mai lo maw?

A dik lo, a ṭha lo tih hre reng chunga thil ṭha lo tih duhna kan ram hruaitu te'n an nei tlat hi eng vang ber nge? Opposition an nih laia thil ṭha hria, an sorkar ve leha thil ṭha an tih theih tak tlat loh chhan te hi eng nge ni ang?

Kohhrana rawng­bawltu pawimawh tak takte hi Mizoram Politics-ah pawh thui taka inrawlh leh 'voice' nei an ni. Politician-te vanram kai lo tura kan ngaih ruk deuh tlatna rilru hi eng vang nge? Eiru tura kan ring tlat mai te hi eng nge chhan? Ṭhahnem ngaihna vanga party thar din te thlan tlin aia party lian sa te hi kan ram hruai tura kan thlan tlin leh tlat zawk ṭhin? A chhan tam tak zinga pakhat chu sorkar tura kan beisei zawh loh thlan tlin ai chuan sorkarna chang tura kan rin thlan leh mai tunlai atan chuan a finthlaka kan hriat vang a ni.

Kan ram politics siam ṭha tur hian mipui leh hruaitute mawh­phurhna a inang chiah a ni. MLA te hi kan hamthatna tur atana ringawt thlang tling loin kan ram siam ṭha tura hnathawh kawr ha turin i thlang tling ang u. Kan duhna hmun taka min 'post' thei, sum leh pai min pe thei, hna min pe thei tur atan chuah kan ram hruaitu te thlang tawh loin, hmasawnna hna thawk turin i beisei tawh ang u.

MLA te leh in candidate te pawhin kan nihna hi hausakna atan te, duhsak zawng te han pekna kan ramah ro i rel tawhlo ang u. Kan chhehvel polotician, Kristian pawh ni lo kan tluk lo pawh hi a pawiin a zahthlak a ni.

Minister hmelhriat neih vanga hna hmuh, duhna hmun apianga transfer theih ni te hi Mizo Kristian te hian i zak tawh ang u. Kristian Kohhran Upa Minister, eiru tura mipuite leh kan kohhrante'n min ngai tlat te hi thil zahthlak tawpkhawk a ni. Kan nu leh pa te, politics vanga hausa te hi keini an fa te hi chuan i zahpui tawh ang u.

An thawhchhuah ni lo, tute emaw chan ai laksak vanga bike leh car nalh tak tak leia khal leh 'ride' te keini an fate hi chuan zahna chang i hre tawh ang u.

Mizo Kristiante politics hi vanram kai pui theih, van ram kaina tlaka ṭhangtharte'n kan ngaiha kan hmuh a kan hman theihna tur chuan tuna mi te hi kan pawimawh vek. Kan siamṭhat vat loh chuan ram dang mite'n Mizoram hi Kristian ram ni tawh loah an ngai mai ang a. Politics tih leh corruption tih inzawm tlatte hi Kris­tiante rilru-ah a bet nghet mah mah tawh.

Kan tu leh fate'n Politics hi hremhmun a tla tura kan ngaih chiang sa te khelh tawk tura kan ngaih tlat tawhna rilru hi paih bo turin ṭan i la thar ang u. Kan theih tawp kan chhuah ang a, a bak chu Pathianin a ti ang.

- Rinfela Zadeng