Ṭhalai leh ṭhangtharte chhawr thama hmalak a hun

Mizorama sorkar kan hrawn tawh te hian ṭhalaite an ngaihthah a, an economic development policy-ah ṭhalai ni lovin nu leh pa, hnathawk tura tha zawi tawh lam hlir an target a ni deuh ber. Hei hi kan sorkar tawh te hlawhchham chhan lian ber pakhat niin alang.

PRISM-in inthlan hmachhawn a tumna tura a thutiam, tihtur a ziah chhuahna manifesto-ah khan ‘ṭhalai leh ṭhangtharte chhawr thama hmalak’ a tum thu kan hmu tam a. Eizawnna hna thar nuaikhat singnga thlenga siam an tum hial thu kan hmu. Mizorama kan buaina tawh lian ber leh pawi ber, sualna tipunluntu leh hun kal zel tura chhiatna nasa zawk min thlentu tur chu employment problem hi a ni. Sorkar hna ringawtin min daih seng lova. Kan sorkarin private sector lama hma a lak bawk si loh avangin hna avang tial tial a, hna nei lo kan pung tual tual a, sualna pawh a pung nasa a. Pawl dina thawhlawm khawn te chu mi tam takin eizawn nan kan hmang a ni ringawt tawh a. Hemi dawt chiah hi chu hmanraw hmanga mi pawisa chhuhsak a nih tawh avangin tuna kan dinhmun hi ngaihtuah chian chuan a him lo hle.

Kan rama hnathawh dan kalphung hi thlak dawrh a ngai tawh niin alang. Sports leh entertainment industry te pawh hi eizawnna hna angin a theih chen chenah kalpui tura rilru siam a hun a, sorkar hnathawk lak dan leh enkawl dan te hi singsak nasat a ngai tawh a, political appointment vanga lak, mahni hnathawh tur thawk thei lo khawpa thil dangin a tihbuai leh an thiamnain a phak loh tam tak te hi senghawi tura ngaihtuahna sen a hun tawh a ni.

Labour, Skill Development & Entre­pre­neurship Department hi tilianin ministry hrana siam hial ṭulah PRISM chuan kan ngai hial a. Minister pakhatin a hranpain enkawl nalh se, helamah hian hmasawnna chak zawka a kal theih beiseiawm a ni. Sorkar thuhnuaia awm industrial leh commercial unit te hian awmzia tak tak a nei lova, heng te hi a theih chen chen privatise a; public distribution, health care, sport, kalphungte thlakin; ITI leh Polytechnic kalphung siamṭhat te hi a ṭul tawh viau. Hnam dang insurance company ten Mizo mipui sum kum khata an haw pui ringawt pawh hi chhut peih tan chuan ṭahpui tham a ni hial awm e. Heng te hi tihtawp dan ngaihtuah a, keimahni ngeiin a theih dan ang anga insuarance company te hi din ve dan kan zawn a hun. Kan pawisa chhunkhawm mi ramah an invest a, tuna kan dinhmun angah hi chuan insuarance kan uar poh leh kan sum kalral a tam ting a ni ber.

Mizoram hi kan vannei a, status ṭha tak neiin, independent ram ang deuhthawin kan awm a. Hnam dang lo lut duhte RAP (tuna thlahdul mek) leh ILP hmangin kan dang thei a. Kan ram leh a chhunga thing leh maute hi India Danpuiin kan thuneihna hnuaia a dah mai bakah UNDRIP hmangin leihnuai hausakna pawh kan claim thei a. Kan hnam nun leh chindan phung nena inkalhin India-in Dan min siam khum thei lo a. Mahse, kan status neih sa pawh kan claim ngam lo a, heti hian kan awm vel mai mai a ni ber.

Khawi ramah mah hian sorkar hian mi zawng zawng a chhawr vek seng lo. Hei hi hriain private sector lamah dan ṭha zawk leh mumal zawk te siamin, enkawlna ṭha tak hnuaiah ṭan a la ṭhin a. Keini chuan helam hi kan la hawi lo nasa. Kan hawi mai mai a, a tawpah tihngaihna hre lovin ram pawna hnathawh kan sawi mawi a. Unemployment problem solve nan ram dang sorkar hian a mi leh sate ram pawna hnathawh sawi mawi khumin tirhchhuah dan a ngaihtuah ve ang em? Sorkar hna awmchhunah a theih chen chenah a thiam leh tling zawkte aiin duhsak zawng kan la inthun zui a, intihtheih nan kan la hmang lehnghal emaw ni! Mithiam, an thiamna phu tawk hnemhnanpui tham hnathawh tur nei lo beidawng puah keh hun hi kan hlat tawh lo viauin a rinawm.

Hnathawktu dikna chanvo rahbeh a nasa a, chhan ho te te avanga thawktu inban leh hlawh in cut sak te, hlawh inpek duh loh te, rei tak tak hlawh inbat sak te a tam hle. Hnathawktuten security an nei ṭha lo a, hetiang harsatna hrang hrang laka mipui chhan tur hian sorkarin hma a la chak tawk lo ni mai lovin Labour Court kan nei lo hrim hrim a. Labour Law ṭha tak tak kan ngah a, mahse hman an ni mumal lo a. Minimum wages kan nei a, kum tin kan siam thar chungin private sector-ah hman a ni lo a. Zirnain leh mithiam chhawrna chi-ah thiamna phu lova man tlawma inchhawr a tam hle; kan in exploit a ni ber.

Labour Law hrang hrangin hnathawk­tute hamṭhatna tur a siam kan ngaihthah em em a. Hnathawktuin hamṭhatna leh securtity an neih loh laiin sorkar hnathawkten an nei ṭha em em thung a, hei vang hian sorkar hna lo chu eizawnna hnaah pawh kan ngai thei ta lo a nih hi.

- Eddy Zosangliana Colney