In chhung aṭangin...

Pawikhawihna leh sualna chi hrang hrang social media-ah leh chanchinbu lamah nitin chhiar tur leh hmuh tur a awm a, sualna chi hrang hrangin min run a, khawtlangah sualna avanga harsatna leh buaina sawi tur a awm fo bawk.

Sualna ven dan tur leh, hmalak dan tur ṭha an sawinaah leh an ziahnaah hian, chhungkua, mahni in chhung aṭang bul ṭan a, hmalak tur a ni tih hi sawi foin, ziak fo mah se, duh aiin an sawiin, an ziak uar tawk lo deuh ṭhin ni hian ka lo hre ṭhin.

Zirna in ai maha mihring nun siam­ṭhatna tur leh kaih­hruaina tur ṭha inzir­tirna hmun duhawm leh ṭha chu in chhung hi a ni. Sual venna tur kawnga hma kan laknaah hian in chhung aṭangin bul kan ṭan hmasa ber tur a ni a, a sawt ber bawk ang. Nun siam that nan mahni in chhung tluka inzirna ṭha leh duhawm a awm lo. Nu leh paten an fate hi in chhungah a tam thei ang ber Pathian thu nen thu ṭha hrilhin, an sualnaah zilhhau se khawtlanga sualna tam tak hi chu a kian ngei ang.

Sualna hi chhung­kua aṭanga ven kan tum hmasak loh chuan sual do kawngah leh ven kawngah hian kan hlawhchham fo dawn a, kian lam pan a hnekin a pung tual tual zawk ang. Chuvang chuan sual do kawngah hian keimahni inchhung khur theuh aṭanga ṭan kan lak hmasak a ngai ta a ni. Kan nupui pasal, kan fate sualna hi keimahni inchhungah ngei kan siam ṭha thei lo a nih chuan pawn lamah chuan thil theih loh ang tluk hial a ni.

Tin, sual kan do dawn a nih chuan kan nunah entawn tur an hmu tur a ni. A zirtirtu engmah nih si loh chuan a zirtir atan chuan chu zirtirna chu nun pui har tak tur leh, zawm har tak tur a ni. Pathian thu-ah pawh, 'naupang chu a kalna awm kawngah chuan zirtur ula, chu chu a upat hnu pawn a thlah lovang,' a tih a ni a. Kan fate a tam thei ang bera thu ṭha hrilh kha nu leh pa nihna anga kan tih tur a ni. Tin, fate tana entawn tlak tur khawpa nun uluk a pawimawh hle.

Sualna dona kawng­ah leh a venna kawngah chauh pawh ni lovin, dik­na, rinawmna, taih­makna, huaisenna, tawrhchhelna, hawih­hawmna te leh, nung­chang mawi leh ṭhate pawh hi in chhungah kan in zirtir bawk tur a ni a, kan in chhung aṭang kan nun pui hmasain, bul kan ṭan hmasa phawt tur a ni.

In hi engkim zirna hmun ṭha ber leh duhawm ber a ni a, ram siamṭhat kan duh a, khawtlang nun siamṭhat kan duh a nih pawn in chhung aṭang kan ṭan hmasa ber tur a ni.

Chhungkaw inen­kawl­na a ṭhat chuan khawtlang inenkawlna pawh a lo ṭha mai ṭhin a, in chhunga inenkawlna a chhiat chuan khawtlanga inenkawlna pawh hi a lo chhe ve mai ṭhin a ni.

Engkim siamṭhatna kawng dik ber leh ṭha ber (a awm chhun pawh a ni hial ang chu) chu in chhung hi a lo ni. 

Khawtlang siam­ṭhat i duh chuan i in chhung aṭang bul ṭan la, ram siamṭhat i duh a nih pawhin i in chhung aṭang tho ṭan ang che.

- Nawlchunga Chinjah, Siaha