MZU HI KAN HRE CHIANG EM? (Vice-Chancellor nghet neih thuai kan mamawh)

Kan chanchinbu darh zau ber ber leh rintlak ber bera ngaih te meuh pawhin Mizoram Governor hi “Mizoram University (MZU) Visitor” an la ti nulh nulh chu a ni a. Kan IAS Officer Pensioner (Chief Secretary hlui) te meuh pawhin President of India hi MZU Chancellor tiin an lo la sawi bawk. Higher Education lamah hian kan la hriatna a la bil deuh em ni?

India ramah hian UGC Recognised University 800 (zariat) chuang a awm a, chungte chu Central University te, State University te, Private University leh Deemed University te an ni. University zirna kalphung (academic)-ah te, University te Grant pek chungchangah te leh University te inrelbawlnaa an zawm tur Dan leh Hrai zam thlenga thuneitu chu University Grants Commission (UGC) a ni a, Govt. of India hnuaia Autonomous Body a ni.

University zariat chuang zingah hian “Central University” kan tih mai, Central Sorkar ta, Central Sorkar-in direct-a a enkawl bik hi 47 a awm a. University inrelbawlna tur leh hmasawnna tur sum leh pai zawng zawng Central Sorkar-in a tum vek a ni. Central Sorkar fachuam an nih tlat avangin Asst. Professor (tun hmaa Lecturer kan tih ṭhin), Asso. Professor (tun hmaa Reader kan tih ṭhin) leh Professor te pawh Central University-a thawkte chu University dang lakah chuan an induh deuh larh ṭhin. Central University te hi Central Sorkar ta an nih avangin Ministry of Human Resource Development (MHRD)-in a enkawl a. Chutihrualin Central University tin te hi a hran ṭheuha Parliament-a Dan pass thlapa din an nih hlawm avangin Autonomous Body an ni a, anmahni chhungkaw inrelbawlna-ah MHRD hi direct-in a inrawlh lem lo. Mizoram University (MZU) hi Central University 47 zinga pakhat a ni a, MZU tan liau liaua Parliament-in Dan a pass tak, The Mizoram University Act, 2000 (No. 8 of 2000) hmanga din a ni.

Kan media te leh Mizo pa challang, mithiam pui puia kan ngaih te leh kan Politician te meuh pawh hian University inrelbawl dan hi kan lo la man lo em mai a. MZU-ah hian tu nge Vice-Chancellor, tu nge Chancellor, tu nge Visitor tih hi kan la hriat pawlh nawk mai. Central University-ah chuan President of India hi a hotu lu ber a ni a, “Visitor” ti-a koh a ni. MZU-ah pawh hian Vice-Chancellor Chair-na hnuaia thuneitu hrang hrang University Court te, Executive Council te, Academic Council te, Finance Committee leh Body hrang hrang pawimawh tak tak a awm a, chungah pawh chuan President of India aiawh, “Visitor’s Nominee” an tel ngei ngei a ngai a ni. Tin, Central University awmna State Governor apiang te hi kha University-ah khan “Chancellor” an ni nghal zel a ni. Amaherawhchu, MZU bikah hian tihsual palh an nei nge, The Mizoram University Act, 2000 an pass khan “Chancellor” post hi khawi lai Provision-ah mah khan a lo awm miah lo mai a. Chuvangin MZU hian a din tirh aṭangin Chancellor hi a la nei ve miah lo a ni.

Chutia Chancellor nei lova kan awm bik vang chu nge ni, Parliament-in Mizoram University (Amendment) Act, 2007 (No. 24 of 2007) chu 28th May 2007 khan a pass leh ta a. Chutah chuan Mizoram Governor chu “Chancellor” ti ta lo chuan “Chief Rector” tiin a dah ta daih a. Tun dinhmunah chuan Mizoram Governor, Lt. Gen. (Retd.) Nirbhay Sharma hi MZU Chief Rector a ni tihna a ni a, amaherawhchu MZU inrelbawlna-ah thuneihna engmah pek a ni lo. “Chancellor” leh “Chief Rector” te hi a hming mai, “Nominal/ Decorative Post” a ni. University inrelbawlna-a thuneitu tak tak chu “Vice-Chancellor (VC)” an ni. Central University inrelbawlna-ah state sorkar-in thuneihna a nei lova, a inrawlh a thiang hek lo.

Tuna kan buaina lian ber, Vice-Chancellor nghet lo neia rei tak kan awm hi a pawi hle mai a. Vice-Chancellor nghet an awm loh chuan hna sang chin lak te, hmasawnna hnathawh leh administration thlengin a tiṭhuanawp a ni. Vice-Chancellor hi President of India kher kherin a appoint a ngai a. VC thlan dan leh ruat dan kalphung pawh hi kan hriat ve a ṭha-in ka hria. VC thar tur atana a tling awm deuh melh kualtu tur Member pathum awmna Search Committee din tur a ni a. Chung zinga pakhat chu President of India aiawh, “Visitor’s Nominee” a ni ang a, he Committee-ah hian Chairman a ni nghal ang. Member dang pahnih chu MZU Executive Council-in an nominate ang. Heng Member pathumte hi MZU hnuaia thawk emaw, MZU nena inkaihhnawih reng renga telna nei an ni tur a ni lo. Tun hma kha chuan Search Committee hian MZU tlawhin zirtirtu, zirlai, alumni, zirlai nu leh pa, Local NGO, etc. te interaction neihpuiin VC atana an mi duhzawng, eng ang mi nge an duha an mamawh tih te an sawipui

ṭhin a, hming hmerha tu emaw recommend erawh an phal ngai lo. Chumi aṭang chuan MZU-a thawk lai emaw, University dang daiha thawk emaw, University-a thawk kher lo pawh emminent scholar, vision nei ṭha, administrative experience nei ṭha ni-a an hriat mi pathum aia tlem lo VC atan an chhawp chhuak ṭhin a. Chung an mi chhawpchhuah aṭangte chuan President of India-in a duh ber a lo thlang a, VC atan a appoint ta ṭhin a ni. Search Committee te nena interaction hi vawihnih (VC appointment vawi hnih) lai chu kei pawh hian ka lo hmachhawn ve tawh a ni. A chunga kan sawi bak khi VC atan pawh Qualification dang a awm tehchiam lo. Tin, VC post hi a dila dil chi pawh a ni hek lo. Chuvangin tun hma kha chuan Central University dangah pawh Reader (Asso. Professor) te, Sipai Brigadier te, Service danga mi pawh VC atan an ruat nawlh nawlh mai a ni.

Amaherawhchu, UGC-in kalphung a thlak a. UGC Regulation 2010-in VC ni tura qualification ngai chu hetiang hian a sawi, “Persons of the highest level of competence, integrity, morals and institutional commitment are to be appointed as Vice-Chancellors. The Vice-Chancellor to be appointed should be a distinguished academician with minimum of ten years of experience as professor in a university system or ten years of experience in an equivalent position in a reputed research and/or academic administrative organisation.” Chuvangin, tunah chuan VC ni thei tur chuan kum 10 tal Professor an nih a ngai tawh a nih chu. Tin, VC Selection pawh kalphung a danglam leh hret a. Tunah chuan a dila dil theihin an hawng ta a. Search Committee pawhin University tlawha Local Body hrang hrang te kawm kual tawh lovin New Delhi-ah VC post diltute a interview ta zawk a ni. Chuta

ṭang chuan mi pathum aia tlem lo thlang chhuakin chung an thlanchhuah zinga

ṭang chuan President of India-in VC tur chu a lo thlang ve leh ang a, appointment a pe ang. President of India hian Search Committee-in an chhawp chhuah zingah duh pakhat mah a nei lo a nih chuan VC tur zawng ṭha leh turin a ti thei bawk.

File engkim khawihtu hi MHRD an nih avangin tuna kan harsatna lian ber pawh hi MHRD lam inthlahdah vang emaw, Politics inrawlh vang emaw a ni thei. Centre-ah BJP an sorkar a, Mizoram-ah Congress an sorkar bawk si. Kan Lok Sabha MP lahin kan Mizo Professor pakhat hming hmerh meuhin a lo recommend thul. MZU hi Central University mah ni se a neitu leh a chhawrtu tak tak chu Mizoram a ni miau a, chuvangin a chhiat a ṭhatah kan State Sorkar leh Mizo mipuite pawh kan ralbang ngawt thei bik chuang lo. Chuvangin, VC ṭha tak, chak tak, vision nei thui tak, huaisen tak, discipline ṭha tak kan neih thuai theih nan Politics thila duhsak zawng neih emaw, hamṭhatna lak emaw tum lovin Mizo mipuite theihtawpa kan ṭan tlan a ngai a ni.

Kan sawi ta duah a, MZU Visitor, Chief Rector leh Vice-Chancellor te chu kan hrehrang tawh ang chu maw? University te hi zirna in an nih piah lamah zirbingna hmunpui (Research Centre) an ni tur a ni a. Chumi aṭanga Research Finding te chu sorkar tan a chhenfakawm em em ṭhin a, University mithiam te chu sorkar inrelbawlna leh hmasawnna atana ruahmanna siam chungchangah pawh an ṭangkai em em ṭhin a ni. Chuvangin, a chhungril inrelbawlna-ah a inrawlh tur a ni lo kan ti nachungin State Sorkar pawhin MZU hi thawhpui thiam sela, ram tana hmasawnna tluantling duanchhuah kawngah pawh nasa takin a chhawr ṭangkai ngeiin a rinawm.

- James Ramdinmawia