POLITICS BALL MAWL
Kolkata-a Salt Lake Mizoram House-ah vai pathian lim dah a ni ta, an rawn ti kulh mai a, a hnu lawkah a sawifiahna ni àwm tak, Puja laiin thawktuten an dah ve ṭhin, rei lote atan a ni e.... tih lam kan hmu leh. MNF President, Pu Zoramthanga'n an Kohhranah Sande Sikul zirlai a khaikhawm, a chhuanawm an rawn ti leh kulh mai a, Kohhran hruaituten biak inah mobile phone hmanga thla lâk an khap an tia ni lo'm ni.... tih lam kan hmu zui leh a... sawi chhawn tlâk loh khawpa politics ball mawl ni mah se, hetiang hian mi ṭhenkhat rilru a hruai engemaw ve theih avang leh, hetiang thil nawi te te hi thu tling ang deuha ngai an awm ve ṭhin avangin sawi zui deuh ka duh tlat.
Salt Lake Mizoram House-ah chuan vai pathian lim chu kum tluan pawhin dah se, sorkar leh ram tan engnge a hnawkna? Kan Kristianna a tidal tihnaah kan ngai em ni? Hetiang mai mai kan puanzar duh aṭang ringawt pawh hian, kan rilru puthmang hi a chuti lutuk lo ang tih hi ka rin dan a ni. He milim hian Congress party emaw, sorkar ding lai emaw, Mizo mipui emaw a tihhmaimâwkna ka hre lo. Mizoramah Hindu zirtirna theh darh an awm, te hi kan ti emaw ni? An awm ve ang chu mawle.
Keini pawhin heti khawp hian ṭhahnem kan ngai a, sakhaw dang pawhin an bei ve ang chu. Mi dang hnungkhirh veka duh tâwka tàl châk reng hi a Kristian em emna ka hre lo. Thih thlenga rinawma awm a, nunna lallukhum chang tur kan ni zawk. Kan zalèn lutuk hi kan chhe zo tawh a ni zawk lo maw? Ualau taka conservative, rilru liberal si hi kan tam teh e.
Pu Zoramthanga pawh chu, an Kohhranah Sande Sikul zirtirtu pakhat a ni a, a khaikhawm ni a thleng ve a ni mai ang chu. Mi dang pawhin an khaikhawm ang. Chuti taka sawi mawi emaw, sawi nawi emaw tur awm lo, thil naran a ni. Fak tehchiam tur a awm lo, beihna tur lah a awm hek lo. Ram rorelna leh politics nen phei chuan inzawm lo tak a ni. Thil inzawm uk lo inzawm luihtir hram kan chin avang hian, inthlan dawnah pawh kan thlan turte nih dan tur leh kan tehna tur kan hre lo fo tawh. A ṭhen hi chuan YMA hruaitu fel tak ang deuh kan zawng a, a ṭhen hian kan mamawh apiang kan dapna tur, buhfai ip leh gas bur thlenga suan nawlh nawlh ngamna tur kan duh a, chu chu anmahni ngei pawh hian an nihna tur emaw an ti a, an tih tur tak aiin a behbàwmah a buaitir mek a ni.
Chumi kal zelah chuan hruaitu ṭhenkhat chu ram tana thawh tak takna hmun aiin, damdawi in leh khawhar inah kan hmu tam zawk reng a, unit hruaitute hrilh chawpa damlo kan leh mitthi rál reng rengin an buai a, ram leh hnam humhalhna thil tak takah kan ngawi leh tlat fo si a nih hi. Kan roreltute hi - Biak Inah, khawhar inah, damlo inah te zawng lovin, ram rorelna thilah zawng ila, i teh ang u. Chutiang hmunah te chuan Kristian, ṭhenawm pa leh Mizo an nih avangte chuan an kal ve tho ang.
Kan tehna ber tur erawh chu lamlian, buhfai, gas, eng, tui, zirna, hriselna, thlai thar hralhna, hnathawh manhla leh awmze nei, contract leh supply hlawk uchuak tihbo, Chakma, Mizoram ramri... tih lam ni zawk teh se. A tak aia a lem vawrh lar hi a ninawm riau tawh!
- RK Lianzuala