Real Last an ti maw...? Chawlhtir a hun chiah

Kum 2018 ah Mi­zoram chuan Gene­ral Election a lo hma­chhawn leh dawn ta. Zoram mipuite engtin nge ngaih­tuahna kan siam dawn? Kan ram hruaitu tur kan thlannaah hian kan tana hlawkna awm nge kan thlan dawn, Zoram tana hlawkna leh kan bial hmasawnna ngaihtuahtu tur hi le. Candidate te chauh lo chu a vote theih si loh, a va hahthlak em!

Candidate turin kum a upa lam hi an paurau duh zek leh nghal, tar lama ropui loh hlau zek zekin Politics an khel a, Zoram mamawh mihring ka ni em pawh tih lam ngaihtuah lovin Politics a thuneihna an chak huam huam mai si. Ṭhenkhat phei chu an vanglai hun zawng zawng sorkar hnathawh nan an hmang ral a, an hlawh phu lovin an rawn hausa chhuak a, lal taka an awm laia an nuam tihna chu kham lovin tlai khawhnuah ram an rawn hmangaih ve a, ram hi an hmangaih a nih chuan an sorkar hnathawh vanglai khan ram siam ṭhat tumin hma an la em tih han en ila hmuh tur awm si lo. Thiam takin “Sorkar kalphung ṭha lo kan hria kan thawk rei tawh a, siam ṭhat a ngai a ni” an ti dup dup a, mahse an thinlung chhungah chuan Lalna leh thuneihna mai bakah sum a lo inphum ru reng mai si. A va hahthlak em!

Pension tawh hnu-ah ram an han vei a, Party-ah sum an lo pe hnem ve bawk si nen ticket an han chang ta ngei a, candidate an nih tawh si chuan party mite chuan vote a lo ṭul leh si ṭhin. Mipuite chuan an duh emaw duh lo emaw duhthlan a ngai bawk si, tui lo tak taka vote thlak an awm laiin a ti thei bau lo chuan an party candidate pawh an vote lo hial reng a ni.

Upat pension tawh hnuah Politics an khel, real last an ti, hawh u real last an tih hi i dem lo ang u, anmahni tan a ni bawk a lo ti ve mai mai sela. Mahse real last ti te hi vote loh hun chiah emaw candidate a dah loh hun chiah an ni tih hi mipui lam emaw party hruaitu lam te hian lo hre ve thung tawh ila a ṭha lo maw? Pension tawh hnuah hi chuan an tha a za zak tawh lo a, ‘real last’ an tih phei hi chuan a next-ah din an tum tawh loh avangin an last term-ah hi chuan anmahni leh an chhungte tan an bei a. An bial an ngaihthah tawh a, bial hmasawnna leh mipuiin an tuarin Party pawn a chhiat phah ṭhin.

Chuvangin, real last tih a nih tawh chuan ding lo tura tih hun chiah a ni e tih hi Zoram mipuite hian i lo hre let thung ang u aw... I vanglaiin i ram tan thawk la, i pension hnuah chuan hahdam tawh rawh le.

- Zoremsiama, Aizawl