Central-in ZMC la hram se

Ka thiam leh phak tawkin ka zir a, mithiamte rawn chungin. Central kuta ZMC hlan tha ka ti e, kan state duh dan anga an lak theih chuan. Kan state-in seat 50? a hauh a, keichuan 20%-30% pawh chang ila ka la duh tho. State leh central han in dawr chho ang a, state-in quota a hloh vek dawn chuan central hi an pe lo ngam turah keichuan ka ngai.

Tunlaia darh, NEIGRHIMS ah a awmna Meghalaya-in seat an nei lo tih nen chuan kan state-in central enkawltir a tum dan hi chu a in ang lo deuhah ka ngai. NEIGRHMIS chu central din liau liau. Tuna central enkawl ve tho RIIMS ah chuan a awmna state Manipur chuan seat MBBS seat awm 125 ah seat 30 an chang a ni.

Zirtirtu ti mai ang ka hriatthiamve dan, zirtirtu lak chungchangah pawh central ta a nih chuan Mizoramin a pek theih bak an hlawh theih dawn bakah, central mitah chuan Mizoram hi hard post a nih miau vangin hard post awm man hlawh pangngai bak an hlawh ṭeuh thei dawn. Tuna hlawh zat ngawt ai chuan mi ṭha lakluh chu a awl deuh ngei ang le.

Tin, tunah hian Mizo eng emaw zat ZMC-ah hian an thawk mek a, a tam zawk daih an ni awm e. Chungmite hlawh pawh chu tun aiin pung ngei dawn a, kan ram chhungah sum leng vak a tam belh phah dawn tihna a ni.

Central enkawl MZU, RIPANS, Vety College te han thlir hian central enkawl nge nge chu a changtlun chakzia kan hmu ang. ZMC pawh central enkawl a nih chuan zirtirtu piah lamah infrastructure lamah pawh hma kan sawn ngeiin ka ring a, ka ring dik bawk ang.

Mizoram ang state rethei tan chuan tupawh sorkar se medical college ropui tak din a theihin ka ring lo, thawktu hlawh bakah pawh senso a sang e mai.

Tin, ZMC kan neih hnu hian college upa zawk leh changtlung zawka kan seat neih kan chan ṭeuh. ZMC central kuta a awm chuan kan hmulet nual thei mahna. State sorkarin dilna an thehluhah hemi peklet dilna hi a telin ka hria.

Tunah hian ZMC ah hian seat 100 awmin, Mizoramin seat 70 changin, Non Resident Indian tan seat 15, a bak dang seat 15 central ta a ni. Central-in lo la ta pawh nise tuna zir mek Mizo doctor 250 chuang kan nei thar dawn. ZMC ah 20?-30% kan la chan tho a, hmundanga kan seat kan hmuhlet ṭhen bawk chuan doctor lama kan harsatna zualpui chu a kiang thoin ka ring.

Tin, ZMC central-in la se ka tihna em em pakhat chu - sorkar hnathawk hlawh, pension hlawh, sorkar inrelbawlna (Revenue Expenditure) tihhniamna atan a ni. ZMC hi central kuta a awm a nih chuan ZMC a thawkte hlawh, inrelbawlna, khawl man etc. central-in an tum vek tawh dawn a, hei ringawt pawh hian keini ang state tan chuan thlakhlelh awm tham a ni.

Sorkar hian sum lakluhna kawng dap leh a hmanna titlem zawnga kal a mamawh tak zet zet a ni. Privatisation lamte hi uar deuh deuh se keichuan ṭha ka ti viau. ZMC pawh hi central hian seat min chhuhsak vek si loin la hram se ka va ti em.

- Malsawmdawngzela Hrahsel