WORLD PHARMACISTS’ DAY 25th SEPTEMBER FROM RESEARCH TO HEALTH CARE: YOUR PHARMACIST IS AT YOUR SERVICE

Mizote hian tunlai damdawi (allopathy) kan hmelhriat ṭanna hi rei a la ni lo va. Kan Zosap missionary-te khan tihdam rawngbawlna an han ṭan chhoh khan kan hmelhriat tak tak ṭan niin alang. Hmanlai hun aṭanga vawiin thleng hian tihdamna lama thiamna neite chu khawtlangah pawh mi te ngaihsan leh mi ṭangkai an la ni chho zel a ni. Damdawi lam thiam mi chi hrang hrangten damlo an enkawlna hmanraw ṭangkai ber pakhat chu damdawi hi a ni. Damdawi kan sawi a, a kila lung ṭangkai tak lo ni ṭhin Pharmacist-te pawimawhna leh mi dangte tana an rawngbawlna i thlir ho dawn teh ang.

Pharmacist chu damdawi siam chhuaktu leh a nih dan tur dik taka damlote hnena pe a, chu damdawi chuan hna ṭha thei ang ber thawk thei tur leh damdawi ei avanga thil pawi thleng thei te veng a, enkawl thei tura thiamna neite hi an ni. Ram changkang zelah pharmacist-te pawimawhna a tam tual tual a, damdawiin mai ni lovin kawng hrang hrangin Pharmacist-ten mipuite hriselna atan hna an thawk zel a. Kan ram ngeiah pawh Pharmacist ṭheuh

ṭheuh pawh an hna thawh a inang lo ta nuk mai. A ṭhen drugs control department lamah te, a ṭhen damdawi hmuhchhuah kawnga zirbingna lamah te, a ṭhen chu zirtirna lam hna thawk te, a ṭhen damdawi siamna industry a thawkte leh mahni a sumdawnna neia khawtlanga tana thawkte kan lo nei ta. Tin, thiamna lamah pawh Diploma aṭanga Doctorate thlengin an awm ve ta nuk a, heng mi zawng zawng hi an vaiin Pharmacist tih hian min khaikhawm vek a ni.

Damdawi awmsa te hi hun a lo rei chuan a him tawk lohna te hmuhchhuah a ni chho zel a. Tin, natna hrik mak tak tak, tuna kan damdawi neihsain a tihhlum mai theih tak loh te a lo chhuak chho ve zel bawk a. Damdawi awmsa te him zawka hman a nih theih nana siam danglamte leh a thar ṭha zawk hmuhchhuah te chu tih makmawh a lo ni ta zel a. Chu damdawi siam chhuahna a hna thawktute chu tu dang ni lovin Pharmacist-te hi an ni. Pharmaceutical Science lama zirna in sang kan neih, RIPANS-ah pawh hian zirtirtute leh zirlaiten research nasa takin an bei mek a. Ramhmul damdawi hmuhchhuah leh tih hmasawn kawngah te leh computer software hmanga damdawi ṭha zawk siam chhuah kawngah te theihtawp an chhuah mek zel a ni.

Tunlaia cancer damdawi kan hman lar em em, man to tak Podophyllotoxin te pawh hi thlai aṭanga kan hmuhte a ni a, heng thlai te hi Himalaya tlang bul ṭhut, Arunachal Pradesh, Himachal Pradesh, leh Sikkim-ah te a awm a. Kan ram chhungah pawh hian kan pi leh puten damdawia an lo hman ṭhin tawh la zirchian si loh ṭha tak tak a va tam dawn tak em! Heng te hian dap chhuak a, hmang ṭangkai turin zirbingna (Ph.D) zo tawh te leh la ti mekten hma an la zel a ni. Tin, Mizo nula leh tlangval ṭhahnem tak damdawi siamna industry luhchilh an awm ve ta zel a, India ram khawpui hrang hrangah damdawi siamna company lian tak takah Mizo nula leh tlangval te an bung ta suau suau mai le.

Damdawiin lama Pharmacist thawkte hi Hospital Pharmacist tiin kan sawi mai a. Anni hian damdawi chu uluk takin, a nihna ang tur thlapin an enkawl a, damdawi dahna hmun (storage) enkawl leh a semchhuahnaah pawh a dik thei ang berin an ti ṭhin. Damdawite hi a vawn ṭhat dan tur dik tak anga vawn ṭhat a nih loh chuan a chhe hmain an expiry date a thlen hma hian an expire ta mai a, damna dawi ngei kha kar lovah thihna tur hlauhawm takah a chang thei ṭhin. Damlovin damdawi ṭha leh dik tak a hmuh theihna turin theihtawp an chhuah reng a, sawrkar Healthcare Scheme te pawh hi Pharmacist te enkawl a ni.

Tunah chuan Clinical Pharmacist kan tih te, Doctor of Pharmacy (Pharm D) kan tihte an lo chhuak thar zel a. Damdawiin lama kan damdawi in pek dan pawn hma a sawn ta niin a lang. Clinical Pharmacist-te hian doctor te damdawi chawh damlote hnena pek a nih dawnin damlo dinhmun zirchiang hmasain damlo tana damdawi hman tur dik leh ṭha ber leh damdawi nghawng ṭha lo awm loh theih dan turin a dose chungchangah te a pek hun leh a damdawi ei tur dik thlan thuah hna pawimawh tak an thawk ṭhin a ni. Tin, damlote hnenah an damdawi ei chungchanga hriat tur ṭul in zirtirin (patient counselling), damlote tan zirtirtu pawimawh tak an ni. Khawvela ram ropui ber USA-ah khuan kum tinin mi 44,000-98,000 vel hian natna enkawlna atana damdawi hman dan dik tawk lo avangin nunna an chan niin tarlan a ni a, zir chiang ve ila kan ramah hian eng ang taka nasa ni ang maw!

Mit lawnga en mai pawh hian Phar­macist chuan damdawi chu a hming inziak leh thil dang inziakte a nih tur ang a ni em, a rawng leh a lan dan hrim hrimah a nih tur ang ni lo deuh a awm em tih te a hre hrang thei mai ṭhin a. A aia thuk zawka en dik tur chuan laboratory-a test a ṭul ṭhin. Chung laboratory-ah chuan Pharmacist thiamna sang tak tak neiten damdawi a thianghlim tawk em tih te, a awm tur zat a kawma inziak ang chiah kha a awm em tih te leh endik tur ṭul dang dangte an lo en fel a. Damdawi

ṭha lo zawrhchhuah a lo awm chuan rang takin lak let tir a, dan hnuaiah hremna te pek ṭhin an ni. Tin, damdawi mai ni lovin heng kan ei tur siam leh zawrh chhuah danah pawh hian en fel ngai a awm fo a, hengah hian Pharmacist-te hi an ṭangkai em em a ni.

Mizoramah Food testing laboratory te kan la neih loh avangin heng SSA Mid Day Meal-te leh mimal industry-ten eitur an siam chhuah te test nan hian Department of Pharmacy, RIPANS laboratory hi ṭangkai taka hman a ni mek a. Bekang eisual te, zu chhe in vanga harsatna tawkte an awm hian heng an sample te hi RIPANS lama laboratory-te hian a lo en dik mai ṭhin a ni. Kan ramah hian mithiam indaihlohna avangin pharmacy-ah te pharmacist an la awm reng hman lo a, hei vang hian mumal zawka damdawi zawrh chhuah a nih theihna turin Mizoram pharmacist-te chuan damdawi dawr an vil chungchangah nasa takin hma an la mek bawk.

Mizoram sawrkar chuan Health deapartment hnuaiah Food and Drug Administration (FDA) wing changtlung tak kan nei a. He department-ah hian kan Pharmacist mithiamten ṭangkai takin hna an thawk chho mek a. Anni hian dan hmangin mipui hman tur damdawite an enkawl mai bakah dan loa damdawi tawlh ru ṭhin te ti rem turin theihtawp a chhuah reng a ni.

India ram pum huap ang pawha damdawi hman dan kawnga hmasawnna lian tak kan hmuh thar chhoh zel chu Pharmacovigilance lam hi a ni. Pharmacovigilance-ah chuan damdawi kan hman mekte side effect vanga thil ṭha lo thleng te chu report siamin mumal taka lakkhawm a ni a. A ṭobul te zir chiangin chutiang ang thleng leh tur te chu a ven hna a thawk ṭhin a ni. Pharmacolovigilance program hnuaiah hian Pharmacist-ten hma an la mek a, central sawrkar India rama Medical College hrang hrangah te, sawrkar leh private damdawiin lianah te leh District hospital thlengin Pharmacovigilance Programme of India (PvPI) center dinin Pharmacist mithiam tak takin hma an la mek zel a. Hetiang PvPI centre te hi kan Civil hospital-ah te hian nei thei tawh ila chu a va ṭha dawn em!

Pharmacist te hna ṭangkai tak dang leh chu damlo enkawltute, damlo leh mi nawlpui hnena damdawi chungchang hrilhfiah a ni. Deparment of Pharamcy, RIPANS chuan Drug Information centre (DIC) changtlung tak siamin, phone number 8730955168 ah SMS leh whatsapp hmangin emaw dicripans@gmail.com ah zawhna a zawh theih reng a ni. Damdawi hmuh chhuah aṭanga i hnen a lo thlen thengin hrisel taka i awm theihna atan, i tan Pharmacist.

- R. Vanlalruata Asst. Professor, Department of Pharmacy, RIPANS