SEPT 14 BANDH

Chawlhkar a liam fel tawh nachungin Sept 14 bandh chungchang kha tlem ka han sawi thar ve leh teh ang. Kha bandh kha a huaihawtute chuan mipui thlavang hauh nan an ti a, Mizo ṭawnga ‘thlavang hauh’ kan hman dan nen chuan a inmil lem loin ka hria. Bandh hmanga thlavang in hauh sak ṭulna chhan tur pawh kei chuan ka hrethiam lo. Thlavang hauhtute chuan thlavang an hauhsakte chu an chhan ṭhin a, an thlamuan a, an harsatna an sut kian sak ṭhin a ni ngai a. Mipui thlavang hauh inti a, an thlavang hauhsakte tana nitin nunphung tih khaihlak tlat zawk hi ka hrethiam thei lo a ni.

Bandh hi vai tih dan kan lak kan ti ṭhin nachungin Mizote hlei hlei hian kan lawm za ber zawk niin a lang. Tumah pawn chhuah loh tur an ti a, i-he lovin kan zawm dual mai a. Sawrkar lam lahin zirna in leh office kai vek tur tiin thu a chhuah bik lova, holiday a puang ve nghal mai ni te pawhin a lang zawk a ni. Hei hian bandh-in a tum ber kan thlawp em em vang pawh ni lovin mipui mimir hian a huhova chawlh hman dual mai chu kan hreh lo vek zawk tih a lantir chiang viau. Chawlh ngaina hnam niin sawrkarin holiday tih tlem a tum pawha ter at mai ṭhin kan nihzia pawh a lang chiang hle.

Bandh huaihawt chhan ber aimahin chawlh hrim hrim mai hian bandh hlawhtlinna tak tak a hril em tih chhut ngun a ṭul. A huaihawttute lahin khatia mipui nawlpui kan tawmim ta thup mai kha a hlawhtlinna berah an ngai zawk ta emaw ni tih turin kan awm ta. Mipuiin min thlawp ṭha em a tia lawmthu sawi nan hun bi tiam hmain an pawt tawi ta a ni. Zing dar 5 a ṭan kha school leh office ṭan hun dar 9:30 ah kha chuan tumah hnathawh zai rel an awm lo tih a hmuh theih hman a. Chuvangin, mipuiin an thlawp ṭha tia hun bitiam pawt tawi tur an nih law law chuan chawhma dar 10 velah chuan bandh kha a hlawhtling tiin an sut fel theiin ka hria.

A thu hrimin Mizoramah hian lungawi loh emaw thil kar neih vang emaw a bandh huaihawt hi kan hre ve ta fo a. Mahse hunbi tiam chin thleng zaka bandh erawh hriat tur a vang khawp mai. Kan ti ngam ta rau rau a nih chuan hunbi tiam thleng ngam tura buatsaih ṭhin tur a ni. Truck neitute leh khalhtute nuar pawh kha darkar khat leh a chanve chhung pawh an nghak thleng pha lo a nih kha maw.

Sept 14 bandh kha a huaihawttute chuan hlawh­tlingah an ngai a, a dikin ka hriatpui. An hlawhtlinna ber chu kawn pawimawh leh lun lai laiah an pungkhawm a, sawrkar dinglai sawiselna leh sawtna hrang hrang titi hovin an ṭhukhawm thei kha an hlawhtling a ni. Kawngpui hmun hrang hrangah mi sawmli sawmnga leh a aia tam fe pawh duty turin an chhuak ni awm tak a nih laiin chanchin thar lama TV cameraman te fan kual lai tak erawh chuan tukṭhuan ei tura a tam zawk an haw rem lai a ni tlat thung.

Hmanlai chuan khawtlanga chhiat tawk emaw rikrum thil emaw a awmin lal leh upaten awmni an kham ṭhin. Kut ni vangthla leh khuangchawi thilah te pawh awmni an kham ṭhin a, khawtlangin lungrual takin an zawm mai ṭhin. Chutiang deuh chuan keini pawh hian a ṭulna leh chhan ṭha taka thil kan ti duh a nih chuan vai tih dan a bandh ti lovin awmni kham ve mai na chang hi hre ve tawh ila a dik zawk ang.

PWD Principal Secretary hova engineer rual ṭhu­khawmin chet lak dan tur an sawiho zui ta te, CYMA General Conference, Cham­phaia neih tur thlira Home Minister hova chet lak dan tur an ngaihtuah vat vat mai te kha September 14 Bandh rah chhuah a nih chiah ka ring thiam lo.

- Zothankunga