BJP leh MNF inkar thu hi

Tunlaia titi luahtu pakhat chu MNF-in tuma zawh lova "Kan mal din dawn," an ti tlat reng mai hi a ni.

Sikulah classroom-ah thil a bo a, a larutu an zawn hian a la ru ber hi chuan zawh hma hma hian, "Kei chu ka ni lo," hi an ti lauh lauh fo mai a, chuvangin MNF mal din tur hian ngaih an ti ṭha lova, NEDA inkhawmpuia Delhi lama BJP President Amit Shah hnuaia an zuk kun khan ka ngaih ṭhat lohna hi a nemnghet ta tlat hian ka hria a, a hre chiang deuh ziah balhah kan thai lang ta hial a ni.

MNF chu ni ila tun aṭang hian BJP thawhpui tur hi ka ti lang law law ang a, tichuan inthlan a hnaih meuh chuan BJP hlauhawm loh zia leh political party pakhat ve mai an nih zia hi mipui ka hrilhfiayh hman tawh ang. Mipui hrilhfiah theitu lah chu an nei ṭha nasa mai si a, tunah hi chuan NEDA hnuaia ana wm avanga BJP an zawm loh thu a sawi bakah a tel ve lo thleng thlengin NDA hnuaia awm angah khan a han puh ta dah a, BJP hi an kawm duha nih chuan langsar takah kawm law la wmai se a ṭhat ka ring zawk a ni.

BJP hi Hindu party an ni bik lo tih lantirna angrengin tun hnaiah MP pawh ni lo Kristian IAS retired pakhat chu minister-ah an han dah lut luah mai a, hengte hi MNF ṭan fung tur a ni ngai a, tunah chuan kohhran lam ṭang lo nih hlau si, Amit Shah leh Modi lam ṭang lo nih hlau bawk siin an tuai din zum deuh zui mai a, an khawngaihthlak hi ka ti nia.

BJP hi Congress aia an thawh ṭhat loh emaw, kan hnam tana an hlauhawm falna emaw kei chuan ka hmu ve thiam lova, chuvangin he political party ṭhang duang tak hi MNF hian langsart tak hian thawhpui law law se, tuna zep deuh ṭit ṭeta an kalpui dan ka en hi chuan thawhpui atana an duh hi an zahpui a, kawppui atana an it hi an iai ru deuh bawk si ni hian ka hria a, a buaithlak thuah hnih thuah thum vel mai mai a ni.

MNF hian BJP lam ṭang an nih hi zep lo mai se, an tan pawh a ṭha zawk ang. BJP inkhawmpui kohah NEDA hmaikawr vuahin an kal a, an zuk ṭhu lang kan hmu tho tho a, chhuanlamah Kiren Rijiju-te ram buai lai thil an sawipui teh daih a!

- Lalfakawma