Minister thar Vanlalawmpuii Chawngthu

Mizoram hi UT a nih lai khan Legislative Assembly inthlan ṭum li (4) lai awmin state kan nih hnuah ṭum sarih (7) lai a awm tawh bawk a, a vaiin Mizoramah hian Legislative Assembly inthlan hi ṭum sawm leh pakhat (11) a lo awm tawh. Chutih chhung zawng chuan pa-faa MLA ni thei chu tlem azawng chauh an lo awm tawh a. Amaherawhchu, pa-faa Minister hial ni thei erawh chu Mizoram history-ah hian a la awm ngai lo va, tuna kan Minister thar ni ta, Pi Vanlalawmpuii Chawngthu te pa-fa chauh hi an la ni! Mizoram history-ah mellung pawimawh tak an phun a tih loh theih loh vang.

Kum 37 leh ni 349-na a hman mêk lai ni September ni 22, 2017 (Zirtawpni)-a Mizoram Governor, Lt. Gen. (Retd.) Nirbhay Sharma'n Raj Bhavan Multipurpose Hall-a rinawmna thu tiamtira Minister of State atâna a lâk luh tâk Vanlalawmpuii Chawngthu hi Pu C. Chawngkunga (Ex-Minister) leh Pi Lalliankimi Sailo te inkarah a lo piang a. Thiamna lamah chuan M.A. (Political Science) a ni.

Kum 2013 MLA General Election khan tuna kan Chief Minister zahawm tak Pu Lal Thanhawla hi bial hnih, Serchhip bial leh Hrangturzo bialah ding kawpin a tling ve ve a. A chhuahsan tâk Hrangturzo bial chu bial ruak niin Bye Election hmanga bialtu tur thlan tur a ni ta.

He Bye Election-a rorel lai pawl Official candidate ni tur hian Minister atana lâk luh thar tâk hian 20th March, 2014 khan nomination a file a. Nomination a file aṭanga ni 22-na chiah, 11th April, 2014-ah inthlan niin inthlan aṭanga ni 35-na, May ni 16, 2014-ah Result puan a ni.

Kan Minister thar ni ta hian he Bye Election-a vote tla zawng zawng vote 11074 aṭanga 60.69% lai hmu-in vote 6721 a hmu hem mai! Amah hnaih bertu Independent candidate Pu H. Lalduhawma chuan 38.09% hmuin vote 4218 a hmu thung a, NOTA-ah 1.22% lai tla-in vote 135 a tla a, Hrangturzo Constituency chuan bialtu thar, MLA 40 rual zinga hmeichhe awm chhun a nei ta a ni.

Vanlalawmpuii Chawng­thu hi ni 1225 chiah chiah MLA a nih hnuah Minister atana lâk luh a ni a. MLA-a thlan tlin a nih aṭanga kâr 175 ral ni chiahah Minister atana lak luh a ni. Chhiarpui hnuhnung ber, kum 2011 chhiarpuiah khan Mizoramah hmeichhia 541867 lai an awm a, tunah phei chuan an pung viau tawh ang. Chuti kauva Mizo hmeichhe tam zingah chuan MLA-a thlan tlin nalh pali (4) chiah an la awm! Chu’ngte chu : (a) Lalthanmawii (b) K. Thansiami (c) Lalhlimpuii (d) Vanlalawmpuii Chawngthu te an ni.

Thlan tlin ni lova (nomi­nated seat) MLA ni tawh kan nei bawk a, kum 1972-a Mizo Union aṭanga an nominate Saptawni te, kum 1979-a PC aṭanga an nominate K. Thansiami (ani hi 1984-ah thlan tlin a ni ta nghe nghe) te, kum 1984-a Congress aṭanga an nominate Rokungi te an ni.

Thlan tlin hmasak ber chu kum 1978-a Serchhip biala PC ticket-a thlan tlin tak Lalthanmawii a ni a. Mahse, thla ruk chauh a kal hman tihah sorkar chu nam thl<k niin President's Rule-ah kan awm ta hlauh va. A kum leh, 1979-ah PC ticket thovin Lalthanmawii hi Aizawl East aṭanga thlan tlin a ni leh ta a ni.

Kum 1984-ah K. Thansiami chu PC ticket-a thlan tlin leh niin Aizawl West aṭanga thlan tlin a ni leh a. Chumi hnu, kum 1987-ah chuan Mizo hmeichhe zinga thlan tlin nalh nia Minister hmasa ber leh awm chhun ni ta ngar ngar chu MNF ticket-a Aizawl North - I aṭanga thlan tlin Lalhlimpuii niin Social Welfare leh Labour & Employment Department a chang.

Lalhlimpuii hian kum 30 chhûng teh meuh Mizo hmeichhe Minister awm chhun nihna chanvo a chelh chu ṭhiahin a awm ta a, Vanlalawmpuii Chawngthu hi Mizo hmeichhe zinga Minister hial ni thei pahnihna a ni ta a, Mizo nula zingah phei chuan Minister hmasa ber a ni ta!

Minister a nih chhûngin Pathian leh kan ram tân a Department chanpual enkawl se la, rorelna dik chu luipui anga luantir zel turin Pathianin a chungah malsawm ruahpui van-âwn surtir buan buan rawh se.

- Bma Hlawndo