Hrethawia te pafa tluk lotute!
Hmaniah thinrim rei turin kan inchah a, thinrim tawk pahnih khat tal chu kan la awm ang chu maw?!
Nakkumah kan inthlang dawn! Kan hria. Political Party-ten candidate an ruahman fel hma leh kan bial ṭheuha ding turte pawh kan rin thiam hma hian; kan bial tan, kan ram tana kan mi duh leh ‘chutiang kha tiang thawk thei mi a ni tur a ni’ kan lo tih rilrukte hi i lo nei lawk teh ang u. An inruahman fel meuh zawngin chhungkaw hausa taka fa mal an thihsan, a vua leh vangten a rosum neih an hre kar a, a hlutna an hmu thiam tlang a, an duat rawn lutuk a, amah hmangaih bertu pawh a hre hrang thei lo ang deuh hian, kan thau sawh chak ṭhah ni si, a langa kan hma ngai em em anga langin an rawn inkau chhawk leh ang a, inthlan hma zawngin kan ke sil tumin min hel leh ang a, duh kan thlang sual leh phung ang tih te pawh ka hlau hlel lo ve!
Thawm ri ret ret leh la ri lo chenin, an vawrh chhuah turah ṭhalai zawk la fit zek zawk aiin, Experienceliana te hian tawnhriat nei tam tawha an ngaih, candidate chang lo se vui tur si, a hranpaa ho ngah zek si, iai ngam loh, thlan chhuaha chakpui huphurhawm si hi an nei ther fur hlawm si a. An party hruaitu lam ṭheuh te hi ka khawngaih zawk ngawt mai. Mipui hian mi thar enchhin hun hi kan ti si ang em? Nge mipui mar hi dek lawkin Tawnhriata te lam bawk kan awn leh an ring sa ang a, ‘A ngai te bawk’ kan ti leh ang?
Mi thar enchhin nge kan duha kan pawisa note zawr tawhho kan mihluiate phawrh leh a, nawh mar kan beisei? Inthlan dawn apianga Manifesto an tlangzarh hi tihtakzetin kan chhiarsak ṭhin nge? ‘Inawmlemna bu’ ang lekah kan ngai? Thlan tur hre miah lo tan pawh hian heng an manifesto aṭangte aṭang hian midang rawn kher loin, kan mi duh chu kan hre thei ngei ang chu maw?! Insawitlawr siakna mai mah ni se, ṭhenkhat hi chu awihawm tak tak leh tih awlsam tak tak tur ṭha bawk si hi a tam ve tho.
Ka duh loh zawk an tling thei tih hre kar hian inthlante hi hmachhawn ve kar ila chuan, vote thlakna lam kan namnul mai mai ngai lo ang. Inthlan boruak ri hulh hulh leh policician-ho huhang a so bulh bulh lai hian; kan ram dinhmun hi vote thlak lai hian kan lo theihnghilh leh ngawt ang e! Kan chunga roreltu tur kan thlang lo va, kan tana rawngbawl tur kan thlang a ni tih hi, inthlan zawha khuallian kan sawm dan chen hian i ngaihtuah pha ang u.
Eng nge kan ngaihtuah?
Kan ngaihtuahna hi engtiangin nge ram chungchangah hian kan sen? Politician hlun kan tih te ngei pawh hi han ngaihtuah vang vang teh ang. Inthlan hmasaa an chakpui an manifesto chhunzawmna kha nge an buaipui a, manifesto thar awhawm taka lang, mahse a tak thleng har tur bawk?
Tu Flagship Programme mah hian sawi mawi chawp loha fak hlawh hi engah nge kan neih theih tak reng reng loh? Kan sawisel fo Politician te hi mi thar enchhin kan zuam loh a vang hian an **** hun kan nghak tawp mai tihna em ni dawn ni? Ram leh mipuiin kan mamawh leh thlakhlelh avang pawh ni miah lo a, ramin a ko nia la inhre tlat kan ngah ta lutuk hi kan ṭhanmawh bawk pakhat chu a ni chiang a ni. Pension hmaa ram vei thei miah lo, pension tawh hnua vei thar ta em em mai hi vuak hlum sen loh an kat ta nuk lo`ng maw?!
Mahni thil tih ṭhat ve chhun pawh midang hek ran loa sawi mawi thiam reng reng lo te, mahni chan department pawh enkawl zo mang lo ina sorkar hmasaa eng department changtu emaw lo kah ve chiam te hi, mahni mawng hlimna dik tak a ni tih te hi hre hlawm tak maw? Party ruih chilhho lah chuan kut benna awm a ni em tih pawh thluk nachang hre loin, thusawi tawp apiangah hotute hmaah an lo innuihmawi siak zui a! Ram tana thawh ṭhata kutbenna tur ni mang si lo hian, party hlawma intawhkhawmin kut benna tur kan zawng ta daih em ni dawn ni.
Kan eptute lah hian party nge an ep a, ram hmangaih lo hruaitu tih pawh hi thiar thiam har a ni ta. Mipui lah chuan ram hnuk khawih thusawi aiin party inchirhthehna lam kan lo lawm a, lungdamna aiin nuihzat tur kan zawng niin a lang a, kan var lo kual vel lutuk te hi a nuihzatthlak lehling zawk!
Meng reng si hi kan inbumkual a, kan hruaitute lah hian kan caliber hniamzia hi an hria ni fahmiang, min han bum kual dan tawk lah hi an han thiam khawpah... Intifing, mawl si, hre tlem si, a tak aia chhehvela buai, ram hnuk khawiha hul em em mai si hi vote nei zinga a tam zawk kan nih lah hi an han chiang em em khawp bawk a. “Tual ka that” an ti te a nih ngawt loh chuan thil dang hi chu kan la ngaidam thei rih a niang, kan fel ngawt mai!
A te ber aṭanga a lian ber thleng hian kan politics khelh dan leh kan titi dan phung te, chumi behbawma kan thil sawi leh tih zawng zawngahte hian, kan thlan chhuah hruaitu leh a thlangtu mipuite hian politics-in a tum huangah chuan, Hrethawia te pafa Hreteuha te pawh hi kan la tluk meuh lo chu a nih hi. Kan sawi zin ber chu a la ni ta dah a, a zahthlak tih lah hi kan la hre der bawk si lo!
- RsZuala Renthlei, Leng khua/ ITI