Halpuah khap leh ang aw
Kum engemawzat chu Mizoramah Krismas vuakvet laiin halpuah leh a kaihhnawih khap a ni a, hei tunah 'ber' thla hmasa ber kan lo hmang zo leh dawn ta a; halpuah leh a kaihhnawih kan khap leh dawn a nih chuan Dan hmanga thupek chhuah leh a hun ta hle mai.
Halpuah leh halmawi chi hrang hrang khu hian mihring hreiselna a tichhe nasa thei em em a, a bikin as asthma natna nei tan phei chuan a hlauhawm bik leh zual em em a ni. Chuvang chuan kan sakhua nena inzawmna nei miah lo heng halpuah ang chi hi engvang mahin kan mamawh lo a, a thlawna sum senralna mai mai a ni.
Tunhma kha chuan Krismas vuakvet laiin kan khawpui bazarah an zuar ter tuar ṭhin a nih kha. Mahse hriselna atan a ṭha lo tih hriain Kulikawn Vengin an khap a, an khapna pawh a rei tawh hle. Zawm pawh a hlawhin veng dang aṭanga kalte pawhin helai vengah chuan an hal ngam meuh lo.
Chu mai ni loin, veng pawna awm, hriselna lama mi pan deuhte chuan heng hunpui lai hi chuan tlanchhiat nan Kulikawn Veng hi an hmang chawk a ni. An fakawm khawp mai. Chutianga an tih chu entawnin Aizawl khawpui veng hrang hrangah halpuah leh halmawi hi khap a ni chho ve ta zel a, tunah phei chuan sorkarin khapna thu a chhuah ṭhin ta hial a ni.
Sorkarin a khap leh dawn a nih chuan tun aṭanga lo inven lawk a ngai ta hle a ni. Kan ram chhunga siam a ni lo a, state pawn aṭanga lakluh a nih vangin tun
aṭangin lakluh hi khap bur a hun tawh. A nih loh chuan sumdawng mi pamham ṭhenkhat ten a hlawkna umin lakluh leh phet an tum dawn tih a chiang reng. An lo lakluh tawh si chuan hralh ngei an duh dawn si a, chuvangin tun hi khapna thupek chhuah hun chu a ni e.
Kum hnih/ khat chu Vanglaini pawhin halpuah leh a kaihhnawih hal lo turin chanchinbu hmangin ngenna kan lo siam ve tawh a, zawm pawh a hlawh hle a ni. Mizote hi a ngenna in ngen chuan hnam thuawih thei tak kan lo ni a, ngenna pawhin awmzia a nei thui viau a, a lawmawm khawp mai. Kumin pawh hian sumdawng leh mipui mimirte hian ṭul loa sum kal ralna mai bakah, mihring hriselna tichhe thei a nih vangin insum hram hram ang u, tiin in ngen lawk ta i la, mi tam tak chuan an zawm ngei pawh a rinawm.
A ngena in ngen ngawt lo deuhin, dan hnuaiah a lakluh hi khap hma ta ila a sawt viau a rinawm a ni.
- Lal Rinmawia