Inrelna khawvel

Mitin leh chitin, ringtu leh ringlo tan pawha tawrhhlelhawm tak pakhat chu kan mihring puite'n min relna leh min sawichhiatna hi a ni. Mi min rel leh sawichhiatna hi chu tharum ngai miah loa kan thinlunga ser nung tuh theihna a ni a, a kha deuh fak asin!

A tuartu tan nachhawkna mum lian Isua krista tel loa do zawh hartak a nih laiin a reltu leh sawichhetu tan erawh eng mah channa awm lo, hekna leh tlakranna pawh awm lo – a langlo lam a thinlung thianghim leh rilru tha tak pu ang maia lan theihna a ni thung.

Mi ropui chuan ngaihdan an sawi hova, mi naran chuan thilthleng an sawi ho va, mi rilru tê chuan mi chanchin an sawi, tih thu hi a dik a nia. Mafaa Hauhnar khan a article “Ngawi ṭawt rawh” tihah khan he thu hi a zep a. PL Liandinga pawn “Kan thu chai” tih a ziahah he thu tho hi a thai lang; anni Mizo Pa ropui pahnih hian ṭha inti, mahni ṭhatlohna leh dik lohna hmu thei lote nunzia hi an hmu chiang a ni.

Kan Politicians te'n mipui a tlaktlum duh vanga an inbeihna 'game' pawh hia tak takah chuan thu dik hrulah thu dik ziktluak lo hmer tel a ni fo. Chu chuan ram hmasawnna a thlen lo. Tlaktlum tum politics hi politics tui nu a ni, a sawngsawhlawtna a awm lo. Thu dik ṭan a, mahni nihna ang anga lang ngam hruaitu ṭha kan mamawh.

Dik leh dik lo hre hrang thiam ram hruaitu chuan a rawngbawlsak, mipui hnenah dawt thu mai mai a fah tur a ni lo va. Sawi tur chin a thliar ang a, mipui tana him chin a chhak chhuak mai tur a ni. Him chin a hre lo a nih pawn advice an nei ṭeuh. Chu thil vanga a rawngbawlsak mipui zingah a tla tlum lo a nih pawn, thudik hretu Isua a la awm e. Engtikah mah dikna hi a nget ngai dawn si lo.

Mipui pawh he thilah chuan kan bang bik lo. Koren serials “Cruel Temptation” tih ang film ring ruangin kan kawtkai a fan hnu hian kan nun a da-hlauin ngaihno kan bei lo tial tial niin a lang. Chutiang film in a chiah zawp ni awm a mawi, hmui kawh fura rel leh sel fawm kawp reng, bumna thangkam reng hi kan pung chak lutuk.

Mafaa khan chutiang mite talented zia ti hian a sawi, “Mi rel leh sawichhiat hi Olympic games-a inelna pakhat chu nise ram aiawha tirh chhuah tlak fe fe chu thler tinah kan kat nukin ka ring. Hmun tin, hmun tangah “rêl station” kan bun thluah mai a nih hi. Chuti ang mite chu Setana dâk-pu rinawm an ni a, kristian Hla Bu-a an hla duh ber pawh, “He thu hi darh vel se” tih leh “Thu mak ka sawi nin theih loh chu” tih hi a nih ka ring,” tiin. Hnial ngaihna awm lo khawpa thu ṭha a ni.

Chutiang dakpute chu ei leh bar, tisa leh thlarau nunah an sawt phahna sawi tur a awm em em lo lehnghal. Chuti chung chuan an mihringpuite chaklohna leh hmingchhiatna putdarh leh thendarh zui zat zat hi sim a hnekin nitin nunphung leh titi sehhmehah anhmang zui zat zat nia. Chutiang mite bulah chuan hringnun hi a zalen mawlh lo. An hmui leh ka hi tala leh chabi invuah rem ang hian mi rel leh sawichhiat nan a lo invuah rem bik riau em ni ang?

Ngunthluk taka hringnun kal­hmang han chhut paw'n kan mihring puite naknem na leh duap an kainate chu zep ral sak mai awm ringtu kan nih vei nen, a ni der si lo. Mi hmingchhiatna leh hminghliauna chu chhungkhat, veng khat, khaw khat pa ho leh nu ho thleng hian kan titi sehhmeh a tling thuai a. Ram tinah kan sawi darh le lu a, a tuartu tan thawklakna tur khaw eng a hnim riai riai tih lah kan chhutpui der si lo. Khua a va englo tak!

Bible in, “...sawisel suh u, sawisela in awm loh nan…” tia kawng min kawh hmuh pawh kan zawm hlei thei lo. Chu vang chuan in rel leh in sawichhiat hi kan thlahthlam thei tak tak dawn lo ni te hian ka hre ṭhin.

Mahse, kristian rama ringtu fir zualte nun takna hian min la tuam dam hram hram a. Ringtu ṭhate ṭawngṭaina chhanin a la awm si a, Lalpa'n min hawisan kan ti phal lo ang. Kan hriat loha leiah a chhunga chengte rilru tlingchhia leh rimchhiain bawmin bu min khuar hnana, natna hri kan kai a ni ber e.

He tlingchhia leh rimchhia, in rel leh in sawichhiatna bupui hneh theitu chu nangmah kha i ni. Mi chanchin chhe lam pu darh loin thil ṭha lam pu darh la. Thuhnuai rawlh takin hringnun hi chhiar la. Juda Iskariot-a nun ṭawmpuitu i nihna hlipin, nun duhawm zawk nei turin in sangmar rawh le.

- Lalsiamkima Samte