Citizenship Amendment Bill - 2016

India ram Danpui (Constitution) hi India Republic Day January 26, 1950 aṭanga hman ṭan a ni a. He tih hun lai hian India Dapui chu Part 22-ah ṭhenin Article 395 leh Schedule 8 a nei a. Hman ṭan a nih aṭanga kum 67 chhung hian vawi 101 ngawt mai siam ṭhat leh siam rem (amend) a lo tawk tawh. Tun dinhmunah chuan Part 25-ah ṭhen a niin, Article 465 leh schedule 12 leh appendix 5 lai a awm tawh a ni.

Khawvela democracy lian ber kan ni nachungin India ram Danpui hian mipuite dikna leh chanvo te min humhalh ṭhat sak hle a ni. Amaherawhchu, BJP leh a thurualpuiten sorkarna an siam apiangin India ram Danpui chu nasa taka sawinghinin a awm ziah; a chhan chu India chu Hindu Lalram, hnam pakhat, sakhua pakhat, nungchang pakhat Hindutva hnuaia awm vek a, hnam tenaute humhalhna dan tesep pawh paih vek a, zaikhat a luan khawm vek chu BJP duhdan leh an thil tum ber a ni. Chutiang duh lotute chu ram pawna hnawhchhuah a, a ṭul chuan tharum pawh hman mai an duh.

Tunlaia BJP leh a thurualpui (NDA) te thil tum ṭha lo tak mai kan ṭhenawm state te leh Mizoram ngei pawh a sawi hlawh tak mai, Political Party te leh NGO te pawn an duh lohna an lantir hial citizenship amendment bill - 2016 hi citizenship act 1955 siam danglam (amend) nan BJP kaihhruai sorkar chuan July ni 19, 2016 khan Lok Sabha-ah a pu lut a, tichuan kumin Parliament thlasik ṭhut khawmah ngaihtuah a, sawi ho turin a dah ta rih a ni.

He Citizenship Amendment Bill hi heng ram pathum Afghanistan, Bangladesh leh Pakistan a hnam tenau zawk (Minority Community) te - Sikh, Hindu, Buddhist, Jain, Parsi leh Kristian sakhua betute, Dan loa India ram lo lut te, India khua leh tui an nih theihna tura kawng hawnsaktu tura ngaih a ni. He Bill-ah hian India khua leh tui an nih theihna dan dinglai hrang hrang zinga ‘Citizenship by Naturalization’ thlak danglam tumna a tel a ni. He ‘Citizenship by Naturalization’ hmanga India khua leh tui nih theihna dan dinglaiah chuan, India khua leh tui nihna diltu chu thla 12 kal ta chhung khan India ramah a cheng ngei tur a ni tih te, kum 14 kal ta chhunga kum 11 tal kha India ramah a cheng ngei tur a ni tih te a tel.

Tuna he Citizenship Amendment Bill - 2016-ah thung hi chuan kum 14 kal ta a kum 11 tal India ramah a cheng ngei tur a nih tih ṭhin kha kum 6 a tih hniam rawt a ni a. Tin, heng bakah hian India khua leh tui nihna nei ram danga awmte ‘Overseas Citizens of India (OCI)’ te reng reng chuan Dan an bawhchhiat chuan India khua leh tui an nihna hlihsak theihna dan pawh telh a ni bawk. Chutih rual chuan he dan hian Muslim sakhaw betute dan loa India ram lo lut te a huam tel lova. Heng hnam tenau zawk (Minority Community) Jews leh Bahai sakhaw betute India ṭhenawm ram Afghanistan, Bangladesh leh Pakistan aṭanga lo lutte chungchang pawh a sawi tel lo a ni.

BJP chuan Kristian te leh Mosolman sakhaw betute hi India ram sakhuaah a pawm lova, foreign sakhuaah ngai. A theih ang anga thliar hran a, Dan hmanga min nuai bo a duh a, India hi Hindu Lalrama siam a tum a ni. Amaherawhchu, nasa taka nawrna avangin Kristiante chu telh tlai khawhnu leh ni mah ila min en hran dan hi a lang chiang tawk tawh hle. Tin, Mizoram chu Bangladesh nena inri kan nih avangin Chakma rawn lut rute tan hian India khua leh tui awlsam taka an nih theihna kawng a in hawng zau sawt dawn a. He Bill phena thil inthup lang ruau ruau hi BJP sorkarna state tam taka an chet dan en hian hmuh hmaih chi a ni lo.

Citizenship Amendment Bill - 2016 hi Parliament thlasik ṭhutkhawm hma hian Rajya Sabha-ah BJP hian MP ngah zawk hman ta sela BJP duhdan anga kal hi a hlauhawm hle tura rin a ni. Chutiang chu a nih avangin Mizoram sorkar chuan he Bill amend an tum dan hi ṭha a ti lo a; Mizoram Chief Minister zahawm tak Pu Lal Thanhawla pawhin July, 31, 2017 khan Union Law Minister Pu Ravi Shankar hnenah D.O. Letter a thawn a, August 11, 2017 khan Parliamentary Joint Committee Chairman Pu Satyapal Singh MP chu DO. Letter a thawn ve leh a ni. He Bill hi ngunthluk zawka ngaihtuahna seng tur leh inrawn khawmnaah Mizoram NGO te tel tir ve turin a ngen hial a ni.

Kum 2015 khan Supreme court chuan Chakma leh Hajong te hnena Citizenship pekna tur thupek hi a lo tichhuak tawh a, hei hi sorkar laipui chuan tihlawhtling turin Citizenship Amendment Bill - 2016 hmang hian hma nasa takin a la mek a. Arunachal Pradesh a pawl hrang hrangte chuan Chakma leh Hajong Refugee te hnena khua leh tui nihna pe tura thutlukna siam chu an duh loh thu sawiin Arunachal sorkar chuan kum 2015-a Supreme Court Order tih chhuah hi ennawn leh turin a thlen a, mahse a hlawhtling ta chuang lo a ni.

Mizoram lamah pawh Citizenship Amendment Bill - 2016 avang hian ni 4 September, 2017 khan Joint NGO hruaitute chuan Central sorkara Joint Memorundum thehlut turin New Delhi an pan a. He bill an duhlohna Joint Memorundum-ah hian Joint NGO a telte bakah Political Party 5 Congress, MNF, MPC, ZNP leh BJP hotuten hming an ziah hnan a ni. Pu Satyapal Singh, Joint Parliamentary Committee (JPC) on Citizenship Amendment Bill - 2016, Chairman chu Minister of State a lakluh a nih avangin Chairman a nihna a bansan a ngai a, chuvang chuan he Bill khawihtu ber Lok Shaba Secretariat a Joint Secretary, Pi Kalpana Sharman hnenah Joint Memorandum chu an thehlut ta a ni. Ram leh hnam tana Mizoram Joint NGO te hmalakna hi a chhuanawm takzet a ni.

Ni 13, September, 2017 khan Union Minister of State for Home Affairs Pu Kiren Rijiju chuan hmar chhak huam chhunga Chakma leh Hajong Refugee te chu India khua leh tui nihna pek remtih an nih thu a sawi nghe nghe a ni. NDA hian Citizenship Amendment Bill-2016 hi engtiang chiahin nge kalpui an tum tih hi Parliament thlasik ṭhut khawmah kan hria ang chu.

- J.M. VURA, Saron Veng, Aizawl