Kleptocracy

‘Kleptocracy’ hi Greek ṭawng klepto-ru (steal), kleptes-rukru (thief) leh kratia¬-thuneihna/ rorelna (power/ rule) tih ṭawngkam inbelhbawm aṭanga lak a ni a. A awmzia ber chu ‘rukrute rorelna’ ti ila a dik mai awm e. A nih chuan kleptocracy rorelna chu rukru leh suamhmang - mafia, gang etc te rorelna leh lal hrawtna ram sawina a ni mai em? Ni love. Dan ang thlapa mipuite thlan tlin sawrkar lalna ram, zalenna leh dikna kengkawh tura mipui te thlan roreltuten ro an relna ram ngei a ni.

Khawvel ram hrang hrang hian rorelna an kalpuina atan hian rorelna khawl hman thiam bik leh innghahna bik (art of governance) an nei ṭheuh a. Democracy, Socialism, Communism etc te hi a lar zual te chu an ni awm e. Kleptocracy pawh hi heng rorel dan hrang hrang zinga pakhat a ni kan ti thei ang. Cambridge English Dictionary chuan, ‘Roreltuten mipuite chanai ruksaka thiltithei leh hausa taka an insiamna ram,’ tiin kleptocracy a hrilhfiah a. Chutiang ram/ khawtlanga roreltute chu kleptocrat (an thuneihna hmanga ram chhung hausakna ruk hmang roreltute) tia sawi an ni ṭhin.

Tichuan, kleptocracy chu suamhmang, rukru leh misualte rorelna lam ni lovin, mi ṭha leh tling, ram rorel tura mipuiten an thlan chhuah ten dik lo taka an dinhmun siam tum leh mipuite chanai chhuhsak a, an inchhek-ar-bawmna ram a ni tihna a nih chu. Chutianga rorelna kalhmangah chuan mipui tam zawkte chanai, a bikin sum leh paia eiral sakna (financial corruption) hi a nasa hle ṭhin. Mahni chhungkhat laina leh duhsak zawngte sawrkar hna leh hamṭhatna hrang hranga midangte aia an phu lo leh tling lo (unqualified) chung chung pawha duhsak tlat ang chi te, thil dik lo chhuitu, an hna aṭanga ban ngawt te leh politics khelmuala an khingpuite chunga phuba lakletna etc pawh hi kleptocracy ziarang/ nihphung a ni thui hle. Heta ṭanga thil lang chiang ta em em mai chu kleptocracy hi mipui rorelna tia kan sawi ṭhin democracy nen hian a inang lo hulhual tih hi a ni.

Hetiang ang rorelna (system of government) hi America ramah khuan kum 1829 vel bawr khan an lo kalpui tawh ṭhin a. Chu chu ‘spoils system’ an ti a. Kleptocracy ziarang nen hian a inang thui hle. A tawi zawngin, tih ṭhat dan indawt (merit system) ni lova duhsak zawngte dinchanna/ duhsakna a ni ber ang chu. Mahse, anni chu hnam fing leh ropui hmasa tih takah, chu spoils system pawh chu kum 1883 ah dan hmangin (Pendleton Act) an lo khap leh daih tawh a ni.

Kumin January thlaa sum­dawng hausa tawntaw leh politics-a tawnhriat la nei ngai lo Donald Trump, United States President 45na ni tura lakluh a nih khan mithiamte leh thiam lem lote zingah pawh inhnialna leh ngaihdan hrang hrang a chawk chhuak nasa tih kan hria a. Thla kaw chhung lek khawvela pisa thiltithei ber (the most powerful office in the world) tia an sawi ṭhin US President hna a chelh chhunga a chet lak dan ṭhenkhat han tarlang teh ang.

US-Mexico inrina hung a tum thu te, a anti-immigration laws leh anti-terrorist policies te ai mah pawha sawi hlawh chu a thachhang dawl tur a thlan dan mawlh mai hi a ni. American political expert te chuan President hna thawk chunga a sumdawnna khawvel (business empire) a a la tel tlat (amah tak chu inhnamhnawih lo mahse a sumdawnna hrang hranga hotuah a fapa te pahnih, Don. Jr leh Eric leh laina hnaite a ruat) te chu kleptocracy ziarang dik tak, democracy rama an hmuh ngai zen zen loh leh eirukna hluarna rama an nitin chanchin hriat leh hmuh te ang a ni an ti a. Khawvel ram ropui leh thiltithei zualte intawhkhawmna, G20 Summit, kumin July thlaa Hamburg, Germany-a a neih, a fanu Ivanka Trump-in a pa, Donald trump a ṭhutthleng rei vak lo chhung a luah te chu khawvel titi a ni a. White House-a chanvo pawimawh tak, Special Advisor to the President nihna pek a ni leh White House West Wing a office pek a ni te, a pasal Jared Kushner, foreign relations-a thiamna sang pawh nei lo President Senior Adviser atana a’n ruat mauh mai te hian titi a ti tam hle.

Hetiang anga thiamna leh theihna san vanga ruat ni lem lova dinhmun pawimawh tak tak chelh tura laina leh duhsak zawng te ruat hi rorelna leh thuneihna mimala pumhmawm tumtute bul ṭan dan a ni fo a, chu chu mithiamte pawhin an hlauhthawn em em a ni. Chutih rualin, USA te ang ram ropui leh democracy thupuia innghat tlat ram angah chuan African leh Middle Eastram te leh Communist ram, North Korea, Russia etc te anga thuneihna mimal/ chhungkaw malin an pumhmawm chu a rinawm lem lo.

He kleptocracy darthlalanga hmang hian kan ram hi i han bih chiang ve dawn teh ang. Ram rethei leh leilung hausakna chhuan tur engmah nei lo Singapore khawpui, kum 30 vel lek rorelna fung a vawn chhunga khawvel ram hausa ber zinga hlang kai theitu Lee Kuan Yew leh kum 30 chhunga kan ram hruaituten kan ram dinhmun min thlenpui hi han khaikhaih ve teh ang.

Lee Kuan Yew-a’n thu a sawi chuan khawvel ram dang President, Prime Minister, sumdawng hausa leh company CEO rual-ten an ngaithla ṭhup ṭhin an ti! Kan ram hruai­tute thusawi hi politics-a an khingpuite bak chuan barah kan khawn lem ta lo em ni? Lo ngaithla te pawhin politics inchirhthehna hmanraw ṭangkai a awm dah law maw tia lo ngaithla an la ni tlangpui!

Kan rama sumdawnna lian leh sum hlawm lian awmna phena ram hruaitute leh an vua leh vangte hming lo lang ve leh nawlh fo mai te hi? Sawrkar hna lakah leh contract thawh chungchang, sawrkar aṭanga hamṭhatna dawn chungchanga party worker mai ni lo, ram hruaitute nen thisen leh sen chiah lova inzawmna nei hming an lo lang leh ṭhin te pawh hi?

Vantlangin kan hriat ve chin chu sum chheprelh leh eirukna laihlan avanga an hming lo lang ve ta te an la ni tlangpui lehnghal a. A lang lo lamah hian hming hriat loh hi an la awm nual ang em? Building bo, mawza man to, car man to, kawng siam man to etc...

Heng hi kan ram hruaitu lo ni tawh zawng zawng leh ni mek te demna a ni ngawt lo. A nihna takah chuan tun dinhmun kan thlen theihna atana tha leh zung nasa taka sengtute, hrehawmna leh harsatnaten a hrual fip tawh, an thawhpuiten an peih loh san leh sawiselna leh diriamna kara kan ram, kan hnam lo chawisangtute an ni. Chutih rual chuan, kan ram hruaitu lo ni tawh, ni mek leh la ni tur te leh Mizo mipuite hian he zawhna hi mahni ṭheuh inzawtin i han chhang teh ang.

Mizoram hi zalenna leh dikna ten ro an relna ram, intluktlanna leh inunauna nena kan chenhona ram, mitinin kan chanpual tur leh kan chanvo dik tak kan chan ṭheuhna leh chan ṭheuh theihna ram democracy nge kan nih kleptocracy zawk le?

- Zarzosanga, Ph.D