KHAR CHHAWNGTUTE CHUNGCHANG KHA

Kan Chief Minister khan, “Thlai khar chhawngtute hian an hlep tam lutuk,” tiin a tlangaupui tawh a. He thilah hian hmalakna erawh kan la hmu lem lo. Kut hnathawktute pual TV report ka en nual tawh, khar chhungtute hlep tamzia hi rilruin a vei ve ṭhin.

Lakhuihthei ching­tuten an huan aṭangin lakhuihthei pum khat Rs. 8/- ang velin an pe chhuak a, Aizawl-ah kan lo lei a, wholesale-in pick up aṭanga kawng sira an lo zawrh chhawn pawh, pum khat Rs. 30/- aiin a hniam thei lo; an uar mah mah chu a ni.

Kut hnathawktuten an huan/ lo aṭangin, thlai an rawn phur haw a, khar chhawngtuten belhawi tel khat Rs. 10/- in an lo leisak chu, chawplehchilhin a leina hmun vekah Rs. 20/- in an hralh leh nghal hmiah mai bawk.

Kan bazaar-ahte chuan, Mahni thar chhuah zuar chhuaktute tan hmun kan kian zau thei lo a, kan hnawt darh fo mai lehnghal! Khar chhawngtute zawkin hamṭhatna an chang a. Kut hnathawktute hamṭhatna hi sorkar tharah (tu pawh lo sorkar se), chuan a kawng buatsaih sak a hun tawh takzet a ni.

Kut hnathawktuten thla ruk chhung vel hah taka an thawh rah chu, pawisa hmanga eizawngtuten minute khat lekah a thawktute aia tam pawisa hmuh nan an lo hmang ṭhin hi engtia control chi nge ni ang?

District Head­quarters tinah thlai thar lak khawmna, thlai chhiat mai lohna tura dahṭhatna tur buatsaihin, sorkarin hma la ve tawh se, a thawktu erawh chu sorkar ni lovin, mimal kutah dahin, a rate control lam kha sorkar kut ni sela. Hna tam tak kan siam belh ang a, tin kan thlai zawrh pawh packing fel tak nen, changkang takin kan zuar ve tawh ang a, khar chhawngtute nawm maka an chet velna kan ti tawp thei tawh ang.

Khut hnathawktute tan thlai thar hralhna awlsam takin a awm tawh ang a, rate control a nih tawh dawn avangin, man man zawkin an hralh thei tawh bawk ang. Tin mipui pawhin man man zawkin kan lei thei ang a, kan thlai leite chu mawihnai taka pack vek a nih mai bakah, a hriselna ringawt pawh thlakhlelhawm tham a va ni em.

Kan ram hma­sawnna tur hi keini mi mawlte hian kan auchhuah pui fo loh chuan, mi fing leh thiltitheiten hma lak nachang an hre si lova, kawng ṭha pawh au chhuah hun a awm beiseiin kan au phiar ṭawng ṭawng reng mai a nih hi. Kawng a ṭhat loh chuan, kan thlaite phurh chhiatin a awm nasa tawh bawk si a, ram hmangaihtu dik tak lo piang chhuak mawlh teh se.

- Lalrinliana Colney