“MZP ve si” tih kha
Mizoramah hian thil mak deuh chu hlauh kan ngah em em lai hian a hlauhawm ber hi kan hlau mang tlat lo. Thim na na na thuah leh thuah lo pawh inang reng awm tak ‘thim thuah hnih’ te kan han hre bik mauh a, Pathian rorelna hi Mizote chunga thlentir bik tum ni awm takin kan han hlau em em bik a, mahse kan rama Vai sumdawnna lian erawh kan hlau tlat lo hi a ni.
Tlemlai deuh khan Aizawlah Vai dawr lian an rawn hawng a, chu Vai dawr lian chu Mizoin “Kan ta a nih hi,” an ti a, Vai dawr khar ni apiangin a inkhar lawi si a, VAT registration an tihlan chuai chuaiah chuan Vaipa hmel a lang a, Vai hming a chuang bawk a, chu dawr chu Vai dawr a nih loh pawhin a neitu chu Vai an ni tho tho tihna a nih chu.
Chutichuan mi ṭhahnemngaiten kan rama Vai dawr lian rawn awm ringawt tur chu a hlauhawmzia an sawi a, nakin lawkah chuan Mizote sumdawnna a la luahlan thei dawn a, kan sumdawnna dawr lian lote hi a tuar tur kan ni a, Mizo mipui nawlpui hian pawisa nei sa Vai kan dawr hum hum ang a, chu pawisa chu Vairamah a kal daih ang a, keini lam chuan “A tlawm,” tih chiah ngaihtuahin kan pawisa neih chhun ang ang chu Vai hnenah kan pe dawn, an tih pawhin ṭhahnemngaite chu kan dem let a nih kha.
Zirlai pawl lamin hnam tan a him lo thei tih hriain hnam tna ṭhahnemngaiin dawr lo turin mipui an ngen a, dawr neitute pawh hawng lo turin an ngen bawk a; nimahsela kan hnam tana
ṭangte chu fiamthu thawhna atan kan hmang zui a, inti fing tak takin, “MZP ve si,” tiin kan nuih sawh a, MZP nih chu thil zahthlak leh mualphothlakah kan ngai a, a phena thil awm kan ngaihtuah duh si lo.
Tunah hian hun a kal ta deuh bawk a, khatih hunlaia MZP ṭanna kha a dikzia ka hre tawlh tawlh a, hman nia Vanglaini lamin sumdawng an kawm kualnaah khan he dawr lian inhawng hian kan Mizo tam tak eizawnna chu a nghawng der tawh a ni.
Ka sawi duh ber chu hlauh ngah tak Mizote hian hlauh tur kan hlau lova, kan rama ‘dan’ hmanga rawn lut Vai hausa sumdawnna hi Mizote tan a hlauhawm a, kan ram tlakchhiat theihna a ni tih hi i hai tawh lo ang u khai.
- John Zothanmawia