Vawk pul hri-ah kan mualpho
African Swine Fever vangin kum hnih chhung zet chu Mizoramah vawk thi kan buaipui a, vawk tam tak a thi a, vawk tam tak suat a ngai bawk. Vawk vulhtute vawk a thih tam em avangin sum tam tak an hloh a, mahse tunah chuan central lam aṭanga vawk thi vanga vawk vulhtute hnena zangnadawmna sum chu vawk hri vanga sum tam tak hlohtuten an dawng ve ta hlauh mai a, a lawmawm hle.
Zangnadawmna an dawn avanga an lawmpui awm rualin an hun tam tak a lo thlawna an sen avanga leh pawisa rei tak an nghak kha a lungchhiat thlak viau thung a ni. Hun kha leh chen ASF vanga vawk tam tak kan tih thih tawh avang hian Mizoram sorkar chaklohzia a lang chiang em em a, hri leng control thei loa hei leh chen kan sorkar a awm hi thil pawi tak a ni.
Mizoram sorkar khan ASF vanga vawk thi tihtawp an tum thu hri len hnu thla 6 velah khan an puang chiam tawh a, mahse an puan hnu thla tam a ral leh hnu pawhin ASF hi an control thei ta chuang lo a nih kha. Hei hian Mizoram sorkarin vawk hri a thunun hneh lohzia a tilang chiang a, sorkar chak lo a ni tih a tarlang.
ASF hi kan ngam lo viau a, state dangin an khuahkhirh theih laiin Mizoram chuan kan tuar na hle a ni. Vawk pul hri hmachhawn danah Mizoram chu India rama tiṭha ber kan ni tia puangin AH & Very Minister an chhuan thu MNF party thuchhuah chuan a tarlang hial kha a ni a.
Minister hian theihtawp a chhuahna avangin Mizoram hi ASF management-ah India rama tiṭha ber kan ni, ti zawngin thuchhuah an siam hial kha a nia, khatianga an puang ngam kha thil zah thlak lam a ni zawk mah em aw ka ti a ni.
An thuchhuah kha ka chhui chiang deuh a, Mizoram chauh hi vawk suat compensation dawng tur kan nih thute an tarlang a. Mahse vawk pul hri hian hmar chhak state hrang hrang a tuam a. Mizoram hi inveng tha lo ber pawl kan ni zawk - vawk thih tamna ber kan ni tlat, a pawi hle.
Mizoramah vawk cheng vaibelchhe 60 chuang man kan ti thi tlat mai a, heti chunga vawk pul hri avang kan Vety Minister han fak ngam hi thil mak tak a ni. Mizoram pumah vawk pul hri hi a leng a, khawiah mah kan in veng tha lo tihna a nih chu!
- Lal Hmangaiha Khiangte