TUNGE HLAUH TUR?

Mizo Kristiante hi hlauh ngah pawl tak Kristian kan ni. Kan thil hlauh tam tak hi, a chhan bul ber chu Bible kan zir ngun tawk loh vang leh kan hrilh fiah dan dik hlel ṭhin vang hi a ni awm e.

Khawchhak lungpui kan hlau a, khawvel tawp a hnai tih hrilhlawkna ang chi te kan tuipui em em a, mi tam tak kan chiai a, Kohhran chhuahsan tawk te pawh kan awm ṭhin. Chuti ang chu tun hma aṭanga kan Kristianna avanga kan kal sual ṭhin dan kawng khat a ni.

Kohhran Upa nemngeh, kum tam fe rawngbawltu mi tawh te pawh heti ang zirtirna siper leh hlauhawm lam hlauh vanga Kohhrana nihna hlipa Kohhran aṭanga kal peng ta hi kan awm fo a. Tun hnai lawkah pawh Aadhar Card hlauh vanga Upa nihna leh rawngbawlna chawlhsan huama Kohhran chhuah san kan awm kha. Tin, Thupuan Bu a Sakawlh hi Mizo te anga buaipui Kristian dang hi an awm ve a nih pawhin an tam lo mai thei.

Heng thil tam tak a thlen chhan hi kan hlauh vang a ni. Bible-ah a inziak si a, chu chu zir chiang lo leh hre chiang lova kan rindan leh khawvel boruak inlumleh dan kan thlir a kan hrilh fiah ṭhin avangin kan buai zo ta ṭhin. Chutih rual erawh chuan khawvel lo danglam zel tur thu Bible-in a sawi hi kan hnawl vek thei e tihna erawh a ni lo.

Kan zui ber, kan rin leh kan innghahna Lal Isua hian eng nge hlauh tur min zir tir tih hi kan ngaihtuah ngun ngai em? A chunga Bible kan tarlan Matthaia 10:26-31 ah hian Lal Isua’n amah ringtute leh zuitute hnenah kan hlauh tur leh kan hlauh loh tur chiang takin min hrilh a. Kan hlauh loh tur zawk hi hlaua kan hlauh tur zawk hlau lo tlat lawi si a nung Kristian hi kan ni em? Lal Isua’n kan hlauh loh tur min hrilh te hi lo en ila-

Chanchin Ṭha dodaltute

Lal Isua’n Amah zuitute leh ringtute’n ti tura min duh ber chu Chanchin Ṭha hril hi a ni. Hmun hla tak thlir loin India ram chauh pawh hi en ila Kristian tlemzia leh kan hmabak tamzia chu kan hre nghal vek awm e. India ram hi Hindu ramah siam an tum tih te chu kan hre bel hneh hle ang. Chanchin Ṭha dodal vanga Missionary boral ta te pawh kan hre nasa tawh ang.

Chung zawng zawng karah chuan Lal Isua hian Chanchin Ṭha hril hi hlau tur kan ni lo a, doadalna leh tihduhdahna karah pawh huaisen taka Chanchin Ṭha hi puang darh zel tur kan nih thu chiang takin min hrilh.

Taksa chauh tihlum theitu chu hlauh loh tur

He laia Lal Isua thusawi pawh hi Chanchin Ṭha huang chhunga mi bawk kha a ni. Chanchin Ṭha dodaltute’n an tih theih vawrtawp chu Missionary te nunna laksak a ni. Mahse ringtute chu thlarau thi thei lo nei kan nih avangin kan taksa chauh tihlum theitute chu hlau tur kan ni lo tih Lal Isua’n min hrilh. Thlarau tam tak boral mai turte hnena chautuan nunna hrilh tur hian Lal Isua’n min duhin thih thak thleng pawha thawk tur kan nih thu helai ah hian min hrilh chiang hle. Taksa thihna ringawt hi chu kan hlau tur a ni lo tih min hrilh.

Hlauh tur dik Pathian He lai tak hi sawi uar

ṭul leh pawimawh zawk chu a ni ang - tuna kan Kristian nunin a mamawh chu a ni bawk. Thil dang leh eng eng emaw siper vel hlau lo a Pathian chauh hi hlau tur kan nihzia hi kan sawi uar a ngai hle. Hmangaihna Pathian, lainatnaa khat, khawngaihtu adt a nihna phena hrem hmang, phuba la ṭhin leh a thu awih lote chantuan hremhnuna paihtu tur Pathian a nih hi kan hriat chian a pawimawh khawp mai.

Lal Isua khan Pathian hi hlau turin a hnungzuitute min chah ngun hle a, “Gehena-a thlarau leh taksa tiboral theitu chu hlau zawk rawh u” (Mt. 10:28) tiin min chah mawlh mawlh a ni. He laia Lal Isua ṭawngkam hman ‘boral’ tih hi tiriral vek, mi sualte’n chatuana hremna an tuar tur rapthlakzia uar taka a sawina a ni.

Pathian hi kan hlau em?

Tunlai khawvel changkang tawh lutukah hian Pathian hi kan hlau em tih zawhna hi chhan dik a har ber awm e. Mizoram bik pawh hi lo en ta ila, kan Kristianna rei tawh ngaihtuah chuan kan Kristianna hi hma kan sawn phah lo viau hian a hriat ṭhin.

Kristian Ṭhalai te hi Biak in hawnga innei aiin inruk a innei kan tam zawk ziah a. Chu chuan inneih hmaa sex hmang kan tam tih a entir a, a awmzia chu Pathian kan ṭih tawk lo tihna a ni thei bawk. Chu mai ni loin tunlaia natna buaipuiawm ber HIV/AIDS vei hi India ram state zingah Mizoram hi kan tam ber tawh a ni tih Mizoram State Aids Control Society (MSACS) te chuan an sawi a. Chung zinga HIV hrik kan kai tamna ber chu ‘sex’ a nih thu an sawi bawk.

Ram inrelbawlna ah pawh Mizoram hi Kristian ram si-ah chuan eiruk tamna ber pawl a rinhlelh kan ni. Kan kawngpui chhiatzia te chu mi zawng zawng hriat a ni. Kan ram hruaitute hi Kristian, kohhran Upa leh rawngbawltute an ni. Kristian ni ve lo Chief Minister leh MLA te kaihhruai state aiin kan state hian hma a sawn loin ‘power’ ah pawh tun thlengin kan la intodelh thei lo.

A chunga kan dinhmun tarlan pahnih aṭang ringawt pawh khian inenfiah kan ngai hle tih chu mi a ber tan pawh a hriat. Kan diklohna leh kan sualna te hi thup lo a Pathian hmaa huaisen taka puang chhuak a sim hi kan ram damna tur pawimawh ber a ni.

Pathian hi tihtakzetin i ṭih ang u. Chuti chuan kan rawngbawlna pawh a nungin kan natna leh kan harsatna tam tak hi kiangain a dam ngei ang. Pathian kan ṭih tawk loh chhung chuan kan rawngbawlna te hian rah ṭha a chhuah thei tak tak dawn lo a, a nget zel ang a, ring lo mite nuihzat leh hmuhsitin kan awm reng ang tih hi a hlauhawm hle.

Pathian ṭiha hlauh tlat hi Kristian zawng zawng mawhphurhna leh kan tihtur a ni. Chuvangin, Kohhran Upa, ṭhalai, nu leh pa leh naupang te chen hian Pathian hi i hlauin i ṭih thar ang u. Chu chuan kan rawngbawlna pawh a chawinung ang a, kan ram leh hnam, Kohhran hi Pathian ropuizia puang chhuaktu a lo ni ang a, kan damna famkim pawh a lo ni ang.

- Rinfela Zadeng Matthaia 10: 26-31