Chimral kan nih loh nan lehkha zir

India ram mihring sangkhat zelah Mizo pakhat awm ve ang chauh kan ni. Chuvangin, min chimral mai loh nan ṭan kan lak a ṭul. India ram mihring hetiang zat zingah hian inthlandah thei kan ni lo, hmalam pana kan kal mek lai hian, kan hnung lam pawh kan ven uluk a ṭul ang. Hnam issue-ah ngat phei chuan NGO te hmalakna te kan thlawp ṭhat a, kan thlir uluk pui a ṭul khawp mai.

"NGO te'n an ti alawm" tia pawn lang taka thlawp ngawt hi a tawk lo, kan chhungril nunin a thlawp tel tur a ni. Chu chu hnam rohlu chu a ni. Phai ramah chuan nuamsa takin zuk awm ṭhin mah ila, kan zuk nun danin a zir loh chuan min en danah chuan Mizo Tribal min ti leh tho ṭhin.

Zirlaite u, lehkha zir nan hun ṭha in la neih chhung ngei hian hmathlir zau tak neiin tumruhna nen taima takin lehkha zir ula, kan ramin a mamawh in pek theihna sang berah a pe theitu nihna fawng chu vuan thei turin in nun hlanin, lehkha zir rawh u. Hnam dang IAS val rual hoin Mizo Mipuite enkawltu Department Head-ah an rawn ṭhu ta sup sup mai hmuh hian, keini ang mi taptawm lo thlirna aṭang pawhin ngaih a ngam thei lo a ni.

Kan ṭhenawm State a zirlaite chuan All India Service-ah inhlankai tum ranin lehkha an zir a, written leh interview paltlang turin intlansiakin an inel ran a ni. Hetihlai hian, keini state ve meuh aṭang hian chutiang chu hmuh tur an awm lo, hei hian a hrilhlawk chu hnamdang Mizo hmangaihna thinlung pu miah lote kha, nakin lawkah kan ramah lo lutin kan sorkar department neih ve chhun te hi an la rawn awp fai vek ang a. Chutih hunah chuan nang leh kei hian kan mamawh neih ve te kan va sawi hunah tun ang hian ngaihven ṭhat kan hlawh reng tawh kher lovang, kan ram tung ding turin midang an awm chuang lo, kan zirlaite ko-ah a inghat a ni.

An lungawina a hniam chuan an tawpna thlen chin pawh a hniam ang. An lungawina a san chuan an nihna chelh a sang ngei ang. Nuamsa taka lehkha zir chuan sorkar hna sang tak an chelh ngai lo, lehkha zir hi thil nuam tak a ni lo, hahthlak tak, a kalkawng bumboh tak a ni. Mahse a thawk nasa apiangin a rah ṭha an seng mai dawn a ni. Chuvangin, aw zirlai, i ram leh hnam chhanchhuak turin i zirlai kha uar zawkin lo zir chhunzawm zel rawh le.

Kan ram enkawl tur hian hnamdang kan mamawh lo, Mizo ngei a ni kan duh chu, kan tih theih hun a va nghahhlelhawm tak em! Chutiang ang hunah chuan, nangmah ngei kha lama i awm theih nan, i zirlai kha ṭha­hnemngai takin lo chhunzawm zel rawh.

- H. Neihchungnunga Durtlang North