Written by
- Dr. Vanramliana Department of Zoology PUC
Covid-19 test-na Din a nih dan leh a behbawm
Kumin chu Mizoram mipui leh khawvelin RtPCR hming hi kan hre lar hle mai. Ṭhiante leh thawhpuiten RtPCR test awmzia leh a tihdan te an ziak tawh a, mipuite zawhna tam ber chhan pahin Mizorama Covid-19 test-na tur Laboratory din a nih dan tlangpui ka han tarlang ve ang e.
Mizoram Covid 19 testinglaboratory din a nih dan
China a Doctor Zhang Jixian-an natna mak tak mai Wuhan, China rama a enkawl thu a sawi aṭang khan khawvelin he natna Covid-19 hi a hmelhriat ṭan a. A darh chak dan kan lo chhui ve nasa a, kan rilru a zawhna lo lut hmasa ber chu, “Mizoram lo thleng ve ta se engtin nge kan en/ hmuhchhuah ve ang?” tih kha a ni. Tichuan social media lamah Mizoramin test na kan neih ve theih dan te ziakin ṭan kan han la ve a. Mizorama Covid 19 Laboratory din ve tura mipuiin sawrkar a nawrna kha a nasa si a, a harsat dan leh permission neih phawt a ngaih dan sawiho turin sawrkarin min hawr khawm a. Covid 19 Detection laboratory din theih a ni em? tih sawihona leh in rawn tlannaah min sawm ve ta hlawl mai a. March ni 23, 2020 khan Consultation on Covid-19 detection tih hming puin meeting kan health minister zahawm tak Dr. Lalthangliana chamber-ah kan ṭhu khawm a ni.
Hetah hian ZMC director te, Microbiologist te, State leh Private hospital doctor te, academicians (MZU, PUC, CAU), State Nodal officer, Mizoram Chief secretary leh kan MLA te an tel ṭha hle a. Sawihona thui tak kalpui a nih hnuah Laboratory neih ve dan kawng lo zawng a, ni 12 hma a report pe turin Core Committee Health Secretary Pu H Lalengmawia IAS chairman na hnuaiah din a ni ta a ni.
Core committee meeting Dt. 24.3.2020 a Health Secretary room a neih chuan ruahmanna siam fel nghalin a ni la la in state TB Centre Falkawn a TB Laboratory an siam mek chu a hmuna kal chilhin endik a ni. He Laboratory-ah hian BSL-3 chamber, negative pressure room- Central TB Division laboratory, FIND leh Helixar Solutions te siam mek, 90% zawh a awm a, he hmunah Covid 19 enna tur Laboratory din chilh nise tiin thutlukna kan siam a. He hmun min hawh tir tura biak fel ngai te biak fel a ni bawk.
Zoram Medical College-in hma hruaiin Mizoram University, Central Agriculture University, RIPANS, Pachhunga University College, National Health Mission hnuaia NTEP te ṭang hovin hma an la nghal a. He laboratory lo enzui tur hian “Core Laboratory team” din a ni bawk.
Mizoram Health Minister leh kan health secretary te chuan Union Health Minister te, Health Secretary te leh ICMR mi pawimawh te a be pawp nghal a. India National Lockdown a nih avanga test harsat dan tur hrilhin Laboratory kan din thu an zuk hrilh a. Kan senior doctor lamin ICMR leh Central TB division lama an hmelhriat te bia-in kan mamawh an buipui nasa hle bawk. ICMR chuan lawm takin khawl neihsa leh kan inbuatsaih dan hriain Covid 19 detection nana Laboratory drawing leh kan hmanraw neih ngaite ZMC Microbiology department an rawn hriattir a. Dt. 25th March 2020 khan Silchar Medical College a training nei turin ZMC aṭangin mi 4 tirh min phalsak bawk.
Harsatna lian tak kan tawh tak chu National Lockdown a nih avangin RtPCR khawl hi lei tur a awm lo a, tin engineer khawl bun tur an lo kal thei si lo. Company hrang hrang biak kual a nih hnuah RtPCR khawl hi Mizoram University aṭang leh Pachhunga Uniersity College aṭang hawh dil a ni ta a. Lockdown zawh veleh a thar lei a, pek let tura tih a ni.
Mamawh tam tak a la awm - heng A/C te, UPS te, Computer leh a dang kan han lei dawn a. Dawr kan hawntir a, Local Task Force lamin tlangau a, khar tura hriattirna nen, kan pui nawi thei hle mai. Khawl lian dah fel a ngai a, hlawhfa an awm si lo. Kan mangan em em laiin kan Home department lamin Police 20 rual ni 2 lai mai min han pe te kha an thawk ṭha khawp mai.
He laboratory hi bulṭanna atan hian Mizoram sawrkarin pawisa a sanction a. Lockdown avangin hmanrua lei kim theih a ni lo a, institution head te an institute hmanrua hman hawh dil a ni. Khawl thawhtute chu-
1. Zoram Medical College, Microiology Department- Biosafety Cabinet- 2 nos, -80 deep freezer, -40 deep freezer, -20 deep freezer, micropipette, plasticwares etc(90%)
2. National Health Mission (NTEP)- BLS -3 chamber and Cooling Centrifuge leh equipments tenau
3. Mizoram University- State Biotech hub & Department of Biotechnology- RtPCR Machine ABI Fast, Kits, Laboratory plastic wares, PCR minicooler and plasticwares leh chemicals
4. Pachhunga University College, IBT hub: RtPCR Machine BioRad, Kits, minicentrifuge & Consumables.
5. Central Agriculture University, Virology laboratory: RtPCR Machine Roche Diagnostics & Kits
6. RIPANS: Multichannel micropipettes.
Kan hmalak dan tlangpui han tarlang ila:
• Dt. 1st April 2020 ah Laboratory khawl lakkhawm rem fel a ni a, a hmunhma peih fel nghal a ni.
• Dt. 2nd April 2020 ah test run neih a ni a, a result NIV Pune-ah thawn a ni.
• Dt. 3rd April 2020 ah ICMR-in test theihna (E-gene) min pe a, a hnuah centre puitlingah hlan kai kan ni.
April ni 1 a khawl rem fel hnua kan meeting lai khan thu lawmawm lam a awm zel a. ICMR-in Covid-19 data dah luh ve theihna portal a user ID min pek tawh thu leh hma la zel tura min duh thu ZMC a Professor Sukanta-in a report a. Hetia hma kan lak mek lai hian a test kit-ah harsatna kan neih chu kan Health Minister hmalaknain Silchar mecidal college aṭangin kan puk a. Test kit 1000 Dibrugarh, Assam
aṭanga lo thawn a nih tawh thu kan dawng bawk.
Hetia kan han test ṭan hnuah hian harsatna a lo thleng leh ta. ICMR-in test kit a rawn thawn kha ROCHE company(German) siam a ni a, an dye hman kha PUC leh MZU khawlin a hmu thei ta lo. Tichuan, Roche company siam RtPCR khawl Central Agriculture University (CAU) Selesih a Dr. Tapan Dutta laboratory a mi han lak a ni leh ta a, tluang takin test a kal leh thei ta hlauh mai.
PUC lam aṭanga kan khawl dah ve pawh hman theih a nih rih tak loh avang te, dahna hmun a indaih loh avangte leh research tih nan kan hman ve avangin lak let leh rih kan dil a. Min phalsak a, duh hun leh mamawh huna dah let mai turin kan in ruahman bawk.
Core Committee on Covid 19 testing laboratory chu ni 12 chhunga laboratory din theih dan report pe tura tih a ni a, mahse report kan pe lo a, ni 10 chhungin a Laboratory kan din thu kan report ta zawk a ni!!! State sawrkar khan Viral Diagnostic Laboratory (VDRL) central sorkara a dil mek nuai 200-300 man hu kha a nei mai dawna a inngaih avangin central lam thu ngaihchan a nih avang khan State erawh a ke pen a chhep sual hman ṭep a. Academic Institution head, Vice Chancellor - MZU, Dean - CAU, Directors - RIPANS leh Principal - PUC-te inhawnna azarah te, TB lama kan hotute thil phal rahte leh ZMC lama hnathawkte inpekna avangin bul kan ṭan thei a, a khaikhawmtu Health Department an fakawm e.
A din hnu thukhawchang:
Q. Engatinge RT-PCR Mizoram Sawrkarin a lei ve nghal mai loh ?
He zawhna hi social media leh print-ah kan hmu fo a. Lockdown lai khan khawl lei a buaithlak a, company lamin an lo thawn thei lo a. Helicopter leh thlawhnaa thawn turte phawin ICMR lam kan bia a, mahse rem lohna a lo awm zel mai. Company Quotation-te lain Sawrkar chuan April thla laihawl khan RT-PCR khawl lei turin hma a la a, khawl la thlen theih loh nachhan hi hriat a chakawm hle mai.
Mizoramin RT-PCR khawl a mamawhna a sang si a, Mizoram sawrkar Science and Technology Department etc.-a secretary Dr. Vanlalramsangate leh MISTIC lam hmalaknain Dt.5/6/2020 khan Department of Biotechnology Government of India hnuaia awm Institute of Bioresources and Sustainable Development (IBSD) Imphal, Manipur-a headquarter neite chuan Imphal atangin RT-PCR (Quant studio 5) khawl pakhat helicopter-a phurh luh a ni, a install tur mithiam an lo kal nghal bawk. IBSD hian April thlaah Manipur-a JNIMS-ah an pe tawh a, May-ah Meghalaya, June-ah Mizoram.
Pu Thantluanga (Hauva and Sons) te RT-PCR khawl an donate aṭang khan Roche Mastercycler 96 lei a ni. ZMC-ah tunah a vaiin RT-PCR khawl pali a awm a. RT-PCR hmanga test tihchak nan Automated RNA extractor khawl pahnih - Quacube (State forensic ta hawh) Ez-1 (SDRF aṭanga lei) a awm bawk.
Q. RT-PCR Laboratory eng nga ti nge District tinah Sawrkarin a dah mai loh le?
RT-PCR Laboratory din nan a senso ngai chu kan hre nual tawh a, khawl ṭha pangngai a hrang hrang lei nan cheng nuai 60-80 vel sen a ngai a, sawrkar hian district tinah dah theih mai awm tak a ni ngei mai. BSL (level 1-4) te, laboratory hmun awl te, khawl mamawh te, KM 150 danah, sample 100 tih vel hi chu sawi a tam, kan hre tlang vek. Kan harsatna ni zawk tur erawh Medical Microbiologist virus laboratory-a experience nei ṭha kan nei daih ang em? ZMC-a kan Microbiology department-a kan Professor-te pathum lo saw an awm ang em? Additional Laboratory dinna district tinah Covid-19 suspect case nitin 100 test tur an awm ang em?
ICMR hian National level agency (DBT/DST/ICAR etc.)-in laboratory a dinna Institution-ah te khawl an neih chuan test a phalsak a, mahse Virologist an neih a ngai thung a. Hetiang laboratory hi Mizoram University, Central Agriculture University, RIPANS leh PUC-ah te pawh hian a awm, mahse Virologist kan nei lo! “MD Microbiologist te'n an training anga an thiam ve mai ang,” in lo ti a nih pawhin in thiamawm tho mai. Mahse RT-PCR leh molecular biology laboratory works hi ni 2-3 Silchar medical college-a training a, thiamtheih ni se a duhawm. ZMC ah sawn Dr Swagnik Roy Associate professor, RT-PCR-a experience nei ṭha tak an nei hlauh a. Tin, RT-PCR hmang PhD nei Scientist pahnih an la thar bawk a, Covid 19 tluang takin kan test ve ta zel a!
Zawhna ka neih fo chu, Covid -19 a ziaawm hunah hian kan laboratory dinte hi kan hmang ṭangkai zui ang em? Eng nga ti nge RT-PCR kha MZU, CAU leh PUC khan an neih? Tia kan zawh chuan research an kalpui avang a ni. Research atan hman ṭangkai a ni a, State tinin Viral Research and Diagnostic Laboratory (VRDL’s) nei tura sawrkar department lam hmalakna erawh a ṭuan a muang deuh.
Q. RT-PCR hmanga Covid-19 test a hau tak em?
RT-PCR test-a pawisa senso hi a hautak ve hle mai, chutihrualin ICMR lamin min tumsak nual avangin a senso erawh a chanve ang vel kan tum ve a. A test senso tlangpui, mihring tha (manpower) leh khawl man chhiar tel lohin a hnuaia mi ang hi a ni.
1. Test Kit pakhat man-
Rs. 750-1350
2. RNA Extraction man-
Rs.350-800
3. PPE leh a dangte: Rs.1000
Total Rs. 2100-3120
State danga sawrkar chuan private laboratory-te hian mi pakhat test manah Rs 2000-2500 la turin thuchhuah an siam a. Keiniah hian test kit ICMR-in min la tumsak avangin Rs.1000-1500 kan hmang ang a ni ang. ZMC-ah test 10000 chuang an test-ah sawn nuai 100 chuang an hmang tawh ang! Research laboratory ṭhenkhat erawh chuan Rs 500-1000/sample-in kan test thei an ti a. Hei erawh an system a dang deuh. A Laboratory dinna tura cheng nuai 80 vel sen baka a senso dang hautak turzia kan hrethiam awm e.
A hautak lo zawk Truenat khawl hi district tina dah hi a finthlak zawk ang. A khawl man bak senso hi a tam zawk central TB division-in a tum dawn a, tunah pawh test kit 1500 a rawn thawn tawh bawk. A khawl hi nuai 5 man (mono) nuai 10 man (duo) leh nuai 15 man (quantro) lei tur a awm a, ICMR phalna ngai loin State advisory Committee phalna a tawk a, cheng nuai 5 vel laboratory siam rem leh lei belh nan a tawk thei ang. A hnu lamah hman ṭangkaina tur tam tak a awm bawk ang. Tin, MBBS or Medical officer-in an test an validate thei a, Technician pahnih pathum bak an mamawh lo ang.
Q. Eng nga ti nge ZMC-ah RT-PCR Laboratory kha an neih loh?
Ministry of health and family welfare-in Viral Research and Diagnostic Laboratory (VRDLs), medical college level cheng nuai 200-300, central sawrkar tumsak tur kha an submit avangin khawl dang lo ngaihtuah kha a ṭul lem lo an ti a ni ang e. Covid-19 a lo lang ta thut si a, an inbuatsaih hman ta lo niin a lang.
Q. Eng nga ti nge ZMC-a an test a kal chak loh?
Mipuiin test zung zung a, result chhuak mai tura kan ngaih lai hi a dik lo deuh a. Sample 1 test chhung hi darkar 2-3 a ni a, a rualin RT-PCR khawl pakhatah sample 30 vel a test theih a. Tin, Mizorama Test Laboratory din a nih tirh khan ni 1-ah sample 100-200 vel test theih beisei a ni a. Mahse hriat lawk lohvin tangkhang an lo haw tak hnuah pawh RAT test bak ngai lo tura ruahman kha RT-PCR test vek tur tiin sawrkarin thutlukna a siam ta thut a nih kha. Hnathawktuten theihtawp an chhuah a, tlaivar deuthawin thla 1 chuang an thawk a. A hmunhma leh mithiam an indaih lo deuh nen, khawl lo thlen har bakah hman theiha buatsaih (Install)-tu tur Engineer an lo kal duh lo nen, Test kit India Sawrkarin a nei tlem, sample lo lut nasa lutuk chinfel ngaite nen. Harsatna an tawk ve nasa a ni. RT-PCR laboratory-a thawktute saw chawimawi phu hle zawk a ni.
Heng ka han thai lante hi a tlangpui a ni a, ziah kim dap a har khawp mai. Hming lang tur lang lo pawh a awm ang. Engpawhnise, tun dinhmunah chuan kan sawrkar leh kan ZMC lam hian Covid-19 test chungchangah hi chuan hna ṭha tak an thawk a ni. Tuna kan sawrkar mawhphurna lian tak chu a test centre uluk taka enkawl a, mamawh an neihte phuhruksak zung zung hi a ni. Mizoram Covid-19 Laboratory hi hman theih loh, Contamination zone ah puan ni ta se eng tin nge ni ang? ZMC hmun chhung ngeiah sawn makeshift BLS-2 level laboratory hautak vak loa din ni se, emergency-a test-na tur din hi tihmakmawh a ni e. RT-PCR khawl pawh hmun 1-a dahkhawm loh ni se, ruahmanna uluk taka siam a ngai a ni.
Core Committee Member te
Chairman : H Lalengmawia, Secretary Health and Family Welfare
Member Secretary : Dr. Gracy Laldinmawii, Microbiologist, ZMC
Members:
1. Prof. Lalnunmawia, MLA
2. Dr. K Pachhunga, MLA
3. Dr. Vanlalthlana, MLA
4. Principal Director, Health and Family Welfare Department
5. Dr. Lalhmangaihi, Director, ZMC
6. Prof. Sukanta Sinha, Head, Microbiology Department, ZMC
7. Dr. Eric Zomawia, Mission Director NHM
8. Dr. Tapak K Dutta, Microbiologist, CAU, Selesih
9. Dr. Lalrempuii, Microbiologist, Civil Hospital
10. Christine Sailo, Scholar, MZU and Microbiologist,
PC Synod Hospital, Durtlang.
11. Prof. Senthil Kumar, Dept. of Biotechnology MZU
12. Dr Vanramliana, Pachhunga University College.
13. Dr. H Lalhlenmanwia, Head Department of Pharmacy, RIPANS