Ar ang kan vai tawh lo’ng

Hman kum lawk khan Kristian Hla Bu-a No. 52-na ‘Lal Isua hming i fak ang u’ tih hla, ‘Ar ang ka lo vai e’ tih thluka sak chungchang kha vawi eng emaw zat Vanglaini chanchinbuah sawi a ni a. Kei pawhin ka ziak ve a, a reh ta vang vang a. Kristian Tlangau (KT ka ti zel tawh ang) lamah chuan rawtna, zawhna ang deuhvin a lo chhuak zeuh zeuh reng a.

KT August 2014 phek 21-ah Kohhran Upain, “Biak Inah kan sakin kan hlimpui viau

ṭhin a... Biak Inah meuh sak hi a pawi ang em..?” tiin a zawt a. KT April 2017 phek 17-ah Kohhran Upa bawkin, “Aw chhimhlei tual kan lenna tlang’ tih hla lenglawng thluka Kohhranhovin kan sak fo leh kan tuipui viau si hi kan Synod hian eng angin nge a ngaih le?” a rawn ti bawk a. He hla thluk bik sawi lem lo hian KT February 2015 phek 16-ah, “Kan Kristian Hla Bua mi hi chu duh ang ang leh dik lo taka sak hi a khap theih ang em?” tiin a rawn zawt a. KT August 2006 phek 10-a chhanna hi a chiang viauvin a lang, hetiangin, “Kohhran Pathian biak inkhawmah chuan Kristian Hla Bua mi ngei hi sa ila, a thluk awm sa ngei hi hmang bawk ila, chu chu kan inkaihhruai dan a ni reng a ni,” tiin. KT-a zawhna an chhanna hi a nem telh telh a, he hla thluka sak mai rawtna hi KT July 2011 phek 17-a chhannaah chuan, “I rawtna hi a ṭha mai thei e. A ngaihtuahtu Synod Music Committee kutah i dah mai ang hmiang. Kristian Hla Bu ennawn leh hunah ngaihtuah zinga a tel theih phei chuan a ṭha hle ang,” tih a ni ta hial a.

Kelkang harhna kal zelin a hrin ni maw, Pu H. Vanlalvena’n Vanglaini April 18, 2017-ah ‘Ar ang kan vai tawh lo’ng’ tih thupuia hmangin Kristian Hla Bu No. 52-na ‘Lal Isua hming i fak ang u’ tih thluk thum lai nei, mahse, lengkhawm thluk kan tih mai, ‘Ar ang kan vai tawh lo’ng’ tih thluka kan sak hian a thluk nge kan duh loh va, ‘Ar ang kan vai tawh lo’ng’ tih hla thu hi sawi chiang ila, tiin, a tawpah chuan, a thluk mila sak theih Lal Isua hming i fak ang u tih a lo awm hi hlaah kan hausa a ni mai lo’m ni? a rawn ti a.

Kan Kohhran mi, Pathian thu lama kan mithiam zinga mi Rev. Dr. Vanlalchhuanawma meuhvin Vanglaini June 8, 2016-a chhuakah thiam leh ngaihnawm deuhvin a chhuah ka han ennawn leh a. Ani pawh hian ‘Ar ang kan vai tawh lo’ng’ tih hla hi sawi zau pahin, a thluk hmanga ‘Lal Isua hming i fak ang u’ tih sak thu a chhuah a, a duh apiang sawi zuiah a ti bawk a. A tawpnaah chuan, “Chuvangin, Kohhranten an duh hunah chuan ‘Lal Isua hming i fak ang u’ tih hi Zorem thlukin (‘Ar ang kan vai tawh lo’ng’ tih thlukin a tihna ni maw?) hlim tak leh zalen taka sa zel turin infuih tlang tawh zawk ang u tih ka han rawt a ni e,” a ti a.

Tun dinhmunah chuan ‘Lal Isua hming i fak ang u’ tih hla hi ‘Ar ang kan vai tawh lo’ng’ tih thluka sak a rem lohna tlem han ziah ve ka duh a ni.

1. A thu lam (syllable) a inzat lo. ‘Ar ang kan vai tawh lo’ng’ tih thluka sa tur chuan KHB No. 52-na thluk khatna leh thluk hnihnaa ‘khumtirin, khumtir khumtir’ tih hi paih vek a ngai.

2. Thluk thumnaa a thu hi kan hmang dawn a nih chuan ‘Ar ang kan vai tawh lo’ng’ tih thluka sa turin a thunawn zawng zawng (syllable 34) hi paih vek a ngai. Chutiang tih chu copyright bawh­chiatna a ni.

3. Dan lam han en hian, a thluk danga kan lo sak ngawt a rem lo. Kristian Hla Bu leh Hla te hi copyright nei vek an ni a. Edition leh re-print zawng zawngah hian All rights Reserved tih hi an chhut hmaih ngai lo. Acknowledgements (Thuhmahruai p.v) han en hian hla neitu leh copyright neituten an hla thlukte nen hman phalna min pek avanga lawmthu sawina te, copyright bawhchhe lo, tidanglam lo tura fimkhur taka tih a nih thu leh tihpalh thila chutiang a lo awm a nih pawhin ngaihdam an dil nghal a nih hi.

4. Hla thute paih ṭhen tur leh hla thluk danga sa turin, copyright dan bawhchhe turin Kohhran puipate i nawr sek lo teh ang u.

5. Copyright Amendment Act 2012 (w.e.f. 21.6.2012).

With the Copyright Rules 2013 w.e.f. 14.3.2013

Chapter III COPYRIGHT 14 (a) hian Musical Works a huam tel avangin a thluk danga sak hi a rem lo.

6. COPYRIGHT 14 (VI)-ah an phalna nei hmasa lova a thluk lo hman chhawn (adaptation) chu dan bawh­chhiatna a ni. Thla 6 aṭanga kum 3 thleng tan theihna leh Rs. 50,000/- aṭanga nuai 2 thleng chawi theihna a nih avangin Kristian Hlabu-a a thluk awm sa ni lo, a thluk vuah chawp ‘Ar ang kan vai tawh lo’ng’ tih thluka lo sak ve ngawt hi dan bawhchhiatna a ni.

- F. Hrangmuana, Republic Veng, Aizawl