Sawrkar ṭha chu tunge?

Mizoramah hian Party an in sawrkar chhawk ta nual a, Union an sawrkar tawh a. Anni hi an sawrkar kha an chhiat an ṭhat sawi theih a ni lo a, bul an ṭanna kha ram buaiin a nang zui ta si a ni. Amaherhawchu, an hruaitu ten in ropui tak an din ve thut thut loh aṭang pawh hian an eiru lo tih a chiang.

Union aṭangin Congress-ah lutin Union Territory-ah CH Chhunga sorkar a lo piang a. Rambuai karah thawpiknate min sutkian sak dawn emaw kan ti a. Ram buai karah sipai an lal si a, an ngam thei chuang lo, kan harsatna a ngai reng a, corruption-ah erawh sawi kai chu lo awm ve mah se an hotu berte corruption-ah an fihlim a ni ang sawi an kal lo hle.

A dawt lehah Pu Ṭhenphunga sawrkar a lo piang a, amah sipai lal a lo ni bawk nen sipai ho pawhin an zah a. Check gate zawng zawng a bo a, kan thawveng huai a nih kha. Hmalak pawh a tum nasa a, amaherawhchu ram buai karah hma a lak tak tak theih loh a, engmah thawk thei loin mual a liam a.

A sawrkarah khan Minister te sawi kai chu awm ve bawk mahse, amah Pu Ṭhena chu sawi tur a awm lo hle a, a hun chhungin in ropui a sa lo a, thlam ropui phei chu tuman an sa lo a ni ang!

Pu Lalthanhawla sawr­kar loa piang ve leh a, Laldenga hote an lo haw duh a nih chuan ka Lal-

ṭhutthleng ka kian ang a ti a. Kum hnihah Lal-

ṭhutthleng chu a kian a, a chhiat leh a ṭhat sawi tur awm lovin.

Tichuan, Pu Lal­denga leh a hote chu an lo haw ta a, Mizoram CM a rawn ni a. Buhfai ei tur kan nei lova, 1 kg Rs. 2.50 a kan lei laiin Aizawl khawpuiah Rs. 16 pawhin lei tur a awm lo a, mipui kan mangang a ni. Sawrkar an siam leh pawh khan ram a mangang zual deuh deuh emaw tih mai tur a ni. Zu zawrh an tuma Kohhran mangangin Biak In tina ṭawng-

ṭai rual an rawt a nih kha. A Minister te corruption-ah an mual­pho a, Lalpa'n a phal lo a ni ang anmahni leh anmahni an intithiam lova, an sawrkar chu a tluchhia a ni.

Pu Hawla sawrkar a lo piang chhuak leh a, ram buai karah kum 20 kan lo awm tawh a, ṭhenawmte mawng phe pawh kan hmu hman lo a nih kha. Theihtawpin ṭan an rawn la a, Tuirial lui khuah te, Falkawn Referral Hospital tur te, Lunglei - Aizawl kawngpui laih tur te, NLUP te a han duang chho a.

Engpawh nise mipuiten kan hriat tur chu India ram State 29 zingah hnathawk ṭha ber lawmman Mizoram hian vawi li a dawng tawh a. Lawmman min petute hi kan pa te a te chu an ni lo a ni tih hria ila, lawm ang u.

Chhungkaw tam tak fahraha min siamtute hi Mizoram mipuite hian kan theihnghilh lo a. Zoram mipuite kan ṭhanharh a hun ta, tunge ram hmangaih a, tuten nge ram tichhia tih te hi kan chhui chian a ṭul ta hle.

Sorkar ṭha siam turin mipuite hi pen chhuak ila, mahni party sahuai thing vawt tlat tawh loin kan ram tana mi ṭha tur thlang chhuak thiam turin ngaihtuahna fim i seng ang u.

- Rochhunga, Hnahthial Model