THOSILEN PAWP LEH MUTBU ṬET KHA AN THLAK TA EM?

Hnam dang tourist-in Ṭamdil a tlawh ṭuma a thil tawn duhawm lo tak, social media-ah a rawn post a, a hnu lawkah Tourist Department lam hmalakna kan hmu nghal. Ṭamdil enkawltu Pu K. Lalrohlua, Boatman (IV Grade) Provisional Employee chu ban a ni.

Thuchhuahin a tarlan danin Pu K. Lalrohlua hian Sawrkarin tih tur leh mawhphurhna a pek ang te ti lovin, zu rui chungin mikhual a dawngsawng a, a duty na hmanruate a enkawl ṭhat loh avangin vawi tam tak insiam ṭha tura an hrilh hnuah pawh Sawrkar leh Dept. timualphoin mikhual lakah a khawsak leh avangin an ban niin an sawi.

P.Hd Scholars, Depart­mental Biology & Herpe­tology Lab. Dept. of Zoology, MZU, te chuan Pu Rotea thlavang hi rawn hauhin, an hnathawh avanga Ṭamdila vawi tam tak kal ṭhinin, an kal apianga Pu Rotea felzia leh, mikhual a lawm thiamzia te, amah chauha khitiang hna a thawk thei mak an tihzia te, he lodge hian enkawl a hlawh lohzia te, kum upa tawh lamin kum 19 lai a lo thawh hnua insawifiahna hun pawh pe miah lova ban a nih avanga mi hnuaihnung zawkte chunga sorkar action lak dan mak an tihzia, social media-ah an rawn post ve bawk.

Kei chuan Pu K. Lalro­hlua, Boat­man (IV Grade) Provisional Emplo­yee, peon pawh ni lo, boatman lehnghal, a nghet lova kum 19 zet he Tamdil hi khawhar taka lo enkawl a, insawifiahna hun pawh pe lo va ban a nih chung changah hian sawi zui ve ka tum lem lo. Ka sawi duh zawk chu Tourist-te laka kan mualpho ṭhinzia hi a ni.

Hmanah Lucknow lam mi, Mizoram rawn chuante ka hruai kual hrep hnuah, kan thil tawn zahthlak tak tak ka tihte ka lo auchhuahpui tawh. Tourist spot a kan hmun leh hmate maintenance awm lo lutuk leh, a balhzia te, mikhualte entir ka ngam lohte pawh a awm thu te, a ni deuh ber.

He Ṭamdil thil thlengah pawh hian, hnam dang mikhual khan a rawn auchhuahpui chu, a enkawltu zu rui te, street light awm lo te, bathroom-a tui awm lo te, thosilen pawp te, darthlalang keh te, bed cover thler te a thlalak nen a rawn post hmiah mai.

Thenkhat hi chu care­taker fel tawk loh chu a awm ve ngeiin a lang, chutih rual chuan hnam dang mikhual pawh hian, maintenance awm lo lutuk a hmuh khan mak a ti a, a rawn post riap mai kha a nia.

Kha thu post vang khan a enkawltu kan ban nghal a, thosilen leh mutbu thler pawh thlak nghalin, darthlalang keh leh street light chhiate pawh chu kan thlak nghal ang chu maw?

Ben harh hi kan ngai ṭhin. Mizoram hian hnam dang khual kan la nei deuh deuh dawn, kan Tourist spot-te changtlung zawka siam ngai a la tam mai, kan neihsa pawh hetianga enkawlna tha nen kan umzui zel loh chuan, kan la mualpho zauh zauh ang.

Kan tourist spot-te hi, a enkawl hna chu mimal hnenah kum khat zel atan emaw, parking fee mimal hnena contract-a pe a kan khawn ang hian, tourist spot kan neihna hmunte pawh, enkawl duhte hnenah pek ṭhin ni ta sela. A faina leh mawina pawh, sorkar mi chhawr ngawt ai chuan an uluk zawk ang a, kan mualpho lo zawk ang mawle.

- Lalrinliana Colney