Ṭamdila Vaipa thu ziak leh MZU mithiamte thuziak

Tourism Depart­ment Director Saitluanga chuan OFFICE ORDER NO. 140 OF 2022 tichhuakin Septem­ber 28, 2022 khan Pu K Lalrohlua, Boat­man (IV Grade), Provisional Em­ployee chu, "Sawrkarin tih tur leh mawhphurhna a pek ang te ti lovin sawrkar hnathawkte awm dan tur leh inthununna pawisa lovin zu rui chungin mikhual a dawngsawng a...," tiin an banna thu an ziak a ni.

September 26 khan Twitter lamah 'Nilanjan' inti chuan Ṭamdil a tlawh thu te, thosilen a ṭeh thu te, darthlalang a keh thu te, a hmunhma a ṭawp thute a ziah bakah a enkawltu zu a ruih thu a ziak a. Mizoramah social media lamah darhin chu chuan Tourism department demna nasa takin a siam a, a bikin Tourism Minister an sawisel nasa a ni.

A tuk tuk leh lawkah chuan Tourism department chuan he thil thleng hi an zir chian leh zir chian loh pawh hriat lovin Pu Lalrohlua hi an ban tawl mai.

A awm dan chhui chian chhung atana hrem lailawk (suspend) pawh ni lova chaw bel ben buak sak zawnga an kal mai hi Mizoram mipuiin an dem a, Tourism Minister leh Tourism Department lakah Mizo mipui an thinur let leh ta lawi si a ni.

MZU-a Zoology-a Developmental Biology & Herpe­tology Lab-a Research Scholar chuan thuchhuah an han siam ve ta a, Pu Rotea chu pa taima tak leh hna hma­ngaih tak an rawbn ti a, Sap mikhualte pawhin an fak an rawn ti ve leh tlat mai.

Thosilen pawp huau leh a hmun­hma chhiat hi an ban tak boatman mawhphurhna a nih loh thu an ziak. Vaipa thu ziak nge kan rin dawn MZU-a mithiamte thu ziak zawk le?

- Lalremruata