MIZORAM STATE LOTTERY TIHTAWP NI RAWH SE

Kan la hre ṭheuh emaw, kum 2018 July ni 7,8 & 9 khan tuna Sawrkar lai MNF party kha tih laia opposition te khan Mizoram State Lottery chungchangah thil fel lo tam tak awma hriain, Mizoram State Lottery buaipuitu ber Institutional Finance and State Lottery (IF&SL) office, Tuikhuahtlanga mi chu an office kal tur an dang hial a nih kha, Sawrkar pawhin Mizoram State Lottery pawh a titawp chhunzawm ta nghal a ni, tih chanchinthar aṭangte khan kan hre chhunzawm zat ta bawk a ni. Tunah hian MNF chu kum 4 dawn lai an lo Sawrkar ve leh ta a, Mizoram State Lottery chu a kalphung a fel ta ngei em tih zirchian a ṭul ta hlea hriatna avangin RTI Act hmanga zawhna leh, Inspection of documents (file endik) te hmang ṭangkaiin kumin May thla chawhnu lam aṭanga August thla tawp dawn thleng khan IF&SL department hnuai Mizoram State Lottery chungchang hi zirchian a ni ta a. Hmasawnna reng reng hmuh tur a lo awm miah lo va, a zualzapui vaihlen hlo an tih ang mai a lo ni a, IF&SL office an dan (picketing) laia an hruaitu MNF ṭhalai President Pu L.Thangmawia kha tunah MLA a lo ni ta hial si a, an buaipui chhunzawm ta lo nge? A manganthlak hle ta mai.

Heti teh nuaih hi a nih vang nge? Ni 22-24, April 2022 a Leitan Pastor bial inkhawmpui, Leitan South Presbyterian Kohhran Biak Ina neih chuan, “Mizoram State Lottery tihtawp ni rawh se,” tiin lungrual takin Presbytery-a kal zel turin an lo pass nghe nghe a, Presbytery leh Synod ah pawh tlang ngei se a duhawm hle a ni. Nasa taka zirchian hnuah tlang ngei se ka tihna chhan chu a hnuaiah hian tarlan a ni:

1. Lottery hi Central sawrkar thuhneihna bik Union List ami niin Indian Constitution Schedule 7 a Union List entry 40-naa awm a nih angin, Central Sawrkar chuan the Lotteries (Regulation) Act, 1998 a siam a. He dan siam hma pawhin Mizoram Sawrkar leh State Sawrkar dang eng emaw zatin lottery hi an lo organise tawh ṭhin a. Mizoram pawhin State kan nih tirh 1987 aṭang khan an lo organise tawh a ni. Amaherawhchu, thil felhlel tam tak a awm avangin fel leh fai zawka lottery-te organise a nih theih nan Central Sawrkarin kum 1998 khan the Lotteries (Regulation) Act, 1998 hi a siam ta a ni. Hei bakah hian the Lotteries (Regulation) Rules, 2010 pawh Central Sawrkar hian a siam bawk a. Tin, section 12 of Lotteries (Regulation) Act, 1998 hian lottery organise-tu State Sawrkarten anmahni hman tur Rules an siam phalna a pe bawk a. Amaherawhchu, State Sawrkar ten Central Act leh Rules kalha Rules an siam a thiang lo va, Central Act/ Rules kalh lai a awm chuan Central Dan siam chu zawm zawk tur a ni.

2. Mizoram Sawrkar pawhin kum 2011 leh 2019 khan heng Central Act leh Rules te zawm (adapt) tur leh lotteries organise nana thil ṭul atan a siam ve bawk. Amaherawhchu, Mizoram Sawrkarin Rules a siama provision ṭhenkhatte chu Central Act leh Rules pumpelh (circumvent) nana siam a nih avangin Dan bawhchhiatna a ni thung.

3. Lotteries organise tu State inkara buaina neuh neuh awm bakah heng State te hian lotteries chungchanga Central Dan siamte an zawm ṭhat tawk loh leh dikhlel deuhva thiltihte a awm nia hriat a nih avangin, section 10 of the Lotteries (Regulation) Act, 1998 in thuneihna a pek angin Central Sawrkar chuan August 2, 2011 khan State Government zawng zawng hnenah thupek (direction) a chhuah a. Chu thupekah chuan India Sawrkar chuan lotteries hi gambling encourage tu a nih avang leh a kheltute khawsak tibuai thei a nih avangin engti kawng maha promote leh encourage ṭha a tih loh thu ziah a ni a. Chuvangin, Central Sawrkar chuan lotteries a organise lo va, Union Teritories te pawh lotteries organise phalna pe lo turin thurawn a pe tih he thupek (direction) ah hian ziah lan a ni nghe nghe a ni. [para 2 of the direction chu hetiang hi a ni: ‘The policy of the Central Government has been against holding or authorisation of lotteries or extending official support to lotteries in any form and for any purpose howsoever laudable on the ground that they encourage gambling spirit and disturb the normal economic equilibrium. Accordingly, the Government of India does not organise any lottery of its own. All the Union Territories have also been advised not to permit any lottery’.]

4. Lotteries hi gambling chi khat niin addict theih a ni a. Mi eng emaw zatin sum leh paia tlakran phah nan an hmang tih hriat a nih avang leh Sawrkar tih atan mawi leh ṭha nia an hriat loh avangin State tam tak chuan an khap hial zawk a. Tunah hian North East State pasarih ( Tripura in an ti ve lo) Arunachal, Assam, Meghalaya, Manipur, Mizoram, Nagaland, Sikkim bakah North East pawn ah Goa, Kerala, Madhya Pradesh, Maharashtra, Punjab leh West Bengal-ah te chauh lotteries hi phal an ni. State dang zawng leh UT zawng zawng-ah te chuan khap a ni. State dangah lotteries kan organise na-in, kan Sawrkar emaw, State dangten Mizoram chhungah lottery ticket te rawn zuar ta se kan duh lo viauin a rinawm.

5. Mizoram Sawrkar hian lottery hi ṭha a tih vang reng ni lovin sum lakluhna hmanruaah a hmang ni berin a lang a. Chutih ruala thil ngaimawhawm tak mai chu lotteries organise dan a fel tawk loh avanga State sawrkar-n sum a hmuh tur ang pawh hmu lova Lotteries Act leh Rules ten a tum dan ni hauh lova Distributor ten hlawkna tam zawk an tel hlauh zawk ṭhin hi a ni. Lotteries distributor te hi free hand pek an niin, Lotteries Act leh Rules te zawm ziktluak a nih loh avangin State Sawrkar chanpual tur hlawkna tam zawk chu distributor te leh an thurualpuiten an tel ta zel mai niin a lang. Hemi chungchangah hian vested interest lian tak a awm a, chu chuan Lotteries aṭanga State in sum a hmuh tur pawh mimal kutah a luhtir zawk ṭhin niin a lang. Lotteries Act leh Rules zawm loh lai, pawimawh em em site chu a hnuaia mite hi an ni:

(a) Section 4(d) of the Lotteries (Regulation) Act,1998; leh Rule 3(17) of Lotteries (Regulation) Rules, 2010 leh Para 4.2(ii) of Direction of Central Govt dated 2nd August, 2011 ten an phut angin lottery ticket hralhna man (sale proceeds) zawng zawng hi State Sawrkar Consolidated Fund ah dah luh vek tur a ni a. Amaherawhchu heng dan te kalhin lottery ticket hralhna (sale proceeds) zawng zawng hi Distributor ten an kawl vek a, chuta ṭang chuan State Sawrkar hnenah minimum guaranteed revenue leh administrative expenses chauh an chhunglut ṭhin a ni. State Sawrkar hian lottery ticket hralhna man (sale proceeds) zawng zawng hi danin a phut angin a dawng vek tur a ni nain, a zat pawh a hre lo tih RTI chhanna aṭangin a lang a ni.

(b) Rule 4(4) in a phut angin hetiang sum chhunluh aṭtang hian lotteries Distributor te commission leh lottery mantute hnena Distributor ten price money an pekte hi pekchhuah leh tur a ni a. Hengtianga sum pekchhuah hnu a la bang zawng zawng hi State Sawrkarin lottery aṭanga hlawkna a tel tur chu a ni. Amaherawhchu Rule 4(4) kalha lottery hralhna sum zawng zawng Distributor te kuta dah a nih avangin a hlawkna zawng zawng hi Distributor ten an tel ta zawk a ni. Hei tak hi Comptroller & Auditor General of India (C&AG) in kum 2016 a Mizoram Lotteries chungchanga Audit Report a tihchhuah a thil dik lo lian tak a hailan kha a ni. C&AG Report-in a tarlan dan chuan kum 2012-13 leh 2014-15 chhunga Mizoram lottery ticket hralhna sum tlingkhawm (sale proceeds) Rs 11,834. 22 crores aṭangin Rs 25.45 crores chauh Mizoram Sawrkarah an chhunglut a, Distributor te erawh chuan Rs 2182.79 crores an chang thung a ni. Hetiang a ni chung hian tunah pawh “State dangte pawhin an ti” tih ṭanchhana tihdanphung thlak lova kalpui chhunzawm a ni. State dangin Dan an bawhchhiat avangin Dan kan bawhchhiat hi a thianghlim ta tihna a ni lo tih erawh phat rual a ni lo vang.

(c) Rules 3(10) in a phut angin bumper draw tinah cheng Nuainga aia tlem lo leh draw dang zawng aṭangin draw tinah cheng Singkhat aia tlem lo Distributor te hnen aṭangin an la tur a ni a. Hemi aia sang hret hi Distributor ten an tiam tlangpui a. Hemi provision in a tum chu lottery ticket hralh chhuah hi a lo tlem hle pawhin State Sawrkarin a tlem berah Rules 3(10) in a phut hi an hmu hrim hrim tur a ni. Hei hi minimum guaranteed revenue tia hriat a ni tlangpui. Lottery ticket hralh a tam hle chuan State Sawrkar hian he minimum guaranteed revenue aia sang tak a hmu ṭhin tur a nih laiin, tuna State lottery kalpui danah chuan minimum guaranteed revenue hi kan maximum revenue a ni nghal bawk a, hemi bak a hlawkna zawng zawng chu Distributor leh an duhsak zawngten an insem mai ṭhin niin a lang. Hei hi G&AG Audit Report 2016 pawhin diklo a tih kha a ni.

(d) Rule 3(19) in a phut angin Annual Financial and System Audit hi tih ngei ngei tur a ni a. He Audit hi tih a ni ngai lo kha C&AG Audit Report 2016 in dik lo/fel lo tia a report kha a ni. RTI zawhna chhanna a a lan danin he Annual Financial and System Audit hi tun thleng pawhin tih a ni ngai chuang lo tih a chiang a.

6. Tarlan tawh angin kum 2018 chho khan tuna Sawrkarna vuantu MNF party hian lotteries organise danah thil fel lo tam tak a awm tiin draw zawng zawng titawp vek turin nasa takin an nawr a. Kum 2018 July ni 7 atanga ni 9 inkar khan lottery draw nei thei lo khawpin Director IF&SL leh a Staff te office kal tur an dang a. Lottery draw pawh July ni 9 aṭanga suspend a ni a. Court order avangin lottery draw hi April ni 15 atanga June ni 30, 2019 thleng chhunzawm leh a ni a. Kalphung fel lote hi tihfel theih a nih loh a, Dan kalha kal ai chuan Mizoram Sawrkarin lotteries a organise hi tihtawp mai ni se tih rawtnate pawh a awm nain, tender tharte kovin kalphung ngaiin State sawrkar hian a tharin lottery hi a kalpui chhunzawm leh ta a ni.

Hetiang hi Mizoram Lottery nihphung a nih avangin leh moral leh ethical issue lian tak a ken tel avang leh Mizoram Sawrkarin sum harsatna nasa tak a tawh mek lai a, Mizoram Sawrkar ni lo Lottery Distributor/Agent leh mi tlem te ṭhenkhat chauhin an hlawkpui nia lang hi Kohhran pawhin bengsika a ngaihtuah a ṭul ta hle a ni.

- VL-a, Tuikual South