Condom hmang rawh
“CD rawn keng rawh aw” tih hi a hmun a zirin a awmze danglam thei tak a ni awm e. Computer khawihna lamah chuan thil copy nan an hmang ṭangkai viau. Condom rawn keng rawh aw, chu an ti lawng lawng lo maithei e.
Engpawhnise tuna kan sawi CD hi a pawimawh nangiang tih chu a chiang reng mai; sorkar reng hian a dah lian em mai. Sum tam tak sengin kum hei leh chen hi kan buaipuiin kan do tawh a, mahse do rem ahnehin Aids vei kan pung tual tual emaw tih mai turin kan state puma Aids vei dinhmun hi a awm chho mek a ni.
Tun hma 1995 chho Lengpui kawng hlui Airport kawngah khan kawng kama “Use condom to avoid Aids” tih kha kan kawngpui zawh zin ve ber a ni bawk a, ka han ngaimawh ṭhin khawp a. Ngaihtuah chian loh chuan Aids hrik pumpelhna atan a ṭha a nih chu, tih mai a ni. Ngaihtuah ngun deuh erawh chuan kan hnam mualphona siamtu nasa tak a ni tlat si.
Lengpui thlawhna ṭumhmuna lut leh chhuak hi Mizo vek chu ni ila a zia tak a awm mahna, mah se thlawhna service ṭan phat aṭangin hnam dang an tam lutuk a, airport aṭangin Aizawl an rawn panna a langsar ber chu an hmuh hmaih miah lo. An rilruah chuan Mizo hmeichhiate hi Aids vei an tam awm, condom ka neih phawt chuan duh duh an riahpui theih dawn a nih hi, an ti hialin ka ring ṭhin.
Chu boruak chu rilruah a cheng reh thei tlat lo a, tun thleng hian kan sorkar department pakhat MSACS hmalakna lian tak a la ni reng a. Hoarding an tia mawni hi a awm thluah hi. Aids zawng a lo hlauhawm a ni ang, hetiang ringawta mite vaukhanna thuziak hi ka nitin kalna Vaivakawn bazarah chauh pawh hian 10 chuang zuk intara mawle!
He bazar hi drugs khawihho leh KS ho tuallenna te pawh an chan deuh rum rumin ka hria. Hetiang a nih chuan Aizawl khawpuiah hian engzat tak tar ang maw. Hnam dang hian Mizo hmeichhiate hi engtin tak nge an hmuh ang ni. Drug a hluar si, zu a tam si, zunin a ek cheh rual zurui tamzia te hi aw!
- Lalremliana Pachuau, DVT