PU CHHURBURA THU MI HRILH

Kawla ni chhuak chhiarin, thlan tui leh hnap tui nen, a sur, a sa hnuaiah, hahchawlh leh hahdam pawh sawi thei lovin hna in thawk a. Leilung anchhia kan dawn hi malsawmnaa chantir tumin, hahthikulin in Buh-phal leh thlaichi in fehchhuahpui ṭhin a ni.

Ruahpui leh thlipuiin uithisawn hnuin, in thlai leh buh leh balte a sawisak kual hnuah leh, sik leh sa in her, khawvel boruak danglamin a chil hrepa liama himdam la awmchhun, tlem la chuangbangte chu khawmin, sumah chantir in tum thin a nih kha.

Hmakhawsang ata tawh RIDP, Jhum Control, BAFFACOS, NLUP, SEDP-in tan an ti, heng sawrkar Policy lian hi inzingah tunge dinchhuahpui tawh che u? Ṭhenkhatin SEDP, NLUP hmangtein an thlem che u a, hmasawn nan leh dinchhuahpui nan a hmang ṭangkai in awm em? In ngaihtuah chiang teh u, in khua a mi khawsa thei sa leh hmakhawsang aṭanga lal buhzem lo zen pha chin, tu leh fa bakah, Political Party a duhsakna hleihluak dawngtute chauh lo chuan an hmang ṭangkai tak tak lo ang, chung mite hnuaia in hlawhfa nitin tur chuan duh taka in thlan tlinte hian an siam che u zuk ni a!

In grape thar chhuah sa te kha, a chin tirtu che u khan an man sak lehzel che u a, a hnawksak lo zawng hian a siam (process) theih a, hlawkpui theih asin. Chutah an tihngaihna hre lovin an han zawrh tir leh che u a, heihi sorkar tha policy, kalphung thar chu em ni?

Bible chuan, "Tangka sum ngainat hi sual tinreng bul a ni," a ti a. Sual tinreng do ngam si lovin, a ram pum huapin, Kohhran leh NGO hrang hrang, Sorkar hovin in tharchhuah, anmahni (sorkar) ngeiin ching tura an tih che u, an han do zui ngam che u hi chu mak in ti ve tho em!

Zu kaihhnawih hrim hrim hi ka fak lo, (Khawizu tih loh chu) fak tlak lah a ni hek lo. Amaherawhchu, sual bul ber ang mai a, a ram pum huap a in han do mup mup mai hi chu, do hmasak tur hlemhletna-in do ṭha leh ngam si lo hian ka thluak a ti buai a ni.

A hnathawktu, a kawng sat a, a thla chawidingtu a hna thawkte leh an ṭhatlai hun zawng zawng ram leh hnam tana tha leh zung lo khawhraltu a Pensioner te thawh hlawh pawh pe thei lo khawpa ram leh hnam enkawltute kha in lo hmu ve em?

Tlem lai deuha in sawh­thing leh aieng bag, kawng sira tlu sawp rum maite ṭhinte kha ka lo hmu ve asin... Mahse, vai dawrah phai aṭanga siam sa chawkluh, aieng leh hmar­chabawl in lei leh tho si! A va mak ve! In sawrkar hian in thlaitharte ei tur a, a siamna khawl (industry) leh a hralhna (market) tur tal pawh a zawn sak thei lo che u em ni?

Khawpui Bazar pui (New Market) te lah chu khualzinte len veivah nan pawha zahthlak khawpin an siam sak che u a, an sak ṭhat sak thei mawlh lo che u a ni. Sumdawngtu leh leitumtute tan pawh buaina tam tak a lo chhuak ta a nih hi!

Sorkar demna tur zawnga vak ruk ruk ka ni bik lo a, rorelna khawl hmaa thu tura ruat ve ka nih loh avanga phunnawi lah ka ni hek lo. Party office a sum therhlo ka chan loh avang leh kan veng Unit hruaitu leh Local Council/VC ten min duhsak loh em vanga he thil hi au chhuahpui ka ni hek lo. He ram hian Thing leh mau, (Foreign mau in mamawh lo) khuarel malsawmna tam tak a nei a, mahni intodelh thei turin khuanu hian a siam che u, tih hi ka hre chiang em a, harh turin ka rawn ko che u a ni. Nang ni in au loh chuan lungte a au dawn lo a, retheihna erawh chuan a bawhbet hneh khawp ang che u!

In kawngpuite lah chu, khampang sate kawng tum ang maiin, a tha lai a piang hel ngai zawk ni awm a ni! Sahdal lianpui kam hial asin ka nap hial ni.

Inthlan a lo thlen leh dawn chumi hunah chuan Hmasawnna chhia leh ṭanpuina bawrhsawm hmangin, cheng nuai/Vaibelchhe tel hmangin an la rawn thlem leh ang che u. In rilru takin ram leh hnam hmangaihtu chu i hre thei ang a, he ram a changkan chuan i changkang dawn a, he ram hi a nawm chuan i nuam dawn tih kha chiang takin hria la, ram leh hnam hmangaihtu in lo thliar hmak hmak tawh dawn a nia, Party Politics ah hian lo buai phili viau tawh teh suh u, tiin, ka bula ṭhu putar hmui hmul ṭuak vau tawh, kan Pu CHHURBURA chuan mi hrilh mawlh mawlh a, Naa chu ni se, a thu sawi chu ka awih hauh lo vang, mahsela; hnial rual a ni si lo!

Tukverh a Chawngzawng thlawk chhuak zawk chuan min ti harh zawk a, ka tho zui ta a.

- CVL Fakhlamawia