MIZOTE HI COMPENSATATION HNAM KAN NI RENG EM?

Kan ram hruaitu lo ni tawh mi langsar tak pakhat chuan, "Mizo te hi Compensatation hnam," kan ni e, tiin a lo sawi tawh a. Hetia han ngaihtuah mai chuan a nuihzatthlâk viau a, ngaihtuah chian erawh chuan an zahthlâk tel thung a ni. Kan Kristianna kum 100 chuang fe a nih hnu hian Krista tel lovin a "tian" laiah kan inhnangfakin kan inawm tlei mai mai a. Kan ni tin nun chu sum leh pai tam zawk thawhchhuah duhnain kan khat a, chutah chuan a dik leh dik lo, Kristian tih a mawi leh mawi lo pawh en lovin kartluangin dawt leh a sehhmeh hmangin nun kan chheh pawlh a. Pathianni a lo ni a, tihsual nei lo ang mai leh thah thiang lo lenin kan leng leng leh a. Pathianni tuk inkhawmah meuh hi chuan Setana pawh a rawn nalhin Angel ang maiin a lang ta ṭhin a ni. Hetiang hian Pathianni chu Pathian tana serh ber ang zia zangin an ka pawh zen ila min seh rih lo tur Kristian lem chang hi Biak in tualah kan inhmu ta suau suau ṭhin a ni ber e.

Compensatation chu eng nge ni?

Kan thupui kal kan kal pêl ta lek lek mai, Compensatation han tih hian mi ṭhenkhat te rilru a lo lut nghal chu "sum siamna" tih hi a ni ngei ang. Compensatation hi mizotawng simple tak a dah chuan 'zangnadawmna" tih mai a ni a. A tuartu ten sorkarin thil pawimawh atân an rama hman tur hlutna man hu vel a pêk tur ti ila kan hrethiam mai awm e. Hei hi a ni kan thupui kha. Mizoramah hian he Compensatation avânga hmasawnna hnathawh tur ang thawh theih loh te, ram buai awm avanga ram neitu dik takten an ram hlutna an chan hlen tak leh sum hmuh mumal tak loh hi sawi tur a awm nual ta mai. Tin, ram invuak thuah te, pass lem leh thlai awm mang lo awm thar ta ṭeuhte a awm fo avangin hian kan ram hruaitu pa khan ,"Mizote hi Compensatation hnam kan ni," a lo tih phah ta reng a ni. He Compensatation sum duhna hian ram hruaitute aṭanga thingtlang kil ber thlengin min hrut a. Kan rinawm vena leh kan Kristianna te chu fiaha kan awm chiah chuan tu nge kan nih a lo lang chiang ta ṭhin a ni. Tin, he Compensatation sum hmu hnem tak tak zingah felhlel taka tite hian an nun chhui zui an dâwl lo hle niin a lang bawk a. Khawvel mite mit hmuhah awhawm tak angin lan chang nei mah se, belchian dâwl lo tak tak sawi tur an awm nual niin a hriat a ni. Compensatation avânga sum ngah ta thutte chu hlima nun nuam tak nei awm tak an nih laiin, eng vangin nge an nun an awhawm viau tak loh? Hei hi a chhan chu kan Pathian thuin "Sum ngainat hi sual tinreng bul a ni," a tih vâng a ni a. Sual tinreng bul kan neih miau chuan sual dang hian a um zui fo ṭhin reng a ni. Hei bakah hian Mihring nun tihchhiat dan awlsam ber chu an duh tawk sum hman tur leh thuneihna pêk hi a ni an lo ti ṭhin. Hei hi mi tam tak chuan kan hmu thiam lo fo va, sum leh pai te, nihna leh chanvote neih belh tumin kan ni tin nun kan hmang a, a tawpa min hruai thlenna erawh kan duh loh thil a ni ta fo ṭhin a ni.

Compensatation hnam chu kan lo ni reng em?

He zawhna hi kan tun dinhmun en hian chhan har tak a ni tawh a. Awlsam taka ni; ni lo tih mai hi an har tawh a ni. "Mi tam tak chuan, nang pawh Compensatation hi i ramah hmu la, dik takin i ti bikin ka ring lo." an ti mai thei. Ka chhan tur chu hei hi a ni, ka ramah lo kal ve ta se, "Dik lo taka sum hmuh ṭeuhin a ngawng ṭhat lo zia ka hmuh avang ngawt pawh hian dik takin ka ti ang," tih hi a ni. Kristian kan ni kan intih lai hian Compensatation hnam anga puh kan nihna hi bûk tawn ila, kan hnam lungphûm, sum duhna nasa takin a thiah mek dan en hian kan hnam hian boralna kawng a zawh mek a. Kan Pathian thu sawi te hian min chhan dawn lo va. Kan siam ṭhat theihna awmchhun chu Kristian te tihdan tur taka nun dik neih a, dik lo kan dodâla kan hmachhawn ngam a ngai tawh a ni. Pathiannia Kristian, a tuk aṭanga dawt leh mi rel bansan tum si lo, kartluana mi dang bum pawisa lo nun kan neih chhung chuan kan thlahte leh he hnam hian boral a hmabak mek a ni. Chumi siam ṭha thei tur chu nang leh kei lo hi he hnam hian a nei chuang lo va, chumi atân chuan engtia thui nge i thawh ve ngam dawn le?

- Engkima Colney