CORONA HRI DONA HRULAH: TANGKA SUM

Corona hri kan dona in a ken tel thil tam tak a awm. Chung zinga kan ram, Mizoram Hlimthla a lang chiang em em mai chu 'tangka sum' hi a ni. Kan nitin chanchinbute kan han chhiar a, CM relief fund-ah mi inphalten sum an thawh thu te, pawl hrang hrangin sum an thawh thu te, he hri dona atana suma lei Ambulance pek thu te a chuang a. 

Tlem lai deuh khan sum dinhmun hriat chian loh thu-ah kan hotupa ber kam chhuak te, eptu lam kam chhuak te, sorkar hmasa sum enkawltu kam chhuakte hial pawh kan hria a. Sum dinhmun tuna sum enkawltu in a sawi chian theih loh vang a ni ber. 

Sum dinhmun a ṭhat loh kan hriat hnuah chuan mi tam tak, Mizopa inphal te an lo pen chhuak ta a. Corona hri vei leh vei lo enna khawl, Mizoram Sorkarin a neih loh avanga kan mamawh em em si leina tur pawisa fai cheng nuai 21 (21,00,000) Pu Thantluanga, Hauva & Sons ten an thawh thu te kan lo hria a, a ropui hle mai. State khat sorkar ve riang ruangin hetiang hrileng veite hriatna khawl kan nei lo mai hi chu a zialo hle mai. Ṭhenawm state te ta kan hawh kual thul. 

Chutihlai chuan, Mizo­ram state PWD Department chuan Lengpui Airport an thawm ṭha a, pu ber pawhin an hna a enpui ṭhin tih te, Ramhlun Vengchhung kawng ‘Pu Laldenga(RIP) kawng zauh, a zim zawnga mihring kalna tur siamna atan sum engemaw zat sen a nih thu te kan hmu bawk a. Thenzawl Police Training Centre lamah pawh sum hmanna tur tender a chhuak bawk an ti. 

Tin, MNF sorkar hma­sawnna atan a hnathawh tur bulpui (Flagship Programme) Mau chin turah a chi supply-tu tur zawnna (tender) chu pakhat chiahin a chhang tih te; hemi mau chinna atan cheng nuai sawmkua (Rs 90,00,000) dah a nih thu te kan hmu bawk. 

He tihlai hian Health Department audit thut a ni zui bawk a ni. Nitin chanchinbu chhiartute chuan Coronavirus kan donaah hian sum thu hi sawi tel a tam hle a ni ang e, sum a awm tih a hriat a, Sum hi Corona hri do nan hian a kai rual lo emawni zawk tih hi ngaihtuah tham tak a ni.

Nitin chanchinbu te whatsapp group te ka han en ve chang hian Mizoramin tangka sum kan buaipuizia hi chu a hriat theih. Tuk khat chu, tihian ka ngaihtuah a. Kan nitin chanchinbu te hi Sapṭawngin ziak ta ila, hnamdangte hian han chhiar ta se, English daily pawh kan nei ve thova, an chhiar mahna, engtin ngai ang maw?  

Mizo Kristiante chuan tangka sum an buaipui nasa khawp mai, an ti ngeiin ka ring. Tangka sum thu a mite min hmuhdan tur hi eng ang tak ni ang maw le! 

Tichuan, Pathian ringtu, Mizo Kristiante hian kan hriat hnu ni mahse, eng tiang chiahin nge kan Thurinbu (Bible) hian a lo sawi ṭhen­khat ka rawn chhawp chhuak a, i chhiar teh ang u. 

1. Tangkarua te vaivut angin a khawl a, hlum ang maiin a silhfente a tiang khawm na a; Tiang khawm mah se, mi fel chuan a sinsak ang a, pawi khawih lote chuan tangkarua chu an insem ang.

(Joba 27:16, 17) 

2. Tangkarua sum ngainatu chuan tangka sumah duhtawk a hmu lovang a, hausak ngainatu chuan duhtawk a hlep hek lo vang. Hei pawh hi engmahlo mai a lo ni. 

(Thuhriltu 5:10) 

3. A sum ring mi chu a vuai ang a, mi fel erawh chu hnim angin a duah ang. 

    (Thufingte 11:28)

4. Ani chuan a chawimawi che avangin, Lalpa i Pathian hming atan leh Israel-ho mi thianghlima tan chuan i fapate an tangkarua leh rangkachak nen hla tak aṭanga hruai turin, matheilovin thliarkarte chuan mi nghak ang a, Tarsis lawng liante chuan hmasak ber an chuh ang. 

    (Isaia 60:9) 

5. Lalpa chuan heti hian a ti: “Israel bawhchhiatna pathum avangin, a ni, pali avangin, a hremna chu ka tireh lovang; tangkaruaa mi fel an hralh avang leh pheikhawk bun khata tlachham an hralh avangin. 

(Amosa 2:6) 

6. Ka zirtirnate dawng rawh u, tangkarua ni lovin; Tin, finna chu rangkachak duhawm mi ai pawhin.

(Thufingte 8:10) 

7. Tangka sum ngainat hi sual tinreng bul a ni si a; chu chu ṭhenkhatten an awt a, rinna chu an kal bosan a, anmahni leh anmahni lungngaihna tam takin an inchhun tlang ta chuk a. 

(I Timothea 6:10) 

8. Sum tam tak aiin hmingṭhat hi thlan zawk tur a ni a, tang­ka leh rangkachak aiin duhsakna a ngainatawm. 

(Thufingte 22:1)

9. Mahni sum ring a, mahni hausakna nasa tak chhuangtute chuan, tu man an unau pawh an tlan thei tawp lo vang a, Pathian hnenah tlanna an peksak thei hek lovang. 

    (Sam 49:6,7)

10. Tin, Isua chu Pathian biak inah chuan a lut a, biak ina englo zuartute leh leitute zawng zawng chu a hnawt chhuak a, tangka thleng­­tuho dawhkante leh, thuro zuarho thut­phahte pawh chu a nam thluksak a; an hnenah, “ ‘Ka in chu tawngtaina in an ti ang,’ tih ziak a ni; nangni erawh chuan suam hmangte pukah in siam zawk thin a ni,” a ti a. 

(Matthaia 21:12,13)

Heng kan thurinbu (Bible) chang ka rawn chhawp chhuah te hi Pu K.L Liana ṭawngka han hawh lawk ila 'Bible chang khawhar' ah ka’n ngai ve a; Tu sawi hlawh lo, chhiar hlawh lo, kan Pathian kan rinnaa kan nunpui tur, kan nitin nuna min kaihruaitu tur pawha kan hlamchhiah ṭhin an ni thei mai em tih te hi ngaihtuah tham a ni em le!? 

Mizo Kristiante hian 'tangka sum' hi kan va buaipui tak em! Heng thu kei tehlul hian inthlahrung takin kan rawn ziak a ni e. Tuma pawi sawi ka tum lova kan in ngaihtuah thar hi chu a ṭulin ka hria.