YASHWANT VS ARUN
BJP hruaitu hlun, Union Finance Minister hlui, Yashwant Sinha-a'n tun hnai, Sept. ni 27 khan Indian Express-ah thu a ziak a, ram sum leh pai dinhmun chungchangah sorkar laipui chu na takin a bei a, a fapa, Jayant Sinha chu Union Minister of State for Civil Aviation a ni mek lawi a! A sawi dan chuan, April aṭanga June inkarah khan ram sum dinhmun chu zaa 5.7 chauhin a ṭhang a, kum 2014 January leh March inkar hnu lamah a hniam ber ṭum a ni a, ram sum dinhmun ṭhanna hi kum khat leh a chanve vel kal ta aṭang khan hnungtawlh mah se, ngawih a chuh hram hram a, a ṭhanna hi zaa 6 hnuai lam a nih hnuah a ngawi thei ta lo niin a sawi bawk.
Amah ni mi naran lo tak a ni a, IAS officer hna kum 24 a thawh hnua báng, Pu AB Vajpayee-a sorkara Finance Minister leh External Affairs Minister a ni a, France ram nena inlaichinna kawngah a thawh
ṭhat avangin France rama civil mite chawimawina sang ber, Legion of Honor (Officier de la Légion d’Honneur) pawh a dawng tawh an ti. Sorkar a beihna hi BJP hruaitu dang, Shatrughan Sinha pawhin a thlawp a, NDA-a tel tho, Shiv Sena pawhin Pu Sinha thusawi hi a dik lo a nih chuan finfiah turin sorkar laipui chu a phût a, BJP hruaitu tam takin hrem an hlauh avangin thil awm dan dik tak hi an sawi ngam lo niin a sawi bawk.
Pu Sinha chuan tangka note lian tihtawp te pawh kha sum dinhmun a ṭhat hle loh chuan tih loh tur a ni a, a nghawng a na a, GST hian a rawn belhchhah leh bawk niin a sawi a, NDA kaihhruai sorkarin thla 40 chhung ro a rel tawh avangin, sorkar hmasa dem theih a ni tawh lo a, Finance Minister, Arun Jaitley-a'n ram sum dinhmun a enkawl dan hi a dik lo niin a sawi bawk. Finance Minister, Arun Jaitley chuan Pu Sinha hi hna leh dinhmun engmah chelh lo a nih avanga phunchiarah a puh a ni mai thei, a rawn chhang zui leh a, 'Inthlannaa la tling ngai hauh lo hian min sawisel suh se. Bial enkawl tur nei ngai lo, Pu Jaitley-a te ang hian mipui dinhmun an hre tak tak lo. Kei hi sorkar hna aṭanga pension hnua politics-a lût ni lovin, IAS hna bansan ngam ka ni a, kum 84 miin hnathawh tur ka beisei dawn em ni? a ti leh mai.
Heta lang chiang ta chu - Yashwant Sinha hian thla 40 chhung hi ram sum dinhmun siam ṭhat nan a rei tâwkah a ngai a, sorkar hmasa, UPA sorkar kha dem chi-ah a ngai tawh lo. Tunah hian ram sum dinhmun a ṭha lo a nih chuan, mi dang puh tur an awm lo niin a ngai.
Narendra Modi-a pawhin, 'Party dangin kum 60 an enkawl tawh hi, thla 60 min han enkawltir ve teh u' a ti a nih kha. Mizoramah hian insawi chhiat leh indem, mahni thawh ṭhat lohva mi dang puh kan ching hle mai a, party mi ruhkawlten an awih a nih pawhin, thil ngaihtuah deuh chin tan chuan pawm a har ṭhin.
Sorkar sum zém leh thuneihna nena ram kaihhruai hi, tih tak taka thawh chuan, a rah hi a lang har tehchiam tur a ni lo. A hmin mai lo a nih pawhin, a kuhmum, a par, a rah sénte chu a lang ve mai tur ni àwm tak a ni. Kan insawifiahna leh thiam thu aiin, kan sulhnu leh kutchhuakah miin min teh zel zawk a ni si a.
- RK Lianzuala