Hei lo chu kan nei lo; pawm rih mai ang u!
Tunah hian Mizoram hian Pu Hawla leh Pu Zorama lo chu Pathian hian min pe rih lo. Kan phu tawk, kan chunga roreltu tura Pathianin a dah an ni rih!
Pu Hawla a chapoin ṭawngkam a thlahdah kan ti. Pu Zorama lah sawi loh tur a sawi hnem, vision nei lo ve ve kan ti kum tin chung pawhin anni pahnih hi kan nihtir chhawk reng tho. Party dang chu hruaitu lawk zual pahnih khat kan hria, ‘Chief Minister se chu...’ tih leh ‘Enchhin ve reng reng chu an chakawm...’ tih hi kan beiseina leh kan dinhmun leh tur chu a ni, a bak awm rih dawn lo!
Mipui nge thiam lo hruaitute? tih hi inzawh fo pawh a ngai lo; thiam lohna em em bik kan nei lo ve ve. Tuna kan sukthlek leh hawi her han en hian la sorkar ngai miah lo hian inthlana chakpui tur khawp candidate an nei lo ang. Tling lo tur chiang saa ngaih vote hi Mizo te chauh ni lo, hnam dang pawh hian an peih bik lo ang!
Thil chiang sa ang ziazanga ka sawi theih chhan chu Delhi-a AAP sorkar siam theihna tura AAP hringtu, Anna Hazare ang kha Mizoram hian kan nei lo. Nei tur pawhin kan morality chhe lutuk tak hian a phu rih lo!
Sorkarna chang tur thlang tlingtu tak tak hi chu neutral te hi an ni ziah. Sorkar thar hlak sorkar tir a, enchhin ve tawh hi chu a tam zawk hian kan duh, mah se tu man bul kan ṭan leh pek lo ang.
Engvangin nge an tlin loh ang ti kan awm em? Duhthlan tur dang kan nei lo! Chief Minister se kan tih em em kha bial zawng zawngah hian a ding thei dawn lo. CM atan duh em em mah ila kan biala ding tura kha kan hriat chian mi a nih leh maiu si loh chuan kan enchhin ngam leh pek lo ang. Mi thar vote ngawt mai hi chu ram hruaitu chungchangah thleng pawh hian thil thleng zen zen loa ni. Mi thar ṭhenkhat lah chu politics huanga experience la nei mang lo an ni emaw, upat chan changa an Party-a senior lam an lo nih avanga an awmtir tak mai te kha candidate-te an ni leh nuk maithei. Eng aiah nge kan hmelhriat loh aiah an party leh anmahni thlenga kan hmelhriatte chu kan vote leh mai loh ang?
Party pathumna lian tak hi tun thla li nga kal ta kha chuan piang a, ropui taka kal mup mup a hun tawh laiin, tunah nawi te tein a piang ta nuaih mai a, kan political party hriat lar ve dang pawhin eng ber nge an zawm tih pawh kan chiang hleithei rih lo! Awmna chu an nei ngei maia, pressure group nge an dina Party tak tak tih pawh hi chhut tham fe chu a ni. Political Party hlun hian mipui harh lo rama Party thar lo piang hi eng ang thawm pawh rawn nei mah se, kan tun dinhmunah chuan, lehlam pawl dawr pawh hi a sai pha lo ang!
Inthlan dawnah sorkarin kawng te a siam ṭha leh zuai ang a, kan lungawi leh vek tawh maithei ni?! Ram hruaitu chapo kan neih chuan chapo theiin a hruaiate hian kan siam tihna a nimai, ram hruaitu ṭawngkam umpha lo kan neih chuan Phunlawngawia te bak kan ni lo tih a chiang a ni leh mai. Hun a tih hunah Pathian hian hruaitu thar chu min pe leh mai ang. Tunah chuan an pawisa note zawr tawh lam pahnih hi kan chan tawk an ni rih e!
- RsZualaRenthlei, Leng Khua