MYANMAR-A KAN UNAU TANGKHANGTE HI

Myanmar rama tang­khang, mi 95 te chu kan sorkar hriatpuina ni lovin, sub headquarters YMA, Champhai hma­laknain, Ruantlang High School-ah leh, Presbyterian Cen­tenary hall-ah quaran­tine mek an ni. Hmun danga mi nen an vaiin mi 200 chuang an ti.

The Frontier despatch, weekly magazine June, 15, 2020 in a tarlan danin Myanmar-a tangkhang 240 chuang in report an awm a, in report zinga tel lo, lo hawte thubuai siamsak an ni, a ti. 

In report-te hian an manganna thu kha social media lamah kan lo hmu tawh a, central sorkar thu nghah kha an tan nghah ngaihna a awm tawh loh thu leh, an nih ang anga lo chhuk tawp mai an tum a, tun hun hi an thleng ta a ni.

Tute nge tangkhang?

India leh Myanmar ramri-ah hian zalen taka veivah theih a ni a, mi ṭhenkhat an tangkhang ta a. Heng mite hi lehkhazir emaw, sorkar hnathawk emaw an ni lo a, mahni ṭul leh pawimawha kal an ni ang. A tawi zawngin mi langsar lo, mi rethei zawk an nih hmel. Harsatna an tawh hi chanchin bu lamah hmuh tur a awm lo, social media lamah chauh hmuh tur a awm, sorkar chhanna chu a beidawnthlak em em, khawngaihthlak tak an ni.

Mizo vek an ni e

Phaia awmte kan hruai haw a, zirlaite leh hna thawh neite an ni. Kan ngaihsak ṭha khawp mai, duat theihtawpin kan duat, an chunga kan senso pawh tam tak a ni tawh.

Myanmar lama kan unau tangkhang ve te hi, phaia kan unaute kan buaipui ang hian ruahmanna fel tak hnuaia an lo haw dan tur ruahmanna siam ni se chuan, thu buai neih a awm lovang. Mahse kan ngaihsak tawk ve lo va, an tan Myanmar-ah awm ngaihna a awm tawh bik lo, Myanmar sorkarin a hre ru tawh bawk si, dinhmun hlauhawm takah an awm avangin, an tawn ang ang tawng turin, an lo chhuk tawp mai a, mahse keinin, dan lova lo lut angin, thu buai kan lo siamsak ta a ni. 

Khua leh tui ṭha pangngai takin, lung in tan pawh pawi a ti tawh lo a nia, heng mite dan bawhchhe lo thei lo dinhmuna dintir kher hi a a dik dawn em ni? Hei hi rethei leh hausa inthliarna dik tak a ni lo maw?