Congress hian Finance enkawl chungchangah sawi tur a nei lo tih chungchanga Side B lam ve thung aw

Vanglaini chanchinbu, Dt.20.05.2020 a chhuaka Pu R.Lalhmangaiha, Bethlehem veng thu ziak hi ngun takin ka lo chhiar ve a, a ngaihnawm em em rualin a ṭawngkam hman dan hi chu a rumin thu dengkhawng tak tak a rawn phuh chhuak ve tho mai. 

Kan ramin harsatna namen lo a tawk a, source hrang hrang aṭangin sum engzat nge kan dawn tawh? chuta ṭang chuan engzat nge kan hman tawh? hman bang engzat nge la awm? tih hi an hriat duh tak chu a nih laiin, a bul velah khan a kual a kual ta mai niin a lang. ‘Kan la hmuh tur zat kan la hre thei lova, Central-in min la pek tur zat kan la hre thei lo’ a tih te kha thu dik tak a nih rualin, mipui hriat duh leh an zawhna pawh a ni hek lo. Chhungkhat pa’in a sum neih zat a hria a, chhungkaw tana a hman tawh zat leh an hman bangte a hriat si loh chuan, chhungkhat paah chuan ngaihtuahawm tak a ni ngei ang. Chutih lai chuan, Vanglaini, May, 19 ah Mahmuaka Chhakchhuak in a rawn tarlang ta kuau mai a, Rs.882.37 cr a nih thu a rawn tarlang hian min ti bengvar hle a ni.

A dawt lehah chuan, Chief minister-in budget piah lama BAFFACOS, Peace bonus, World bank a sum a sawi chhuah nasat bakah, minister dangte sawi chhuah tamziate kha a rawn sawi ve leh a. A dik khawp mai, MNF sawrkar hmasak lai khan chanchinbu ah mi pakhat thu rawn chhuah kha min hriat chhuah tir a ni, ‘Delhi an kal apiangin vaibelchhia an hawn thu hi chanchinbuah kan hmu ziah a, hetiang hian hetah hian hman a ni e, tih lam pang hi an rawn ti lang leh tawh miah si lova’ tiin a rawn ziak a ni. 

Chuvangin, BAFFACOS, Peace bonus chungchangte phei hi chu sawi tur a tam lutuk, Party danga miten rawn sawi chhuak ta sela a awm ang zawkah ka ngai. Tin, ama mimal ngaihdan a rawn sawi a ni ve mai a, an hotu lian zawk te ngaihdan a nih pawh ka ring lo ve. Sap hoin workmore, talkless an tih ang deuhin, sawi chhuah tam ai mahin thawh chhuah tam kan mamawh zawk a. COVID-19 do nan development sum zawng zawng hmang zo vek se la, development hna thawk thei lo se la tihte phei hi chu rilru dangdai tak a ni. Kan ram leh hnam dam khawchhuahna tur a nih dawn phawt chuan  hmang zel rawh u, tuman an demin ka ring lo ve. A kawtawpah kan tang tawh zawk a nih hi. 

Chu mai chu ni lovin, deve­lopment hna te hi thawk ta ula chuan dem in hlawh zawk ngeiin ka ring. 

A tawp berah chuan, hei hi ka sawi duh a ni. Nitin mai a chanchinbu a kan hmuh ziah mai chu, sawrkar sum hman dan sawina hi a ni mai. Heta thu rawn ziak ṭhinho hi mi chi hrang hrang an ni ngeiin ka ring a. Baffacos leh Paece bonus hun laia kan pu te kha, tuna kan pu te hi an ni alawm tih rilru an put vang a ni em? 

A nih loh leh fak chiam mai an duh vang zawk, kan ngaihdan dan nisela.