Vai nena inthlun zawm

Mi ṭhahnemngai tak takin Mizorama Vai sumdawnna lian tham indin an ngaimawh thu an rawn ziak a, heng mite ka ṭan vang lam ni lovin Vai nena inthlunzawm hi pumpelh theih a nih loh thu lam hi ka ziak ve dawn a ni.

Ziak mi ka nih lem loh avangin ka sawi tumah ka han lut nghal chawt mai dawn a, kan Mizoram hrim hrim hi Vairam tel lova nung thei tawh lo a ni. Thawhchhuah sawi tham nei lo state kan ni a, kan budget kan han pharh vete pawh Vai kan tih mai central sorkarin min pek zat aṭanga chhut vek a ni a, Vai nena inthlun zawm hmasa ber chu kan sorkar hi a ni phawt mai. Thil lian tham kan budget in a tlin loh zawng thawhna tur chu Vai hnen aṭangin Vairam aṭangin kan dil chhuah a ngai a ni.

Kan political party lian pahnih hi Vai nena inthlun zawm bawk chu an ni a, ti ila kan sawi sual tam pawhin ka ring tawh lo. A chhan chu Congress chu sawi ngai lovin Vai Pawl kan tih mai ṭhin kha a ni a, chutianga Congress-te Vai Pawl tia puhtu ṭhin MNF hi NDA hnuaiah lungawi takin an awm tawh a, chu chu duhtawk mai lovin chu aia thuk chuan BJP kaihhruai pawl NEDA hnuaiah an awm leh tawh bawk a. Ṭawngkam thiamin NEDA hnuaia awm hi BJP hnuaia kunna a nih loh thu sawi tum mahse mipui chuan BJP uite ang lek an nih thu kan hre ṭheuh bawk si a, chuvangin kan political party lian pahnihte hi Vai nena in­thlunzawm tlat an ni.

Kan chenna hrim hrrim hi Vai ram (India) a nih avangin Vai aṭanga awm hran hi tum sa teh mah ila kan hlawhtling dawn chuang lo. Kan sumdawnna pawh hi Vairam aṭanga bungraw lak a nih chhung chu Vai kan zawmna hi a awm tho tho dawn a ni.

Chuvangin Vishal an rawn hawng a, Vai mi hausain Mizo hming an rawn hawh a nih pawhin dawr dang nen hian a danglamna ka hre tam lem lo. Bazar India an tih pawh hi kei chuan Vai dawrah ka han tawngpawng puh tawp mai a, anni pawh Vishal kan sawi ang thovin Vai nen an inthlunzawm a ni mai a, thil danga Vai thunzawm tho si hi chuan i do lo ang u.

Tunah chuan kan nihna tak hai lanin a awm ta a, Vai nena inthlun zawm ṭheuh ṭheuh kan leng suau suau a, heng Vai nena inzawmna duh lotute pawh hi Vai sumadwng leh contractor hnen aṭanga pawisa khawn an ni ve tho an tih pek chu mawle.

Hetihlai hian, Mizo hminga Vai an sumdawntir a, direct taka min bum an tum hi chu ka ngaithei lo thung a ni.

- Vanlalliana (Maliana)