Zu rui kan hua, Sum kan rui si

Zu khap burna state-a zu hmun Rangvamual lamah camping siam kan tum hi sorkar muakphona a ni a, 2018 inthlan dawna zu zawrh duh lotute khan zu zawrhna hmun a ni tih hre chungin camping siam tum an awm tih hi an hre ve chek turah i ngai phawt ang u. Chutih lai chuan Ṭamdil enkawltu chu zu a rui niawma hnam dang khualzin pakhat sawi chu ban phah na tling a ni a. A sawina social media, Twitter an tih lamah tho a ruih loh thu sawitu hnam dang khualzin dang a awm ve leh bawk a, "Zu a rui," titu chu an pawm ta zawk a ni. 

Eng nge kan sawi dawn tak ber chu in lo ti mai thei a, Mizoramin sum a rui mek tih hi a ni. Tunah hian MNF party chhungril hi a phel phawk tawh a, a phel chhan chu sum rui an awm tlat vang an ti. Sum hi duh lo kan awm lova, nimahsela MNF Party worker kum tam tak MNF lo vahvaih pui tawhtute chan ve theih loh leh chhan ve theih loh hna lian a chhuak chur chur a, a tawpa a tui hang hawptu tur chu chiang sa deuh deuh an awm thei zel a nih chu - chung mite chuan sum an rui a ni. Heng mite hian zu rui an hua a nih hi chuan a va han letlingin a va linglet em, tihte hi Pu Mafaa ṭawngkam hawhin kan han ziak ve luklak a nih hi.

Ṭamdil enkawltu ban chhan hi social media lama hmai phih tumna a nih hmel a, hmai balh belh chhahtu mai a chang ta si a, Vai pakhat 'tweet' chu Mizo pa chaw bel ben buak sakna khawp a tling a nih si chuan, he khawvelah hian tute emaw hi chuan an tuh rah an la seng ve ngei ang. Chutih hunah chuan, "Kha, ka tihreng kha," tiin Mizo mipui tam zawk hian an la kawk ve thei. Ṭamdil enkawltu kha a rui a, a thawk ṭha lova, Tourist Lodge darthlalang kha a tikeh a, mutbu kha a tichhia a, thosilen kha a tipawp bawk a nih chuan ban a phu hle a ni. Amah ber khan mikhual a dawnsawn laiin a rui lo niin a sawi a, chu chu Twitter-ah Vai pakhat khan a rawn nemnghet ve bawk.

Thosilen leh darthlalang hi chu lawng khalhtu (Boatman) chan a ni lo deuh lo maw? Mualpho tur an awm a nih chuan suspend-na ziaktu Director mai ni lovin a chunga awm zawng zawng pawh a ni tel a ni. Tourism lamah hian kan thlen san loh ang aiin kan thawm a ring tih bak hi chu sawi belh hrih lo vang; 2023 lama sawi atan kan la khek ve loh chuan a ṭha nang. Rangvamual bawk hi sawi leh ta ila. Eng vanga he hmuna camping hi siam kher kher nge kan nih a, Truck parking na buai map khawpa camping siam hi a ṭul ber em ni? RV zu zuarte camp an thawn luh (by force) kan tum thei a nih chuan an zu zuar pawh khap bet ta zawk se. Zu khapna dan siam ve si kengkawh leh ngam tak tak lo leh peih tak tak lo sorkar kan neih avangin zu khapna hnuaiah RV-ah camping siam a ngai a nih chuan Excise Minister hi 2018 December thlaa RV lama a vei zak zak kha a chhunzawm lo a ni ngei ngei ang.

Minister dang pawhin an ṭawiawm a, zu haw ber ang khan an kal thla zung zung a, tunah chuan camp chilh ngai khawpa zu hmun pui a ni si. He sorkar hnuaiah tho hian - zu khap burna dan chu a hlawhchham fai ṭhak tih hi pawm ila, kan buaina chu zu rui tho tho a ni e. Zu hi a awm a, an zuar reng a, dan anga zawrh chiah a tawp a, dan lova zawrh a kal reng a ni.

Lengpui Airport sak lai lirnghing leh tuilian leh thlipui vang ni lova a chim rup kha ram leh hnam mualphona a ni; Ṭamdil enkawltu lawng pu (Boarman) zu ruia puhna mai mai hi hnam mualphona a tling lo. Vai pawh an rui ve fova, mahse an Airport sak a chim ve lo. Airport sak lama hna tlin lo, hna thawk thiam lo leh thawk chhe tak contractor hrem ngam si lova, Ṭamdil enkawltu hrem ngam kan nih chuan zu rui haw viau siin sum kan rui tihna a ni e.

Lengpui aṭanga Aizawl panna kawngah hian kan huat em em zu hmun a awm a, chu pawh chu zu khap burtute hian an tirem thei si lova, camping kan buatsaih mai ang chu.

- Terema (TR Ralte), Ramhlun