Sorkar Laipui Minister Pu Shekhawat-a’n Pu Zorama a Hau!!

Central-a tui lam buaipuitu Jal Shakti minister, Pu Shekhawat-a’n mimal takin min rawn phone a, "Hei, in project kha ka hmu a, tam deuh ka rawn pe dawn che u nia," a tih a, “A rawn sawi amount-a kha a tam lutuk a, ka ringhlel,” tih thu Pu Zorama’n House-ah kumin (2020) February 25-a a sawi laia hnunga a Minister ṭhenkhat hlim taka an lo nuih hak hak aṭang khan, eng ti ang chiaha tam nge chu sum chu? tih rilruah a awm reng a. 

Amaherawhchu, hun a lo kal zel a, Covid-19-in min tibuai a. Local Task Force-te nge thunei zawk sorkar? tih pawh hre lo teh nuaia kan kal chhoh lai chuan Pu Zorama’n House-a a “rinhlelh sum tam deuh” khan khaw êng a lo hmu reng mai hi a lo ni a. Sum, “tam deuh ka pe dawn che u nia,” titu khan Jun 23 khan Pu Zorama chu lehkha a rawn thawn hlauh mai a. A lehkhathawna thu ziahte chu chhiar kilhkelh lo mah ila, Press Information Bureau (PIB)-in June 23 a Press Release a siamah chiang taka a lan vek tho avangin inthlahrung lo takin han sawi ta ila.

PIB report aṭanga a lan dan chuan Pu Zorama hian hna a thawk tha tawk lo emaw ni chu aw, tih theih turin Minister Shekhawat-a chuan, JJM-ah Mizoramin hna an thawh muan thu a rawn sawi a, [Jal Jeevan Mission (JJM) chu miretheite chawikanna lam thil a ni a, in tin tana tui connection pekte hi a thawh pawimawh tak a ni]. Chutihrualin thawk chak turin a rawn nawr bawk a. 

Kan fiah deuh nan Union Minister Shekhawat-a’n Pu Zorama lehkha a rawn thawn chu, a sawi tum hmaih si loin, a tawi thei ang berin, bung deuh hlekin sawi kan tum dawn a nih chuan heti hian kan sawi ang:

"JJM (mirethei ṭanpuina lam) hnuaiah hna in thawk muang lutuk. Campaign ang maia ṭangin thawk rawh u. Nikumah vaibelchhe 68 pek in ni tawh a.  Vaibelchhe 31 in hmang bâng a. Kumin atan vaibelchhe 79 pek in ni leh a, in hman bân vaibelchhe 31 nen belhin vaibelchhe 110 in nei ta a. In tum ve tur nen belhin kumin atan vaibelchhe 122 in nei ta a nih hi. Ṭang ta che u. In tin hnena tui connection Functional Household Tap Connection (FHTC) pek hi Mizoramah December 2022-ah chuan zâah zâ tihthlawhtlin ka tum a ni," a rawn ti a ni deuh ber. Kawng dangin tlar khat leka kan sawi dawn a nih chuan, ‘Union Minister Shekhawat-a’n kan CM duh em em Pu Zoramthanga a hau,’ kan ti thei ang.

Chutia Union Minister Shekhawat-a’n chiang taka a rawn sawi takah chuan a tir aṭanga ka rilrua zawhna awm, Pu Zorama'n House-a "sum tam deuh" "a tam lutuk a, ka ringhlel" a tih kha ka hre ta a. Vaibelchhe 79 a lo ni reng mai a. Awihawm lo khawpa tam chu a nih loh hi maw le! Eng nga ti nge Pu Zorama khan "a tam lutuka ka ringhlel" a tih kher le, ka ti a. A chhan erawh ka hre tawh lo. Ama'n a hria ang, zawt mai rawh u. Ka hriat chu, thil a sawi uar thei hle, tih a ni mai.

Chu mai bakah chuan December 2022-a mirethei tui connection neihtir hman vek turin zâah zâ a thlawp tur thu leh chutianga hlawhtlin theihna tura Video Conferencing hmanga meeting neihpui thuai tura Minister Shekhawat-a'n Pu Zorama a rawn hrilh leh, retheite ṭanpui tura thawk chak lehzual tura a rawn hrilh aṭang hian, Mizo hming zawng zawnga hming nationalist ber putu kan Chief Minister, Pu Zoramthanga ai chuan vaipa, ahring ahrâna a hmel pawh kan la hmuh loh hian Mizoram hi a hmangaih daih zawkin ka hre ta a ni.