Kan hming phuah/ sak dan leh ziah dan hi

Kei ve hi ka mawl vang ni maw, kan hming phuah/ sak dan hi ka vei ve teh daih a, inthlahrung deuh tak chungin kan ziak ve rawi mai a ni.

Kan pi leh pute kha chuan an tu an fate an lo piana an hming an phuah/ sakin an huaisenzia te, an buh thar tamzia te, an hnam leh thil dang an ro neih te an phuah/ sak chhan ṭhin a ni. Kristian kan lo nih tak hnu hian kan tu leh fate hming kan phuah/ sak hian vanram lam te, Lal Isua hmangaihna lam etc kan phuah/ sak chhan ta deuh ber a, a ṭha e.

Amaherawhchu, kan lo changkan tak zel vang ni maw, sapho kan ngaihsan hrim hrim vang ni maw ka hre lo a, kan tu kan fate lo pian hian an hmingah sap hming phuah/ sak tel hi kan uar ta viau mai. Sap ho hi an changkan bik em em vang nge ka hre lo a, kan ngaisang viau mai a. Sap, Japan, China etc. heng kan mi ngaihsante hian an tu leh fate hmingah hnam dang hming an phuah/ sa ve ngai em?

Keini chu Ruthi, Ronald, Baby, John, Robert tih leh a dang tam tak kan in phuah a, vai hming erawh kan in phuah duh lawi miah si lo. Didi te, Kanchhi te, Ali, Murmu etc. hi hi chu kan tu leh fate hming atan kan duh leh hlawm hauh si lo. Hetiang zela sap hming kan in phuah zel chuan kan la inchhir hun a thleng ngeiin ka ring. Tun ang zela kan kal chuan kan hnam culture kan tidalin a chingpen ang tih ka hlau a ni.

Ṭhenkhat phei chu kan Mizo hming bo

ṭhakin kan sap hming chauhin kan in ko ta lehnghal a, heti em ema sap kan ngaisang a, sap hming put kan chak chhan emaw ṭul kan tih chhan hi han sawi fiah thei ula a lawmawm hle ang.

Tin, kan hming ziah duh dan hi kan lo changkan tak lutuk vang nge ni ka hre lo. R. Ralte, K. Van­chhawng, Ch. Renthlei etc. te kan ni ta nuaih mai! Kei chuan hetiang hi hming a tlingin ka hre lo tlat a ni. A chhan chu hetiang hming neiho hi vanduai thu-ah lo thi ve ta se, an thlanlungah engtia ziah tur nge ni ta ang? K. Vanchhawng aiah Kawlsiama Vanchhawng etc tiin an ziah ngei ka ring. Hetianga hming ziah hi kan intih eng emaw mai mai vang niin ka hre tlat.

Hming bula hnam hming bul chauh kan dah ṭhin pawh hi a lo fuh lo hlein ka hria. Entirnan, ka hming bulah C. ka dah a, C hian eng hnam ber nge a lam a hriat si loh a, ka lo dah laklawh tawh si, ka inchhir hle a ni. C dah loin Lalneihliana Chhangte ka lo ti mai lo kha ka inchhir hle. C hian Chawngthu te, Chhakchhuak te, Chawngte etc. a lam thei vek bawk si a.

Chuvangin, kan hmingah hnam hming kan telh duh rau rau a nih chuan hming piah chiahah hian hnam hming hi ziak ṭhin ila a lo dikin a lo ṭha ber maiin ka hria.

- Lalneihliana