KA PU AW

1978-ah tlai lam college-a zir chhuakte zingah ka tel ve a. Mizo zirlai min zirtirtu Pu Lungmuana leh Pu Rokamlova te hi ka hre reng ṭhin. 

Kan luh tirha kal tharte puala Pu Rokamlova lecture ka hriat hmasak ber chu, “Matric in pass a, engkim hria nia inngaiin college-ah hian in lo lût a ni mai thei. Mahse, lehkha zir tlâk turin in mit a kêu ṭan dawn chiah zawk a ni tih hria ang che u,” a tih kha a ni. 

Kum 46 a liam a, ka dam chhung hun chawhnu lam ka hman hnu thleng hian, zirlai ni tlâk turin ka mit a keu ṭan dawn chauh a ni tih thu hian he kawrawng hi a la luah reng. 

Pawnlanga leh­khathiamna aia ril, chhungrila nun pawm­thiamna min kawh­hmuhtu a nih avangin, Pu Rokamlova hi ka chhuangin ka zah a ni.

Patea leh Dam­hauha te vanram ngaihna hla min zirtir a, hlim tàwp hlau lova vanrama kan lèn hun tur chu, zirlai zinga lungmawl ber kei takngial pawhin ka thlâkhlelh vawng vawng theih tur khawpa ngaihnawmin min han hrilh a. Kham lo taka a thu sawi kan ngaihthlak laiin hun inthlak dar a lo ri a....

A lecture kal tluang lai chu, eng tin nge a vanglai taka a tihtawp tak ang tih hriat châkin, thehmeh reh taka reh ṭhiap chungin, zirlaite chuan a kam chhuak hnuhnung kan chäng ṭhap a. 

“A bâk chu...” a nui suk a, “...pulpita sawi zawmah aw..!” tih paha pindan a chhuahsan lai kha mithlaah a la chám reng. 

Hriatna leh finna vawrtawp chu nun chhenfâkawm neih hi a ni tih thu hi Pulpita sawi zawm tur chu a lo ni. 

Kum tam tak hnuah, Zarkawt biak in sira khawhar inah kan inhmu a. “Vanneihtluang, lo kal teh,” tih pahin, ka bána vuanin páwnah min kai chhuak a. 

“En teh, chhak lama in khi!” Chief Minister chènna in chu a kâwk a. “Ram hi a dam ang a, khi in khi rorelna dikin a la luah dawn asin” 

Ka ngawi reng a.

“I awih lo! I ring lo! I beidawng a ni maw? Beidawng suh... ‘Eng vangin maw?’ ti rawh!” 

“Eng vangin maw?” “Ring rawh! Kristiante tan rinna tluka duhawm a awm lo ang bawkin, rinhlelhna tluka ten­awm a awm lo. Ṭawng­ṭaina hian engkim a ti thei a sin.”

Chu chu ka pu aw ka hriat hnuhnun ber a ni.