Lirthei intlan chhawk tir Mizoram darthlalang a ni

Aizawl ang tluka hmun chhengchhia, khawpui ṭhang chak si hi khawvelah hian a tam lo hlein a rinawm.

Khawpui ṭhenkhat ṭhang chak tak takte hi chu an khaw hmun tal a rualrem a ni. Kan Aizawl ve hi chu zawl sawi tur a awm lem lo; awih tlan, hmun bak bahai tak tak te an ni a. Khawi hmun mah hi chenna atan han awhawm tak hi a awm lo.

Heti chung hian State capital a nih miau avangin engkim bul leh tawp Zofate Alpha leh Omega a ni a. Zoram hmun tin, kiltin aṭangin khawsak a ziaawm deuh beiseiin kan pem lut hum hum a. Mihring kan pung chak a, lirthei a pung chak a, in ṭha tak tak a pung chak bawk. Kalkawng erawh a pung lem lo, a zim si. Motor neitute zingah garage nei an tlem viau. Chuvangin trafic jam a tam a, trafic management ṭha neih a har hle.

Sorkar chuan lirthei tlan tihthawl nan Taxi a intlan chhawk tir a, awmzia erawh a nei lem lo. Sorkarin New Secretariat a din a, office pawh a hung nual bawk; mahse awmzia a nei tam lo hle. Office kaina kawng a thui a, rethei tan a hahthlak hle mai chauh a ni. Trafic a thawl chuang hek lo. Sorkarin bengsik meuha a ngaihtuah hnuin motor zawng zawng chu October 2017 aṭangin an intlan­chhawk a. He rua­hman­na thar hi a ṭha tiin lo ‘welcome’ hle phawt mai ila. A hlawh tlin loh kan hlau a nih pawhin indem ngawt lo ila, a lo hlawhtlin hlauh chuan a lawmawm lulai dawn em mai!

A lo hlawhtlin hlauh chuan trafic hotute kan chawimawi tur a ni a. Sorkar pawh a chhuanawm hle dawn a ni. Thil ropui tak a ni ang a, kan tan darthlalang ṭha tak a ni bawk ang. He intlan chhawk policy hi a hlawhtling loh pawhin kan darthlalang chhe tak a ni tho dawn a, Mizo history a ziah luh ngam a ni lovang. Chu hlawhchhamna chu dawngdahna leh thatchhiatna te, rinawm lohna te vang a ni ang. Mahni dan zam bawhchhiatna a ni ang a, kan mualpho hle ang.

Lirthei pung chak lutuk hi a manganthlak a, motor neih in khap ngawt theih lah a ni bawk si lo. Ṭhenawmten lirthei an neih theih lai a, nei lo bik nih lah kan hreh tum hrang lehnghal. Mi ṭhenkhat lah ṭhen­awmte leng tur han phurh mai hreh pawl kan lo awm ve bawk si nen. Lirthei neih hi rual pawlna chi khata kan ngaih tlat bawk si avangin lirthei neih ve zel a ṭul a ni ta mai.

Sorkar hian thil tam takah ruahmanna thar a siam tawh ṭhin a. Chhut mite sawi dan chuan thil tam zawkah a hlawhchham ṭhin rih a ni. Pawisa tam tak senso a nih hnu a hluihlawn leh tak sawi tur pawh a awm ṭhin. Engtinnge maw ni ta ang le? Motor intlan chhawk chu a hlawhtling ang maw?

Motor neitute, motor khalhtute, dan leh thupek kengkawhtute, thuneitute, pawl hrang hrang, sorkar hna­thawk te, mi thiltithei te, mi naran te, ram hmangaihtute mi zawng zawng kan ṭan rual a ngai a nih hi.

He trafic policy thar hi a hlawhtlin hlauh chuan kan va lawm dawn em! Kan ram tan darthlalang a ni si a. Thuneitute han ṭang leh sauh sauh teh ule. In hnungah nangmahni ṭawiawm turin mipui kan ngir khup mai.

- Lallunghnema, Charity Lodge