Kensington veng leh ruihhlo ngaite

USA chu khawvela ram hausa ber a ni. A han ter pha deuh tur ram dang an awm meuh lo a ni ber e. Ralthuam lama amah han el pha deuh tur Russia nena an inhausak hleihzia chu nasa tak a ni bawk.

Chu ram, khawvel ram hausa bera state pakhat Pennsylvania khawpui lian ber chu Philadelphia a ni a. Chu khawpuia veng pakhat Kensington chu ruihhlo ngâiho tuallenna a ni. Tualthah leh rukruk a tam a, khawvela sawrkar thil ti thei ber USA meuh pawhin tihngaihna tak a hre lo a ni ber e.

Kensington-a ruihhlo ngai tam ber chuan heroine an ngâi a, marijuana zu pawh an tam ngiang e. Khawlaiah zalen taka zuin an inchiu a, at phah an tam hle. Khawlaia lo rui thle bawk bawk te, lo ṭhu kun ngawih ngawih te, mu zawi ngawih ngawih te, ât vanga lo au lo au te, kut dawh ta nawk nawk te, lo inchiu mawlh mawlh te, awmze nei lova phun mawlh mawlh te, vei tawn sek ringawt te, chaw lo ei ta mawlh mawlh te an kat nuk mai. A rapthlak thei hial a ni.

Ruihhlo ngai awm lohna ram hi a awm lo a ni ber e. Ram thianghlimah meuh pawh an buaipui nasa asin. Israel Center on Addiction-in a report dan phei chuan Israel mi pasarih zinga pakhat zelin damdawi engemaw tal an ngâi a, an pung nasa viau lehnghal. Japan ram pawh an mangang viau ṭhin a ni awm e.

Russia ram te hlei hlei an buai. Zu vanga thi leh at phah an tam chu sawi loh drugs addict an tam lutuk avangin sawrkar lu a hai ve fo a nia. Latin America leh Africa ramte pawhin an chai tawk buaina an nei vek bawk. Ram changkang apiangin an buaipui nasa emaw tih mai a awl hle.

Amaherawhchu, ram tinah heng ruihtheih thil addict chin hi chu an nun a hniam a, ram rorelna-ah an inrawlh pha lo mai pawh ni lovin a ngaih pawh an ngaihtuah pha lo. Philadelphia khawpui Kensington kawtthlerah chuan ruhhlo ngai awm nghêk nghûk mah se, Washington DC-a roreltu ruihhlo ngai ve reng reng lote chuan dikna nen taima taka ram rawng an bawl avangin khawvela ram ropui ber an ni thei. Israel ṭhalai engemaw zat chuan ruihhlo an ngâi ve tho va; mahse an ram roreltuten dik tak leh huaisen taka ram an enkawl avangin an tiapui ramah chuan khawvelah a han ter pha an awm bik lo a ni.

Japan rama ruihhlo ngai an tam vezia leh a buaipuitute an buai ve ṭhinzia te chu kan lo ralkhat hriat ve viai viai a. Chuti chung chuan Japan ram chu khawvela ram changkang ber, technology-a sang em em an ni reng thei si. Hei hi harhfim taka roreltute leh harhfim kara development hna thawktuten rinawm tak leh taima taka hna an thawh vang a ni.

Mizoramah pawh hian buaipui tham fê zu leh ruihtheih thil dang addict kan nei reng ṭhin. Mahse heng mite hi ram danga ruihhlo ngaite ang bawkin ram rorelna khâwlah an inrawlh pha lo va, hmasawnna hna engmah thawh an nei ngai lo.

Ruihhlo ngai tam tak awm ve thona ram dang kan an lohna a awm. Kan ramah chuan ruihhlo ti ngai reng reng lo leh zu rui ngai reng reng loho hian dikna kan keng kawh lo va. Rinawm tak leh taima taka thawh aiin kut tling lova hausak thut duhna leh pawisak lohna a lian a. Harhfim kara roreltute rilru-ah hlemhletnain bu a khuar nasa a. “Sum tam tak aiin hmingṭhat hi thlan zawk tur a ni,” tih letling chiah hian “Hming ṭhatna aiin sum tam tak thlan hmasak a, sum hmanga hming ṭhatna chu lei lêt leh mai zawk tur a ni,” tih hi kan thupui a ni.

Harhfim kara contract hna hmutute chuan hlep tam takin neiin an contract chu an hralh chhawng mai mai a. A thawktu tak pawhin harhfim karin a thawk chhe em em hreh chuang lo. Sawrkar hnathawk officer smart tak takte hian harhfim karin an eiru hreh reng reng lo va. Harhfim kara supply hna thawktute chuan to uchuak tak taka bungrua an supply fo loh leh bungraw chhia supply pawh an hreh miah lo. Harhfim kara industry lem dintute chuan truck thlawk thei te, truck lian phurh zat phur thei scooter te an neih loh leh Aizawl atanga Shillong/ Guwahati zu lehlang zak zak thei truck te an nei a; an zak chuang lo.

Burma kuhva Mizoram thar anga lo ziak lut hmiah hmiah duhte khan ruihhlo an ngaiin ka ring lo va. Teirei lui dawh zawh theih reng reng loh pawh khu ruihhlo ngaiho vang ni lovin harhfim tak chunga buaipuitute vang a nih a rinawm zawk. Hmasawnna hna thawh dawna zangna dawmna uchuak tak tak la ṭhinte hi kohhran inhmang tak tak, harhfim kara ram rawngbawltute an ni fo zu nia. Khehpuam te, rangkachak tawlhruk tih te hi ruihtheih thil tihchingte chin chhuah leh buaipui ni lovin harhfim kara pawisak nei miah loho an ni.

Ruihhlo leh zu lam chi reng reng hi tih loh tawp a ṭha ber a. Chutiang ti lo tura inzirtir leh inven hi khua leh tui ṭha pangngai chuan kan tih tur a ni. Kan la do nasa lo mah mah ni hian ka hre ṭhin. Amaherawhchu, zu leh ruihhlo dang laka fihlim chauh hi khua leh tui ṭhate tihtur ni a ni lo va. Mahni hna ṭheuh rinawm tak leh taima taka thawh hi kan fundamental duty a ni.

Kensington vengah chuan ruihhlo ngaite chu lo vei suau suau pawh ni se harhfim kara roreltuten dikna leh rinawmna nen rorelna an kalpui miau avangin an awmna America ram chu khawvela ram hausa ber leh ropui a ni thei tho a ni.

- Lalchhuanmawia Tochhawng