Written by
- Zomawia Khiangte
SCHOOL KAL LOH CHHUNGA KAN TU LEH FATE ZIRNAA PUIH DAN TUR
Hun pangngai ni se April (2020) thlaah khan kan tu kan fate hi school lut leh tawh tur an ni. Mahse, Covid19 hian school kal thei lovin a siam a nih hi.
Naupang hriatna hi a chak a, mahse a nghet lo thung.Han ngauhtuah vang vang la, kum 10 i nih laia i thil hriat kha hriat i nei tlem tawh khawp ang.
Kan tu kan fate hian thla 3/4 kal taa an lehkha zir kha an chhunzawm tawh lova, an theihnghilh ṭeuh tawh dawn a ni. Ka fapa pawh hian Nursery, KG leh class I-a vawi tam tak an ziah ṭhin zinga mi 'D'- cursive letter (capital) an ziah dan kha a theihnghilh tawh nia! An class-ah chuan pakhatna a ni ve ṭhin tho si!
Tunah erawh hi chuan a thiam thei ber berte tan pawh an hriat tawh sa vawn nun nan tak ngial pawh chance a awm rih lo. A thiam thei a, a theihnghilh lovang, tih tur a lo ni hauh lo.
Tun ang em ema rei hi kan hriat theih chinah school kal thei lovin an awm ngai lo. Heti hian in lamah ti ṭheuh ang u-
1. Nikkum lama class an pass tawh chiah an notebook-ho kha a tahtawlin chhiartir leh mai mai ila. En dik sak bawk ila.(Kan la kawl chuan)
2. An notebook a miho kha an excercise book awl laiah copy
ṭhattir leh ila. Endiksak bawk ila.
3. Listening skill tih thawh leh (revive) nan an beng hriatah an note book leh zirlaibute chhiarsak ila.
4. Mahni thiam ang angin spoken english lama an hnufum lutuk loh nan English-in be ṭhin ila
(Ṭhenkhat chuan 'Mizo ṭawng uar tur alawm' kan ti mai thei. Mahse kan uar tawk viau a ni lawm ni? Mizo chhungkuaa seiliante chu kan biaknaah Mizo ṭawng 100% kan hmang a, mumang pawh Mizo
ṭawng thovin an nei? English-a minute 5 pawh tling mang lo kan lo biak ve avang hian Mizo ṭawng an theihnghilh hman hauh lovang tih ring ila)
Hetiang hian nitin an nin loh awm tawk velin tihtir thei ila. Lehkha zir tura skill hrang hrang heng reading skill, writing skill, listening skill leh speaking skill te kan vawn nunsak (keep up) thei dawn a ni.
Hetia kan tih loha kum tluana engmah zir zui lova an tal mai mai chuan reiloteah an mawl viau thei.
Hei hi Online class kal lo tan a pawimawh lehzual ang. Kal mekte tan pawh a hlu ang.
I rin aiin i fate'n an thil zir an theihnghilh nasa tawh ang.