HRINGNUNAH HIAN NEIH RENG KAN LO NEI LO

Khawvel eng hmu turin kan lo piang a, kan lo ṭhanglian chho a, rualawhnain kan khat nghal. Kan naupan lai aṭangin kan neih ve loh kan ṭhiante thil kan awt a, neih ve kan chak a, nu leh pate hnenah kan han ngen ṭhin kha a ni a. Kan awh zawng tak han nei mah ila, duhtawk chin a lo awm lo, a dang awh tur a lo awm leh zel tho mai; lungawina tak tak kha a lo awm thei lo. Chu chu kan hringnun lo hman chhoh dan tlangpui chu a ni. Kan han nula tlangval a, ngaihzawng han neihte chu nawm hmel riauin kan han hria a, kan han nei ve ta chèng a, a lo nuam chuang lo. A changin kan hlim a, a changin kan intithiam lo va, kan thikthu a chhe bawk a, kan ta tura kan ngaih tawhte chu rei lo teah midang ta an lo ni leh a, neih reng kan lo nei lo ve. I-Petera 2:11 "Duh takte u, mikhual leh khualzin in nih avangin, thlarau do ṭhintu tisa chaknate bansan turin ka ngen a che u." a lo ti a ni.

Nupui pasal neihte pawh a nawm hmel riauin kan hria a, kan han nei ve ta a, ropui takin kan han lawm a, a tirah chuan kan hlim hle; mahse kan nupui/pasal chu a lo rinawm tâwk leh ta lo, keini aia duh zawk an lo nei, damchhunga kan ta ni tawh tura kan ngaih chu midang ta a lo ni leh ta. Chutih laiin kan nupui/pasal chu kan tana rinawmin kan hlim dun em em a, fa duhawm tak tak kan han nei a, damchhunga ka ta ni tawh tura ka ngaih laiin rei lo teah thihna kut vawt chuan min rawn mansak leh ta, kan ta ni tura kan ngaih chu kan chán leh ta a, neih reng ka nei leh ta lo. Fa duhawm tak tak kan han nei a, an future turte thlirin kan nupa chuan kan hlim thei hle, kan fate an duhawm bawk si. Mahse, kan hriat miah lovin ruihhlovin a lo tibuai, ngaihzawng avangin a rilru a lo hah, amah a intihlum ta mai a, bakah natna dang avangin kan chan leh ta. Kan fate damchhunga ka ta ni tura ka ngaih pawh ka ta an ni lo, neih reng hi ka lo nei lo a nih hi maw le.

Khawi' nge politics kan khel ve teh ang kan han ti a, kan han khel ta ngei a, kan party chu an han chak ta ngei mai. Partya a phusa pawl kan han ni a, Minister-te, MLA te zar pawh kan han zo ta ngei mai a, in leh lo ṭha, car man to nen, kan che sang ta khawp mai. Mahse, kan fate’n an nun an hloh ta, kan nupui/pasal nen kan inṭhen a lo ngai bawk. Kan taksa a lo hrisel lo va rei lo teah boral mai tur kan lo ni ta si, ka hausa hle emaw kan lo ti a, engmah neih kan lo nei miah lo tih kan hre chhuak leh si; thlan khurah chuan engmah kan luhpui dawn si lo. Sum leh paiah duhamnain kan han khat a, sumdawnna hlawk zawk, a mawi leh mawilo pawh thlu lovin kan han bawh a. Khehpuam kan ti, ruihhlo kan ti bawk. Kan hausa ta thur thur a, mahse, kan chhungkua kan buai zo, kan fate nun kan hloh, hlimnate, nunnate chu pawisain a lo lei thei awzawng si lo; neih tak tak reng kan lo nei si lo a nih hi.

Hmelṭhat lamahte leh thil dang dangah kan lo lar a, kan nun a chapo, a hmaa kan ṭhiante pawh ka hre duh ta lo. Rei lo teah kan larna leh hmingthannate a lo chuai, milar dang an lo piang zel, kan ta tur hi engmah a lo awm lo. Officer lian kan han ni a, kan chapo va, midang kan tham lo, kan hlawh chauh lo sum eiruk tur a lo tam, kan che lian a, in leh lo ṭha pui pui nen; mahse, natna khirh tak kan han tawk, kan nupa nun a hlim lo, thihnate'n kan chhungkua min tibuai, engmah reng hi kumhlun tur leh kan ta tur a lo awm si lo. Neih tak tak reng hi ka lo nei si lo va. Kan han milian a, kan chapo va, midang lakah kan induh a, mi chhumchhia deuh phei chu kan be peih lo. Mahse, mi tu pawh hi inmamawh hun nei kan lo ni reng si a, tu mah hi inbe chhe thei leh intichhe thei hi kan lo awm lo. Kan in leh lo ṭha te, kan rohlu nia kan ngaihte chu khawvel leilung chhiatna vang tea mit khap kara chhe mai thei an ni si a. Kumhlun tur reng hi a lo awm lo.

MLA, Minister kan han ni a, kan nihna a lo ropui, kan lo hausa ta bawk. Mahse, rei lo teah midangin min rawn thlak leh. Kan fate nun hloh leh chhungkaw buainate thihna lo thleng theite chu kan milenna leh hauhsakna, ropuinate chuan a lo lei thei awzawng si lo. Lungngaiin kan kun a, engmah lo mai a lo ni. Hringnun khawvelah hian hausaknate, ropuinate, In leh lo ropuite, lawmna famkim te, nunna thleng hian kan ta leh kan neih hlen tur hi engmah a lo awm lo. Engmah hi neih reng kan lo nei hlei nem maw le, mihausa mi ropui, mi chunga leng nia inhriaa kan hawi thawven tehlul nen, kan lo va rethei leh lawi si em! kan neih hawh mai mai a lo ni vek mai a lo ni si. Saruakin kan lo piang a, saruak vekin kan kir leh dawn si a, mi tu mahin an pumpelh dawn si lo. Hringnun hi a hlut em em lai hian a va ho si em!

Hman mi hausate, mi ropui tak te, in leh lo ropui neia an hunlaia ropui tak takte kha khaw' nge an awm zawh tak? E Lei aṭanga lo piang an nih angin an kir leh tawh, a va ho si em! Chu chu mi tinin kan hmabak chu a ni lawi si a. Engkim neih dan, hausak dan thuruk, hlimna leh lawmna famkim neihna, chatuana hauhsakna leh ropuina tur thuruk chu “Isua” a ni. Mahse, Isua hi chuan hlemhletnate, duhamnate, khawvel nawmchennate, Pathian thu kawra hman te, Kohhran hi sual inthup nana hmante leh chaponate hi a duh ve miah lo thung. Chu'ng mite tan chuan Isua hnenah hmun a awm lo. He hringnunah hian Isua tel lo chuan engmah neih reng kan nei lo tih hi lo hre chhuak ve rawh le.

- Reuben Lalnunthara Hnamte